Emọs 4:10 - Edo Bible (E Baibol Ẹdo) Version 1996

¹⁰ “I gie egboghogbogho yan uwa zẹ vbe ne I giee ẹe rrie Igipt. I gbele igbama uwa vbe okuo, I keghi viọ uwa ẹsin kpao. I ye ẹwia orinmwi khiọ uwa ihue vbe agọ uwa. Sevba, wa ma ye bu mwẹ rre.

Emọs 4:10 ပူးပေါင်းရင်းမြစ်များ

II Ọba 10:32

Vbe uwu ẹghẹ na, e Nọyaẹnmwa keghi hẹko gha giagia hin otọ Izrẹl rre. E Hazaẹl ne ọba Siria keghi khọn munọ otọ Izrẹl hia ni rre

II Ọba 13:3

Ẹre ohu Izrẹl na mu e Nọyaẹnmwa, ọ na gie Hazaẹl ne ọba e Siria kevbe Benhadad ne ovbi ẹre gha khọn miẹn Izrẹl otọ yan egbe.

II Ọba 13:7

E Jehoahaz ma ghi gha mwẹ emwi igbinna gberra arhin ekigbesiyeha ni hin ẹsin, ikẹkẹ okuo igbe, kevbe arhin arriaisẹn igbe (10,000) ni ye owẹ khian, rhunmwuda, ọba e Siria dunmwu enekpa a, ọ na gha ya owẹ rrilo iran ginna otọ zẹ vbe ekẹn.

II Ọba 8:12

E Hazaẹl keghi nọ rẹn wẹẹ, “Vbọzẹ ne u na viẹ yi enọwanrẹn?” Elaisia keghi wanniẹn wẹẹ, “Rhunmwuda, I miẹn emwi ne ọ wegbe ne u ra ru ivbi Izrẹl re. U gha rhu erhẹn ye owa ọkhẹ iran, u ghi rẹnkhẹn nii maa sẹẹ vbe igbama iran, u ghi dunmwu ivbi iran an, u ghi vbe wọlọ akpa hin ẹko ikhuohanmwẹ rre.”

Ẹksọdọs 10:27

E Nọyaẹnmwa kevbe ya ọba yin ehọ, ọ ma vbe gie iran kpao.

Ẹksọdọs 10:3

Ẹre Mosis kevbe Errọn na bu ọba, iran ke tama rẹn wẹẹ, “Vbe nian ọre Nọyaẹnmwa ne Osanobua ivbi e Hibru khare, ‘De ẹghẹ ne uwa gha fieghe uhunmwu ye ẹmwẹ ne I khama uwa la? Gie emwa mwẹ kpao ne iran ya ga mwẹ.

Ẹksọdọs 14:4

Mẹ gha gie ọba Igipt yin ehọ, ọ ghi zẹ iran khu, vbe ne obọ mwẹ nọ gha ke ukhunmwu ne ọba Igipt kevbe ivbi iyokuo ẹre, gha na rhie uyi gunmwe. Ivbi Igipt gha rẹn wẹ mẹ ọrọre Nọyaẹnmwa.” Ivbi Izrẹl keghi ru vbene a khama iran.

Ẹksọdọs 15:26

Ọ keghi kha wẹẹ, “A deghẹ wa họn ẹmwẹ mwẹ, mẹ ne Osanobua rua, ne uwa gha ru emwi ne imẹ ye obọ yi ne uwa gha ye uhi mwẹ rre, ne uwa vbe gha rhie uhi mwẹ hia mwẹ, mẹ i ra ye avbe emianmwẹ ne I mu yan ivbi Igipt rhọkpa rri uwa oya. Mẹ ọrọre Nọyaẹnmwa ne ọ mu uwẹ egbe rran.”

Ẹksọdọs 8:19

Avbe ọbo edunna keghi tama ọba wẹẹ, “Osanobua ọre ọ ru emwi na!” Sokpan ọba keghi yin ehọ, ọ ma zẹ ye Mosis kevbe Errọn re zẹ vbene Nọyaẹnmwa kha re.

