Emọs 8:14 - Edo Bible (E Baibol Ẹdo) Version 1996

¹⁴ Iran ni vẹn ẹbọ e Sameria, iran ni kha wẹẹ, ‘I vba ẹbọ ne Dan’ ra ‘I vba ẹbọ ne Biẹsiẹba’ iran ni gha dele guọghọ ua, iran i ghi vbe kpao ọvbehe.”

Emọs 8:14 ပူးပေါင်းရင်းမြစ်များ

I Ọba 12:32

E Jeroboam keghi vbe mu emwiukpo ugamwẹ gbọọ ye ikpẹdẹ ekesugie ọghe uki ne ogierẹnrẹn vbe Bẹtẹl zẹ vbene ọ vbe ye vbe Juda, ọ keghi ya zọ ese vbe aka ni rre Bẹtẹl ghe avbe ẹmila igoru ne ọ ru. Ọ keghi viọ avbe ohẹn ne irẹn ma ẹẹn yọ vbe Bẹtẹl.

I Ọba 14:16

E Nọyaẹnmwa ghi fi iyeke gbe Izrẹl, rhunmwuda, e Jeroboam ru orukhọ nẹ, ọ kevbe silo ivbi Izrẹl fi uwu orukhọ.”

I Ọba 16:24

Vbe iyeke ọnii, ọ keghi dẹ oke Sameria ne ọ ha igho esiliva arria-isẹn ehan yi ne okpia ọkpa ne a tie ẹre Siẹma. Ọmri keghi gbe ekẹn ga ẹvbo nii, ọ na gha tie ẹre Sameria ne ọ ya ta e Siẹma ne ọ te ka yan uhunmwu oke ni.

II Ọba 10:29

Sokpan, ọ keghi ye egbe ta orukhọ ne Jeroboam ru, ọmwa ne ọ si ivbi Izrẹl obọ fi ugamwẹ Ẹmila igoru ne ọ mannọẹn viọ gbọ ye Bẹtẹl kevbe Dan.

II Krọnikol 36:16

Sokpan, iran kegha ya emwa ne Osanobua gie ẹre uhunmwu gbogiẹ, iran ma zẹ ye ẹmwẹ ne iran ta, iran na vbe gha giẹ avbe akhasẹ ọre, rhinrin a ke do miẹn wẹ ohu Osanobua ghe emwa rẹn kpọlọ sẹrriọ wẹ, emwi ne a gha ya rhanmwẹ ọẹn re, ẹ i ghi rrọ.

Psalm 140:10

Te ogiọnmwẹ erhẹn ẹyin gha rhurhẹ yan iran, te iran gha dele ye uye, ne iran ghẹ ghi ladian.

Psalm 36:12

Wa do ghe ehe ne emwa dan dele yi, iran rre otọe vbe vba, iran ma sẹtin kpaegbe.

Itan 24:16

Inugba ne ọ khọnrẹn wẹ ne ọmwa ne ọ yin ẹse de, te ọ gha ye kpaegbe; sokpan, ọkhọ ọ re ọ fuẹn ọmwa dan an.

Itan 29:1

Adeghẹ te u wa dọlegbe zevbudu yọ ẹghẹikẹghẹ ne a ya guẹ gui ne a dia ruẹ ye odẹ, ẹdẹ ọkpa, emwi gha degbe uẹ, u i ra vbe miẹn uhunmwu vbọ.

Aizaia 24:20

Agbọn tobọ ẹre ghi gha ya owẹ fi otọ dọn, zẹ vbe Ọdayọn. Ọ ghi gha han yo han rre zẹ vbene irhu ne a gbae ru vbe okpẹhoho a gha hoho. Ihe orukhọ agbọn yẹnyẹn ọẹn mu otọ nẹ, ọ gha de guo, ẹ i ghi vbe kpaegbe ọvbehe.

Aizaia 43:17

Ọ viọ iyokuo ọrhẹnrhẹn la uwu ọfuan ivbiyokuo ikẹkẹ ematọn kevbe ẹsin. Iran dele gbotọ iran i ghi kpaegbe ẹdẹ, a ya ẹhoho dọ ẹre yọ vbene a dọ urhukpa yọ.

Jerimaia 25:27

Ẹre Nọyaẹnmwa na tama mwẹ wẹẹ, “Tama avbe emwa nii wẹ mẹ ne Nọyaẹnmwa ne Oghodua ne Osanobua Izrẹl, mẹ ọ re ọ tama iran wẹ ne iran da rhinrin ọ te do gha gbe iran ne iran gha bi, iran te do dele gbotọ vbe ne iran i ghi na sẹtin kpaegbe ọvbehe, rhunmwuda okuo ne I gie bu iran dee.

Jerimaia 51:64

U ghi vbe kha wẹẹ, ‘Emwi ne ọ ra rruan e Babilọn ọ re ọ na khin ọ gha dinmwi, ẹ i ghi ra vbe dọlegbe laghe odukhunmwu, rhunmwuda ọkhọ ne Nọyaẹnmwa ra gie ẹe do sunu vbe egbe ẹre.’ ” Ẹmwẹ e Jerimaia fo vbe emwa.

Hozia 10:5

Ohan gha mu emwa ni rre ore Sameria, iran ghi vbe gha khiẹ ye ẹmwẹ ẹkhuia ẹmila ne iran ya igoru ma mu ye Bẹtẹl, iran kevbe avbe ohẹn ni gho nene amazẹ gha viẹ ẹsẹse. Iran gha go ugomwẹ eve vbe ẹghẹ ne a gha na bannọ ẹre ose igoru ẹre hẹ kua.

Hozia 13:16

Te a gha rri e Sameria oya ye ne ọ na sọtẹ mwẹ. Emwa rẹn gha wulo ye okuo, a gha viọ avbe emobọ fianmwẹ otọe, a ghi va avbe ikhuohanmwẹ ẹko.”

Hozia 13:2

Te iran ra wa ye gha ru orukhọ khian, vbekpa ne iran gha na gha ye ematọn dunmwu emwi ne iran ra gha gho avbe amazẹ esiliva, ne emwa nagbọn ye ekhọe mwamwa, ne emwa nagbọn ye obọ ru, iran keghi vbe kha wẹẹ, “Wa ya gha zọ ese gie ẹe.” Vbe emwa gu ye unu soso avbe amazẹ vberriọ unu yi, avbe amazẹ ni ye vbe ẹkhuia ẹmila.

Hozia 4:15

“A gha rhe miẹn wẹ wa ne ivbi Izrẹl ma guobọ mwẹ, a i gha miẹn egbọre vbe obọ e Juda. Wa ghẹ ghi ga vbe Bẹtẹl ra Gilgal ra ne uwa ye gha ya eni e Nọyaẹnmwa ne ọ rrọ yan eyan vbe evba.

Emọs 5:1

Wa ne ivbi Izrẹl wa danmwehọ ihuan orinmwi ne I ra so yan uwa:

Emọs 5:2

Izrẹl ne uvbi de guọghọ ua, ẹ i ghi kpaegbe vbe otọ ẹdẹ! A he ẹe ye ehe ne ọ lovbiẹ yi vbe otọ. A ma miẹn ọmwa ne ọ si ẹe kpaegbe.

Emọs 5:5

Wa ghẹ yo ya ga vbe Biẹsiẹba. Wa ghẹ yo ya gualọ mwẹ vbe Bẹtẹl, e Bẹtẹl gha la ọrhiae rrie. Wa ghẹ ye Gilgal, a mu emwa ni rrọ uhunmwu da iwe nẹ.”

Maika 1:5

Ena hia gha sunu rhunmwuda ivbi Izrẹl ru orukhọ nẹ, iran keghi vbe sọtẹ ghe Osanobua. De ọmwa ne a gha lẹ isọtẹ ivbi Izrẹl ginna ẹre obọ yi? E Sameria ne igiogbẹ ẹvbo nii tobọ ẹre! De ọmwa ne ọ rri abe ẹbọ ne a gho vbe Juda yi? E Jerusalẹm tobọ ẹre nọ ra!

Zẹfanaia 1:5

I gha fuẹn ọnrẹn uan ighe ọmwaikọmwa ne ọ hin ẹrhunrhun owa ya gha ga owẹn, uki ra orhọnmwẹ. I gha vbe fuẹn iran ni ga mwẹ, iran na vbe gha ya eni mwẹ vẹn ihen zẹ vbe ọmwa ne ọ mudia ẹse, sokpan, iran ghi vbe gha ya eni e Milkọm ne ẹbọ vẹn ihẹn.

Iwinna 18:25

Avbe ma ẹre emwi vbe ekpa Nọyaẹnmwa, ọ keghi wa gha ya egbesasamwẹ kpe orhu, ọ na vbe gha ma emwa emwi ne ọ gbae vbekpa ẹmwata ne ọ rre ẹmwẹ Jesu. Sokpan isamẹ ọghe Jọn ọkpa ọre ọ rẹnrẹn.

Iwinna 19:23

Ẹghẹ na zẹẹ, ẹmwẹ nọkhua na sa vbe Ẹfisọs rhunmwuda odẹ Nọyaẹnmwa.

Iwinna 19:9

Sokpan eso vbe uwu iran keghi ze utun vbe ehọ, iran ma yayi, iran kegha filo unu gie Odẹ ọghe Nọyaẹnmwa sirra emwa nii hia. Pọl keghi rhunmwuda ọnii sẹ iran rae, ọna viọ avbe erhuanegbe nii, ọ kegha ma emwa emwi ẹdẹgbegbe vbe owa iruẹmwi ọghe Tiranọs.

Iwinna 24:14

Emwi ne ọ miẹn khama ruẹn ọna khin wẹẹ: Odẹ ne iran khare ighẹ ohoghe nọ ọre I la ga Osanobua avbe erha mwa odede. Sokpan I vbe ya emwi hia ne a gbẹnnẹ ye Uhi e Mosis kevbe ebe avbe akhasẹ yi.

Iwinna 9:2

Ọ na ya miẹn ẹre ebe ọghe rẹn ọna khin, ne ọ rhie mwẹ gha rrie Ọgua ediọn avbe Ju ni rre Damaskọs wẹ, rẹn gha miẹn emwa ni lele odẹ ọghe Nọyaẹnmwa vbe odọ, ne ọ sẹtin munọ ehia, ikpia kevbe ikhuo nọ viọ iran gha di e Jerusalẹm.

Diuteronomi 33:11

E Nọyaẹnmwa gie ẹwae iran gha wan yọ vbe iwegbe, gie emwi ne iran ru gha yẹ ruẹ, dunmwu eghian iran hia, ne iran ghẹ ghi guakpao ọvbehe.”

Diuteronomi 9:21

I keghi mu emwi orukhọ ne uwa ru nii ighẹ ẹkhuia ẹmila nii, I na fi ẹe fi uwu erhẹn. Iyeke ọnii, I keghi bunnọ ẹre ukhiọnmwẹ, I na lọ ẹe rẹnhunrẹnhun, I na rhurhu ne rẹnhunrẹnhun ni ku uwu ẹzẹ ne ọ lẹ ghe ototọ oke.