Ẹsta 10:3 - Edo Bible (E Baibol Ẹdo) Version 1996

³ E Modekai kegha re ne ọ zẹ diake ọba Kzakzis tobọ ẹre vbe otọe nii. Avbe Ju ne ihua ẹre kegha ya ọghọ ne ẹẹn, iran kevbe gha ho ẹmwẹ ọnrẹn. Ọ keghi kakabọ gha winna ne umamwẹ ọghe emwa ẹnrẹn kevbe ẹkun ne ọ sotọ ọghe ivbi uniẹn iran vbe ẹdẹ ne ọ dee.

Ẹsta 10:3 ပူးပေါင်းရင်းမြစ်များ

Gẹnẹsis 41:40

I gha mu ẹmwẹ ẹvbo mwẹ yuẹ obọ, emwa mwẹ ghi gha ru vbene u khare. Wẹ ọ re ọ ghi ra gha zẹ lele mwẹ.”

Gẹnẹsis 45:10

U sẹtin tota ye Gosiẹn ehe ne u gha na sikẹ mwẹ. Wẹ kevbe ivbuẹ kevbe avbe eyẹ ruẹ, avbe ohuan ruẹn kevbe ẹwe ruẹ kevbe ẹmila ruẹ kevbe emwi ne u mwẹ hia.

Gẹnẹsis 45:11

U gha rre Gosiẹn, I gha sẹtin gha gbearoghe ruẹ. Ukpo Isẹn ọ ye kẹe ne ukhunmwu ra fi la, mẹ ma ho ne ohanmwẹ gbe uẹ ra ẹgbẹe ruẹ ra emwi ne ọ re ọwuẹ hia.’

II Krọnikol 28:7

Ovbiyokuo ọkpa ne ọ re ovbi Izrẹl, ne a tie eni ẹnrẹn Zikri keghi gbele ovbi Ehaz ne ọba ne a tie ẹre e Maaseia kevbe Azrikam ne ọ gbearoghe ẹguae kevbe Ẹlkana ne ọ gha re ne ọ zẹ diake ọba.

Nehimaia 2:10

Sokpan, e Sanbọlat ne ovbi ẹvbo ne a tie ẹre Bẹt Horọn kevbe Tobaia ne ọ vbe rre asẹ vbe otọ Amọn ghi họn wẹ orhiọnkpa rre ne ọ do ru emwi ne ọ gha ma ivbi Izrẹl egbe, ohu dan kegha mu iran.

Ẹsta 2:5

Okpia ọkpa ne Ju kegha rre Susa, a keghi tie eni ẹnrẹn Modekai, ovbie e Jea, ovbi ẹwae e Bẹnjamin ọ re nọ vbe uniẹn ọghe Kis kevbe Simẹi.

Ẹsta 3:2

Ọba keghi tama avbe irriegie ẹre hia wẹ ne iran gha diguẹ vbokho uhunmwu rriotọ ya gha rhie ọghọ ne ẹẹn. Iran hia keghi gele gha ru vberriọ sokpan e Modekai ne ọ khare wẹ rẹn i ru ẹe.

Daniẹl 5:16

Banbanna nian, a tama mwẹ ighe u sẹtin rẹn otọ emwi ni rhie egbe lẹre, u ghi vbe rhan otọ emwiọkpaodin, u gha sẹtin tie emwi ne a gbẹnnẹ na, u na vbe ta emwi ne a ya ẹe kha, a gha ya ukpọn ododo ne ọba ya kie ugie mu uẹn egbe, u ghi mu emwi urhu uyi ọghe igoru ye urhu, u ghi vbe gha re azukpogieha vbe otọe arriọba na.”

Daniẹl 5:29

Vbe ọwarọkpa nii, e Bẹlsiaza keghi wẹ ne a vbe eguọmwadia ẹre yọ e Daniẹl ẹwu ododo ne ọba ya kie ugie, ne a mu emwiurhu igoru ọghe uyi ye ọre urhu, ọ keghi ya ẹe ru ọzukpogieha vbe otọe arriọba ẹre.

Daniẹl 6:3

Wanwanna, e Daniẹl rhie maa nẹ ighe rẹn guẹ iwinna sẹẹ iran ne eva ni dekẹe ra avbe gọvina nii. Rhunmwuda wẹ a i miẹn egbe irẹn, e Dariọs na zẹẹ ọe vbe iro wẹ rẹn wa mu otọe arriọba nii hia ne ẹẹn gha gbearoghe.

Ebe ne Pọl gbẹẹn gie emwa Rom 10:1

Etẹn mwẹ, ekhọekekhọe ọre I ya tae wẹ, vbe ọ rrọọ nian akpawẹ te a miẹn emwa fan! Erhunmwu ọre I na ghe Osanobua ne iran.

Ebe ne Pọl gbẹẹn gie emwa Rom 14:18

Ọmwaikọmwa ne ọ ye vberriọ ga Jesu miẹn aro ne ọ maa ọghe Osanobua kevbe ne agbọn tu ọma lele.

I Samuẹl 18:16

Sokpan, emwa hia ni rre Izrẹl kevbe Juda kegha ho ẹmwẹ e Devid, rhunmwuda, ọkaolotu ne emwi dunna na ọre nọ.

I Samuẹl 23:17

E Jonatan keghi tama rẹn wẹẹ, “Ghe gie ohan mu ẹẹn, e Sọl ne erha mwẹ i ra sẹtin ru uẹ emwirhọkpa, U gha rriọba vbe Izrẹl, mẹ ghi gha re ne ọ zẹ diake uwẹ zẹ vbene erha mwẹ tobọ ẹre wa vbe rẹn ẹsẹse.”