Ẹksọdọs 9:12

Sokpan, e Nọyaẹnmwa keghi ya ọba ze vbe udu, ọ ma zẹ ye Mosis kevbe Errọn re zẹ vbene Nọyaẹnmwa khare zẹẹ.

Ẹksọdọs 9:17

Sevba te u ye hio ku emwa mwẹ, u ma gie iran kpao.

Aizaia 34:3

Aira tọnnọ ikun iran yotọ, sokpan te ehia ra gha rre evba, iran ghi gha kẹkẹ ua, iran ghi gha wia, avbe uhunmwu oke ghi gha baa ne esagiẹn.

Aizaia 50:11

Wa hia ni si uma ne uwa fuẹn ẹrrẹe rua uma ne uwa si nii ọ re ọ ra fuẹn uwa a. E Nọyaẹnmwa tobọ ẹre ọ re ọ ra gie ẹe gha ye vberriọ ọkhọ ne ọ wegbe ọ re ọ ra rruan uwa.

Aizaia 9:12

E Siria vbe odẹ ahọ kevbe Filistia vbe odẹ orrie, rhan unu yotọ ne iran minọ Izrẹl re. Ọ rhe ye vberriọ, ohu e Nọyaẹnmwa ma he ye fo. Te ọ ye niẹn obọ ẹre ladian ne ọ rri iran oya.

Aizaia 9:13

Ivbi Izrẹl ma he ye fiwerriẹ, a gha rhe miẹn wẹ e Nọyaẹnmwa ne Oghodua rria iran ikhi nẹ, iran ma he ye werriegbe bu ẹre rre.

Aizaia 9:17

Rhunmwuda ọnii, e Nọyaẹnmwa I ra gie ọkpa lẹfe vbe uwu avbe igbama ni rrọọ, ẹ i ra vbe tohan avbe ẹgbẹ kevbe emọ ne ẹ i mwẹ erha, rhunmwuda emwa dan ne emwa dan ọ re avbe emwa nii hia wa khin, ẹmwẹ ne iran ta hia, ọkhọ ọ re ehia khin. Ọ rhe ye vberriọ, ohu e Nọyaẹnmwa i he ye fo, te obọ ẹre gha ye niẹn ladian ne ọ rria ikhi.

Jerimaia 11:22

Rhunmwuda ọnii, e Nọyaẹnmwa ne Oghodua ke kha wẹẹ, “I gha rri iran oya! A gha gbele avbe igbama iran vbe okuo; ohanmwẹ gha gbele ivbi iran an.

Jerimaia 15:3

“Mẹ ne Nọyaẹnmwa ta ẹe nẹ wẹ emwi ohan enẹ ọ re ọ ra rruan iran; a gha gbele iran vbe okuo, ekita gha silo ikun iran gha rrie, ahianmwẹ gha rri iran, aranmwẹ oha ghi rhie ni ghi kẹe.

Jerimaia 16:4

Emianmwẹ ne ọ mu ohan ọ re ọ ra gbele iran, a i vbe miẹn ọmwa ne ọ ra khiẹ ra ne ọ ra re iran. Ikun iran gha lele otọ zẹ vbe emwi ne a ya kọ emwiokọ ne ọ na kakabọ maa, a gha gbele iran vbe okuo ra ohanmwẹ gha gbele iran an, ikun iran gha khian evbare ne avbe ahianmwẹ kevbe aranmwẹ oha.

Jerimaia 18:21

Sokpan, banbanna nian Nọyaẹnmwa gie ohan gbele ivbi iran an, gie okuo gbele iran. Gie ọdọ wulo avbe ikhuo ni rrọọ, kevbe emọ. Gie emianmwẹ gbele avbe ikpia ni rrọọ, ne avbe igbama ni rrọọ wulo ye okuo.

Jerimaia 48:15

A fuẹn Moab kevbe avbe okpẹvbo ni rrọ ua nẹ a gbele avbe igbama ni mose ni rrọ ua. Mẹ ọrọre ọba, e Nọyaẹnmwa ne Oghodua, I vbe guaan nẹ.”

Jerimaia 49:26

Ọ gha sẹ ẹdẹ ne ẹdẹrriọ, a gha gbele avbe igbama ye adesẹ ore ẹvbo, a ghi fuẹn avbe ivbiyokuo ẹre hia a.

