Emọs 5:11 - Edo Bible (E Baibol Ẹdo) Version 1996

¹¹ Wa wọ avbe ivbiogue uhunmwu, wa keghi vbe do iran ọka viọ. Rhunmwuda ọnii, wa i yin owa okuta ne mose mose ne uwa bọlọe, ra na uwa da ayọn ne ọ ke ugbo azara ne uwa gbe rre.

Emọs 5:11 ပူးပေါင်းရင်းမြစ်များ

Job 20:19

rhunmwuda ne ọ na yan gbe iran ọ na vbe gha zẹ ivbiogue kpokpo ọ na ya iwegbe mu owa ne ọmwa ọvbehe bọe.

Aizaia 16:10

Orhiọnkpa ne ẹko maa ighi rrọ nian vbe otọe ne ọ maa emwiokọ nii. A i ghi miẹn ọmwa ne ọ wee ra ne ọ gha so ihuan vbe ogba azara. A i ghi miẹn ọmwa ne ọ minọ alimo ya ru ayọn, uwemwẹ oghọghọ sẹẹ ufomwẹ.

Ezikiẹl 26:12

Iran ne eghian ruẹn gha tobọ iran viọ emwi ne u mwẹ kevbe atẹ ruẹ. Iran gha guọghọ ekẹn ẹvbo ruẹ gbotọ, iran ghi vbe zanzan avbe owa ẹfe kpọkua ne uwa bọlọe. Iran gha viọ avbe okuta kevbe erhan kevbe iku ni rrọ, iran ghi filo ehia ku uwu okun.

Ezikiẹl 34:21

Wa sua iran ni khuọnmwi vbọ ghe okhiẹ, wa na ya igho so iran hin uwu oghẹn rre.

Hozia 9:2

Sokpan, vbe ọ ma he kpee wan, wa i ra gha mwẹ ọka sẹẹ ra ofigbọn oliv, ayọn i ra vbe gha rrọọ.

Levitikọs 26:16

I gha rri uwa oya. I gha si ọkhọ yan uwa uhunmwu, emianmwẹ ni i mwẹ ukhunmwu kevbe emwirraro ne ọ gha rhu uwa aro, kevbe ne ọ gha ya uwa gha rri ororo. Wa gha kọ emwiokọ uwa sokpan ẹ i ra ma ne uwa rhunmwuda eghian uwa gha khọn miẹn uwa otọ, iran ghi rri emwi ne uwa kọ ẹe.

Emọs 2:6

E Nọyaẹnmwa khare wẹẹ, “Te ivbi Izrẹl wa gha ru orukhọ yan egbe yan egbe, rhunmwuda ọnii, I gha wa rria iran ikhi ye emwi na. Iran khiẹnnẹ iran eviẹn ighẹ emwa ẹmwata ni ma sẹtin ha osa ne iran re, avbe ivbiogue ne ẹ i ra miẹn igho ya ha osa ibata e esanda.

Emọs 2:7

Iran ye owẹ rrilo ovbiogue kevbe ne ẹ i mwẹ ginna otọ, iran keghi vbe sua ovbiogue hin urodẹ rre. Ọmọ kevbe erha ẹe ghi gha gu ọmọ okhuo ọviẹn ọkpa ru emwi, iran na la ekpa ọnii ya iruẹn ye eni mwẹ nọhuanrẹn.

Emọs 3:15

I gha dunmwu avbe owa ne a bọ ẹre ọghe okhuakhua kevbe ọghe owowo kua; avbe owa ne a ye akọn eni tee gha rẹnkhẹn uan, a gha dunmwu dọmwadẹ owa nekhua hia a.”

Emọs 3:9

Wa tama iran ni rre ẹguae vbe Igipt kevbe Asdọd wẹẹ: “Wa ya si egbe koko ye oke ni rre ọkpẹn e Sameria ne uwa ya ghe otighi kevbe emwi dan ne iran ru vbe evba.”

Emọs 4:1

Wa danmwehọ ẹmwẹ na, wa ne ikhuo e Sameria, ni ti ye egbe vbe ẹmila ne a koko vbe Basian, ni ru emwa ni ma wegbe khọ, ni wọ avbe ivbiogue uhunmwu, ni nọ wẹ ne avbe ọdafẹn iran gha dẹ ayọn gie iran.

Emọs 6:11

E Nọyaẹnmwa ghẹghi taa ẹe nẹ, owa nekhua kevbe ne giere, te a ra rẹnkhẹn ehia a.

Emọs 6:12

Ẹsin vbe gbe ọkuẹkuẹ vbe uhunmwu okuta ra? Avbe ya ẹmila vulo otọ vbe amẹ okun ra? Sevba, wa ye ohiẹn ẹmwata khian eruan, wa keghi vbe ya ne ọgbae khian ne ọ magba.

Emọs 8:4

Wa danmwehọ ẹmwẹ na, wa ni ya owẹ rrilo ne ẹ i mwẹ ginna otọ, ne uwa na vbe ho ne uwa fuẹn avbe ivbiogue ni rre ẹvbo hinrre.

Emọs 9:14

I gha viọ emwa mwẹ werriegbe gha die otọ iran, iran gha dọlọ ẹvbo iran ne ọ te guọghọ ua bọ. Iran ghi di ẹe ya. Iran gha gbe ugbo azara iran ghi da ayọn ẹnrẹn. Iran gha mu ugbo, iran ghi rhọ emwi ne iran kọe.

Maika 1:6

Rhunmwuda ọnii e Nọyaẹnmwa khare wẹẹ, “I gha ye Sameria khian itowa ne ọ vbiolo yan egbe vbe otọ oha, ehe ne a gha kọ alimo ayọn yi. I gha kpolo ẹvbo nii zẹ vbe iku ku uwu iya, I gha vbe gie agbọn miẹn ẹyotọ ẹre.

Maika 2:2

Iran gha gualọ ako oha, iran ghi ya ẹtin vbe iwegbe mu ẹẹn, iran gha gualọ owa, iran ghi mu ẹẹn. Ẹgbẹe ọmwa ra ẹfe ọmwa ne egbe rọkhọ ẹe ẹ i ghi rrọọ.

Maika 6:15

“Wa gha kọ emwi, sokpan, wa i ra rhọ, wa gha minọ ofigbọn oliv, sokpan, wa i ra lo iran, wa gha ru ayọn, sokpan, wa i ra da ẹe.

Zẹfanaia 1:13

Emwa gha fu iran emwi viọ, a gha dunmwu owa iran an. Iran i yin owa ne iran bọlọe ra ne iran da ayọn vbe ọghe ugbo azara ne iran gbee.”

Hagai 1:6

Wa kọ ọka ọrhẹnrhẹn, sokpan ekherhe wa miẹn fian. Wa miẹn evbare gha re sokpan ẹ i vuọn uwa ẹko. Wa miẹn ayọn gha da, sokpan ọ ma sẹ ọkẹn sẹ ne ọ gha gbe uwa. Wa mwẹ ukpọn, sokpan, ẹ i gbe uwa oni. Ọmwa ne ọ winna, igho ne ọ miẹn i sẹ ọe ya koko egbe.

Malakai 1:4

Adeghẹ emwa Idọm ne ivbi uniẹn Isọ ghi vbe kha wẹẹ, “A guọghọ ima ẹvbo rua, sokpan, ma gha dọlegbe họlọ iran,” ẹghẹ nii, e Nọyaẹnmwa ghi vbe wanniẹn wẹẹ, “Gie iran dọlọ ẹe bọ, I gha dọlegbe dunmwu ẹẹn sẹ otọ. Emwa ghi gha tie iran ‘Ẹvbo dan’ kevbe ‘Uhunmwu ẹvbo ne ohu ẹre mu e Nọyaẹnmwa ẹdẹdẹmwẹdẹ.’ ”

Diuteronomi 28:30

“A gha ya ọmọ ne uwa sokpan ọmwa ọvbehe ghi mu ẹẹn ya gha, wa gha bọ owa, sokpan wa i ra yin ẹnrẹn. Wa gha kọ emwiokọ, sokpan, wa i ra rhọ ẹre.

Jems 2:6

Sokpan, wa i ya ọghọ ne ivbiogue! De emwa ni zẹ uwa owẹ yi, ni vbe silo uwa gie enibuohiẹn? Ẹ i re iran ni fee nọ.