Etẹ ọ re avbe ọkaolotu ruẹ khin, kevbe avbe ọse avbe oyi, ẹghẹ hia ọ re iran ya miẹn emwa emwi ihaoko kevbe igho odieke. Iran i guan ne avbe ne ẹ i mwẹ erha vbe iko ẹzọ, erriọ iran i vbe zẹye avbe ẹgbẹ re vbe iran a do gui ma iran.
Ọghe uwa fo nẹ! Wa ni tie emwi dan emwi esi, kevbe emwi esi, emwi dan. Wa fi ebiebi werriẹ khian uwanmwẹ, wa keghi fi uwanmwẹ werriẹ khian ebiebi! Wa ya emwi ne ọ rriara khian ne ọ rhiẹnrhiẹn, wa keghi ya ne ọ rhiẹnrhiẹn khian ne ọ rriara.
Izrẹl ọrọre ogba azara ọghe Nọyan ne Oghodua; emwa e Juda ọrọre azara ne ọ kọ yọ. Rẹn te rhie aro yọ ne iran gha ru emwi ne ọ maa, sokpan, iran kegha do izigha. Rẹn te rhie aro yọ ne iran gha ru emwi ne ọ gbae, sokpan, emwa ne obọ iran vbare kegha tu wẹ ne a bu ohiẹn ẹmwata.
“Sokpan, a deghẹ ọmwa esi dobọ emwi esi ne ọ ru yi, ọ na suẹn ya gha ru emwi osọnnọ dan ne avbe emwa dan ru, ọ gha miẹn uhunmwu ra? Hiehiere! A i ghi ye avbe emwi esi ne ọ te ka ru rhọkpa rre. Ọ gha wu ye a i ta ẹmwata kevbe orukhọ ẹre.
Adeghẹ ọmwa esiesi suẹn gha ru orukhọ, I na rhie ẹre uhunmwu da ẹbe, ọ gha wu adeghẹ wẹ ma tama rẹn khẹ ọ dee. Ọ gha wu rhunmwuda orukhọ ẹre, mẹ i ra vbe ye emwi esi ne ọ te ka gha ru rre, I gha lẹ uwu ẹre ginna ruẹn obọ.
Ẹmwẹ akuọkan ọ re iran ta ladian vbe unu, iran ghi vbe gha yan eyan ifianyanegbe kevbe ebe ne ẹ i mwẹ esa ne a gha rhie obọ yi. Ohiẹn ẹmwata gele khian ohiẹn ne ẹ i re ẹmwata nẹ nian, ọ gha wan khian zẹ vbe ne irunmwu eruan ye vbe otọ ne a mu ugbo yi.
Ẹsin vbe gbe ọkuẹkuẹ vbe uhunmwu okuta ra? Avbe ya ẹmila vulo otọ vbe amẹ okun ra? Sevba, wa ye ohiẹn ẹmwata khian eruan, wa keghi vbe ya ne ọgbae khian ne ọ magba.
Te uhi ye mitan mitan, ẹ i vbe mwẹ esa, a i vbe bu ohiẹn ẹmwata. Emwa dan ghi gha rria ase emwa ẹmwata, rhunmwuda ọnii, te ohiẹn ghi khian ne a khiẹn bu.
Wa ghẹ gie a miẹn wẹ, ọ re okpia nọ ra okhuo nọ, ẹgbẹe ra ẹwae ni rre emwa ẹrẹna, fiwerriẹ hin ehe ne Nọyaẹnmwa Osanobua mwa ye rre, ne iran ya gha ga ẹbọ ẹvbo ọvbehe. Te ọnii ra gha yevbe inian ne ọ zọ ladian do khian erhan ne ọ rriara kevbe ne obi ye.