Jerimaia 5:3

Vbe ẹmwata, emwi ne Nọyaẹnmwa gualọ ọrọre ayekhọe ga. Ọ fi uwa emwi sokpan wa ma zẹ yọ, ọ rẹnkhẹẹn uwa, sokpan, wa ma ye mwẹ ẹwaẹn wa keghi yin ehọ, wa ma vbe zobọ vbe orukhọ ne uwa ru.

Jerimaia 6:11

Ohu iran ne ọ mu ẹẹn wa vbe giẹn vbe erhẹn vbe uwu ime, Nọyaẹnmwa, I i ghi sẹtin zin ẹnrẹn ọvbehe.” Ẹre Nọyaẹnmwa na tama mwẹ wẹẹ, “Hihiẹ ohu mwẹ yan avbe ibiẹka vbe adesẹ ore, kevbe ye ehe ne avbe igbama na si koko. A gha viọ avbe ọdọ kevbe avbe amwẹ kpao, a i ra vbe sẹ avbe ọmaẹn rae.

Jerimaia 9:22

Ikun orinmwi wa tagha lele ehe hia zẹ vbe emwi ne ọ ya otọ khian nọmaa emwiokọ nibun, zẹ vbe ọka ne iran ni rhọ emwiokọ giagia nẹ, iran na sẹ ọe rae, avbe ọka ne ọmwa rhọkpa ma viọ. Ẹmwẹ ne Nọyaẹnmwa wẹ ne I ta ọ re ọnii khin.”

Hozia 11:5

“Iran he ne iran werriegbe bu mwẹ gha dee, rhunmwuda ọnii, Igipt iran gha werriegbe gha rrie, Asiria gha vbe gha khaemwisẹ yan iran.

Joẹl 2:20

I gha khulo avbe oghẹn irhiso kua, iran ni te ke odẹ okuọ rre, I gha khulo eso vbọ la uwu ato. I gha khulo iran ni ke odaro, la uwu Okun Nọwu, iran ni ke iyeke, gha la uwu e Meditẹrrenian. Ikun iran ghi gha wia. I gha fuẹn iran an, rhunmwuda emwi hia ne iran ru uwa ẹre.

Levitikọs 26:16

I gha rri uwa oya. I gha si ọkhọ yan uwa uhunmwu, emianmwẹ ni i mwẹ ukhunmwu kevbe emwirraro ne ọ gha rhu uwa aro, kevbe ne ọ gha ya uwa gha rri ororo. Wa gha kọ emwiokọ uwa sokpan ẹ i ra ma ne uwa rhunmwuda eghian uwa gha khọn miẹn uwa otọ, iran ghi rri emwi ne uwa kọ ẹe.

Levitikọs 26:25

I ghi si okuo yi uwa egbe ne I ya rri uwa oya ye ne uwa na rhie obọ gberra ile ne ima gba ta, wa na ya si egbe koko ye ẹvbo uwa ne obọ ghẹ vba uwa, I ghi gie emianmwẹ nẹ i mwẹ ukhunmwu gie uwa, ẹ i re aro sẹẹnrẹn wa gha ya de ye igue vbe odaro avbe eghian uwa.

Emọs 4:6

“Mẹ ọ re ọ ru ẹe ne ohanmwẹ na fi la otọe uwa hia, sevba wa ma dọlegbe bu mwẹ rre.

Emọs 8:3

Vbe ẹdẹ ne ẹdẹrriọ, egbọ ne a te viọ vbe uwu ẹguae gha khian utumwẹ akhiẹ. Ikun orinmwi gha gba ehehia. A ghi ya gha la iran kua vbene a i na vbe ta ẹmwẹ ọkpa.”

Hagai 2:17

I gie ẹhoho kevbe owowo ne ọ giẹn emwi uan ne ọ do rhia emwi ne uwa te kọ hian a, sokpan, wa ma ye ro iro fi uyinmwẹ werriẹ.

Diuteronomi 28:21

Ọ ghi gha gie emianmwẹ rre do gha vba emianmwẹ vbe egbe uwa a te do miẹn wẹ ọkpa ma ghi ke ