Ẹzra 7:6 - Edo Bible (E Baibol Ẹdo) Version 1996

^6-7 Ẹzra kegha re ọgbẹn ebe ne ọ wa rẹn ọnrẹn ẹsẹse ighẹ Uhi ne Nọyaẹnmwa ne Osanobua Izrẹl rhie ne Mosis. Rhunmwuda ne afiangbe Nọyaẹnmwa ne Osanobua ẹre na gha rre Ẹzra egbe, Nọgbaisi keghi wa viọ emwi hia ne ọ nọrẹn ne ẹẹn. Ọ ghi rre ukpo ihinrọn ne Atakzaziz la ẹkete, Ẹzra keghi viọ ivbi Izrẹl eso ba egbe ke Babilọn gha die Jerusalẹm, avbe ohẹn eso kevbe Livai, avbe ọsian Ọgua Osa, iran ni khẹ Ọgua Osa kevbe emwa ni winna eso kegha rre nene usun.

Ẹzra 7:6 ပူးပေါင်းရင်းမြစ်များ

Gẹnẹsis 32:28

Okpia nii keghi kha wẹẹ, “A i ghi ra tie eni ruẹn Jekọb ọvbehe. U gu Osanobua kevbe emwa nagbọn suan nẹ, obọ ruẹ keghi ke okhunmwu, rhunmwuda ọnii eni ruẹn ọ re ọ ghi gha re Izrẹl.”

Ẹzra 5:5

Sokpan, Osanobua keghi mudia ne iran ne avbe olotu e Ju, rhunmwuda ọnii avbe ivbi e Pẹsia ni rre asẹ nii keghi wẹ iran i ra ru emwi rhọkpa vbe ẹ i re te iran ka gbẹn ebe gie Dariọs ne ọgbaisi keghi ne ọ vbe rhie ewanniẹn gie iran nẹ.

Ẹzra 6:22

Iran keghi ya ikpẹdẹ ihinrọn ghọghọ oghọghọ nọkhua ru Emwiukpo Ebrẹd Ne ọ ma hue. iran kakabọ ghọghọ rhunmwuda, e Nọyaẹnmwa keghi ru ẹe ne Ọgbaisi Asiria gha ru iran ẹse, sẹrriọ wẹ ọ na kakabọ ye iran obọ vbe iran bọ Ọgua Osa ọghe Osanobua Izrẹl.

Ẹzra 7:21

“I yan tama iran ni gbe aro ghe aza ni rre odẹ Orrie otọe e Yufretes hia wẹẹ emwi hia ne Ẹzra a rhirhi nọ ra avbe ohẹn, ra iran ni rẹn Uhi ọghe Osanobua Ẹrinmwi, wa ghi viọ ne iran.

Ẹzra 7:28

Vbekpa ẹse ọhẹ Osanobua, I miẹn aro ne ọ maa nẹ vbe obọ ọgbaisi kevbe iran ni gue ẹe ziro, kevbe avbe emwa iwinna ni kọnkọn hia. E Nọyaẹnmwa ne Osanobua mwa rhie igiẹdu mẹ nẹ, I na vbe sẹtin fi eni bun vbe uwu avbe ọkaẹgbẹe Izrẹl ekhọe werrie wẹ ne iran lele mwẹ gha dee.”

Ẹzra 7:5

ne ovbi Abisiua, ne ovbi e Finihaz, ne ovbi Eliaza, ne ovbi Errọn.

Ẹzra 8:1

Iran na ọ re ọ gha re ediọn ẹwae ni gha rre iwe vbe Babilọn, iran na vbe lele Ẹzra gha die Jerusalẹm vbe ẹghẹ ne Atakzaziz na gha re ọgbaisi:

Ẹzra 8:18

Vbe ekpa ẹse ọhẹ Osanobua, iran keghi gie Siẹrebia, e Livai, ne ọ sihe, ne ovbi ẹwae Mali, bu ima gha dee, arhin evai rrọvbugie, vbe uwu avbe ivbi ẹre kevbe etiọnrẹn keghi lele ẹe gha dee.

Ẹzra 8:22

Ekhue ma gunmwẹ nọ ọgbaisi wẹ ne ọ viọ ivbiyokuo ne ima ne iran gha su ima khian, rhunmwuda mẹ tama rẹn nẹ wẹ te Osanobua fiangbe, emwa hia ni mu ẹtin yan rẹn, sokpan, ọ ghi gha mu ohu emwa hia ni fi iyeke gbe ẹe, ọ ghi gha rri iran oya.

Ẹzra 8:31

Ikpẹdẹ ne ogiweva ọghe uki ne okaro ọ re ima na kpao vbe Ahava ne ẹzẹ ne a fian ẹn gha die Jerusalẹm. Osanobua ima keghi wa deba ima, ọ na degue mwa hin obọ odekun ọghe avbe eghian kevbe a lẹre khẹ ọmwa vbe ima rre okhian nii.

Nehimaia 12:26

Ẹghẹ ne iran na na gha rrọọ kegha re ẹghẹ ọghe Joiakim ne ovbi e Jọsua kevbe eyẹ ọghe Jehozadak, kevbe ẹghẹ ọghe Nehimaia ne ne ọ khaemwisẹ, kevbe ẹghẹ ọghe Ẹzra ne ohẹn ne ọ vbe gha re ọmwa ne ọ rẹn Uhi dinmwi.

Nehimaia 12:36

Emwa ẹwae ẹre ọvbehe kevbe lele ẹe, avbe Siemaia, Azarẹl, e Milali, e Gilalai, e Maai, e Netanẹl, e Juda kevbe Hanani iran na hia keghi viọ emwi ne a kpee mwẹ obọ, egbe ne Devid ne ọba ne ọmwa Osanobua ghaa kpee. Ẹzra ne ọ rẹn ebe dinmwi ọ re ọ viọ iran na mwẹ obọ gha khian.

Nehimaia 2:12

I ma tama ọmwa rhọkpa, emwi ne Osanobua rhie yọ mwẹ ekhọe ne I do ru ne Jerusalẹm. Ẹre ọ ghi na sẹ ogiasọn, I keghi guakpao, I na viọ ihua mwẹ eso ba egbe ladian. Ẹsin ne imẹ hinrin ọkpa ọ re ọ gha re aranmwẹ ne ima mu gha khian.

Nehimaia 2:18

I keghi vbe tama iran vbene Osanobua wa yaba mwẹ hẹ, ọ na vbe yọmwẹ obọ, kevbe vbene ọgbaisi tama mwẹ hẹ. Iran hia keghi wanniẹn wẹẹ, “Gie ima suẹn gha dọlọ ẹe bọ nian.” Iran keghi mu egbe ne iran gha ya suẹn iwinna nii.

Nehimaia 2:8

I keghi vbe nọ wẹ ne ọ gbẹn ebe mẹ rhie gie Asaf ne ọ gbearoghe ẹgbo ọba, ne ọ khama rẹn wẹ ne ọ viọ erhan mẹ ne I ya kan ẹkhu onurho odin ne ọ degue Ọgua Osa, deba ọghe ekẹn ne a gbe lẹga ẹvbo kevbe owa ne imẹ ra dia. Ọgbaisi keghi wa viọ emwi ne I nọrẹn hia mẹ rhunmwuda, Osanobua gun mwẹ rrọọ.

Nehimaia 4:15

Avbe eghian keghi họn wẹ ma rẹn nẹ wẹ iran khuan khẹ ima, ọ na vẹ ne iran rẹn wẹ Osanobua duẹ uma ne iran si ua nẹ. Ẹre ima hia ghi na werriegbe ya gha gbe ekẹn ni khian.

Nehimaia 8:1

Vbe ọ ghi te sẹ uki ne ogihinrọn, ivbi Izrẹl hia keghi gbe ẹkun sotọ vbe ẹvbo edọmwadẹ ọghọe. vbe uki ne okaro ọghe, uki ni, iran hia ke do si egbe koko vbe Jerusalẹm, vbe ehe ne otọe na vbe aro vbe uwu Urho Amẹ. Iran ke wẹ ne Ẹzra ne ohẹn kevbe ne ọ rẹn uhi ne Nọyaẹnmwa rhie la obọ e Mosis gie ivbi Izrẹl ne ọ mu ebe nene uhi re.

Nehimaia 8:13

Vbe ẹdẹ ne ọ lele ẹe, avbe ekaẹgbẹe dọmwadẹ ẹwae, deba avbe ohẹn keghi bu Ẹzra gha khian ne iran ya ruẹ vbene Uhi kha re.

Nehimaia 8:4

Ẹzra keghi mudia yan ekpatako ne a kan yo ghe ukhunmwu khẹ emwi na. Avbe ikpia na keghi mudia ye ọre oberhọmwa: e Matitaia, e Siẹma, Anaia, Uraia, e Hilkaia kevbe Maaseia. Iran na kevbe mudia ye ọre obọ iye ọmwa: e Pedaia, e Misiaẹl, e Malkija, e Hasium, e Hasbadana, e Zẹkaraia kevbe Mẹsiulam.

Nehimaia 8:9

Iran ghi họn emwi ne Uhi nọ rẹn, ọ keghi da iran sẹrriọ wẹ iran na suẹn gha viẹ. Ẹre Nehimaia ne ne ọkhaemwisẹ, Ẹzra ne ohẹn kevbe ne ọ rẹn nene Uhi, kevbe avbe Livai ni gha rhan otọ nene Uhi ma emwa nii, keghi tama iran wẹẹ, “Ẹdẹnẹrẹ na, ẹdẹ nọhuanrẹn nọ ne Nọyaẹnmwa ne Osanobua uwa rhunmwuda ọnii, wa ghẹ khiẹ ra ne uwa vbe gha viẹ.

Nehimaia 9:13

Vbe Oke Sainai, u ke ẹrinmwi tuorre u gu emwa ruẹn guan u keghi rhie uhi esi ne iran kevbe iruemwi ne ọ gbae. U keghi rhie Uhi ruẹ ne Mosis ne ọguọmwadia ruẹ, ne ọ viọ gie iran. Amẹ ke uwu okuta ladian vbe ohanmwẹ amẹ gbe iran.

Psalm 109:27

Gie avbe eghian mwẹ rẹn wẹẹ, wẹ ọrọre ọmwa ne ọ miẹn mwẹ fan.

Psalm 147:19

Ọ gie uhunmwu gie emwa rẹn, igiodẹ ọre ke uhi ẹre ne ivbi Izrẹl.

Psalm 45:1

Ẹmwẹ ni rhiẹnrhiẹn wa vuọn ekhọe mwẹ, vbe I gbẹn ihuan na ne ọba zẹvbe ukeke ọgbenbe ne ọ guẹe. Aranmwẹ mwẹ, wa mu egbe ekharha ye otọ.

Psalm 80:18

Ma i ghi dọlegbe fi iyeke gbe uwẹ ẹdẹ, gie ima gha rre agbọn, ma gha vbe gha rho ruẹ.

Itan 3:6

Gha ye Nọyaẹnmwa rre vbe emwi ne u ru hia, ọ gha vbe gha ma ruẹn odẹ ne ọ kere.

Aizaia 50:2

“Vbọzẹ ne avbe emwa mwẹ ma na zẹ yọ yi vbe I yo ya miẹn iran fan? Vbọzẹ ne iran ma na khuẹnniẹn vbe I tie iran? Mẹ ma wegbe sẹ ne ọ gha miẹn iran fan ra? Mẹ gha sẹtin ye ẹmwẹ unu mwẹ si okun ka I ghi Vbe ye avbe ẹzẹ khian ato sẹrriọ wẹ avbe ehẹn ni rrọọ ghi wulo rhunmwuda iran ma miẹn amẹ.

Aizaia 59:1

Wa ghẹ gha ro wẹ e Nọyaẹnmwa ma wegbe sẹ ne ọ gha miẹn uwa fan, ra wẹ ọ yin ehọ ẹ i sẹtin họn ugomwẹ ne uwa go gualọ iyobọ.

Jerimaia 8:8

Vbe uwa ra na sẹtin kha hẹ yi ighe wa wan, kevbe wẹ wa rẹn uhi mwẹ? Ghe avbe ọgbenbe ne ẹ i gia mu ẹtin yan, fi avbe uhi nii werriẹ nẹ.

Matiu 13:52

Ọ keghi dọlegbe tama iran wẹẹ, “Ọnii rhie ma wẹ deghẹ ọma emwa Uhi ọkpa do khian ọrhuanegbe vbe uwu Arriọba ẹrinmwi, rẹn ghi do yevbe ọdafẹn nọyan owa, ọ ghi vbe gha viọ emwi ọgbọn kevbe emwi ọwiẹyi ke uwu aza ẹre ladian.”

Matiu 23:2

“Iran ni ma emwa Uhi kevbe avbe Farisi ọre a rẹn ye ni rhan otọ uhi e Mosis.

Matiu 28:20

Wa ma iran ẹre ne iran gha yin zẹ vbene I yi ẹre iyi ne uwa. Wa yerre wẹ I gha gu uwa gha rrọọ vbe ẹghẹ hia rhinrin ya sẹ ufomwẹ agbọn.”

I Kọrinti 1:20

De ehe ne avbe umẹwaẹn ghi ye vbọ khekherriọ ra iran ni rẹn emwi? Ra iran ni guara muan ẹmwẹ vbe agbọn na. Osanobua rhie maa nẹ ighẹ ẹwaẹn agbọn na, ukọnmwẹ nọ.

I Kọrinti 15:1

Etẹn mwẹ, I ho ni dọlegbe ye uwa ẹre rre ighẹ Iyẹn Ne ọ maa ne I kpe orhu ẹre ma uwa, ne uwa vbe rhan obọ miẹn nẹ, kevbe ne iyayi uwa mudia yan gbain.

Diuteronomi 28:1

“A deghẹ wa gele họn ẹmwẹ ne Nọyaẹnmwa Osanobua rua, wa na ya ẹko ata rhie uhi ẹre ne imẹ rhie ne uwa ẹrẹna mwẹ, ọ gha ya uwa kpọlọ sẹẹ avbe okpẹvbo ọvbehe hia ni rre agbọn na.

Diuteronomi 4:5

“I ma uwa uhi nii hia nẹ, zẹ vbene Nọyaẹnmwa Osanobua mwẹ ma mwẹ re. Wa ghi gha ya iran ru emwi vbe otọe nii ne uwa ra ya khọn na ne uwa yin ẹnrẹn.