Ẹzra 6:3 - Edo Bible (E Baibol Ẹdo) Version 1996

³ “Vbe ukpo ne okaro ne ọ la ẹkete, e Sairọs ne ọgbaisi keghi wẹ ne a dọlọ Ọgua Osa ne ọ rre Jerusalẹm bọ zẹ vbe ne ehe ne a na zọ ese kevbe ehe ne a na giẹn emwi imu ohan. Ọgua Osa ni ghi gha re ibata ekigbesiyisẹn vbe uyomwẹ kevbe ibata ekigbesiyisẹn vbe uvbẹmwẹ.

Ẹzra 6:3 ပူးပေါင်းရင်းမြစ်များ

II Krọnikol 2:3

E Solomọn keghi gie ne a tama e Hiram ne ọba e Taia wẹẹ, “Vbe gha do ẹki gun mwẹ zẹ vbene u vbe gha do ẹki gie erha mwẹ ighẹ e Devid ne ọba vbe ẹghẹ ne u na khiẹnnẹ igẹdu e sida ne ẹẹn ne ọ ya bọ ẹguae ẹre.

II Krọnikol 2:6

Vbe ne ẹmwata, ọmwa ne ọ gha sẹtin bọ Ọgua Osa ne Osanobua i rrọọ rhunmwuda, vbene ẹrinmwi kpọlọ sẹ nii, ẹ i gua ẹe. Rhunmwuda ọnii, vbe imẹ ghẹ ghi na sẹtin bọ emwi ne ọ gberra Ọgua Osa ne a na giẹn eturari ghe Osanobua hẹ?

II Krọnikol 36:22

Vbe ukpo ne okaro ne Sairọs khian ọgbaisi e Pẹsia, e Nọyaẹnmwa keghi ruẹe ne ẹmwẹ ne ọ la unu e Jerimaia ne akhasẹ ta, do sẹ. Ọ keghi rhie ye Sairọs ekhọe ne ọ ta ẹmwẹ na ladian, ne ọ gbẹnnẹ ọẹn ye ebe ne a vbe tie ẹre ladian vbe ehe ne otọ arriọba ẹre sẹe ehe ne ọ rhanmwẹ wẹẹ:

Ẹzra 1:1

Vbe ukpo ne okaro ne Sairọs ya gha re ọgbaisi e Pẹsia, e Nọyaẹnmwa keghi ru ẹe ne ẹmwẹ ne ọ la unu e Jerimaia ne akhasẹ ta do sẹ. Ọ keghi rhie ẹre ye Sairọs ekhọe, ne ọ ta ẹmwẹ na ladian, kevbe ne ọ gbẹnnẹ ọẹn ne a vbe tie ẹre ne emwa hia vbe otọe arriọba ẹre hia wẹẹ,

Ẹzra 1:2

“Ẹmwẹ ne Sairọs ne Ọgbaisi ọghe Pẹsia tae ọ re ọna khin, E Nọyaẹnmwa ne Osanobua ọghe Ẹrinmwi ọre ọ ya mwẹ ru nọ khaemwisẹ yan uhunmwu otọ agbọn hia, ọ kevbe ya ẹe wa iwinna mẹ wẹ ne I bọ Ọgua Osa ne irẹn vbe Jerusalẹm ne ọ rre Juda.

Ẹzra 3:7

Emwa nii keghi zẹ igho ne a ha ne iran ni ya okuta bọ owa kevbe avbe owinna, iran keghi vbe ni evbare kevbe ayọn kevbe ofigbọn oliv, ne a viọ gha rrie Taia kevbe vbe Saidọn, ne a ya dẹlẹ erhan vbe ẹgbo e Lebanọn, kevbe ne a vbe guae la okun gha rrie Jopa. E Sairọs ne ọgbaisi ọghe Pẹsia kue yọ nẹ, a kegha ru avbe emwi na hia.

Ẹzra 6:14

Obọ keghi kẹ avbe ọkaolotu avbe Ju vbe nene Ọgua Osa ne a bọ vbene Hegai kevbe Zẹkaraia ne akhasẹ na gha rhie igiẹdu ne iran. Iran keghi bọ nene Ọgua Osa fo zẹ vbene Osanobua ọghe Izrẹl kevbe Sairọs, Dariọs, kevbe Atakzaziz ne avbe ọgbaisi e Pẹsia tama iran.

Psalm 122:4

Emwana ọ re avbe ẹwae hia dee, avbe ẹwae ivbi Izrẹl, ne iran do kpọnmwẹ e Nọyaẹnmwa zẹ vbene ọ yi ẹre iyi.

Arhie Maan 21:16

Nene ẹvbo kegha re umwọmwẹ vbe igie enenẹ, utanmwẹ kevbe uvbẹmwẹ, odibosa nii keghi ye ọkpọ ne ọ ya mwa emwi mwa ẹvbo nii, ọ kegha re ibiriki arriaisẹn ekesugie (15,000), uvbẹmwẹ ọnrẹn, utanmwẹ ọnrẹn kevbe uyomwẹ ọnrẹn kegha re ọkpa.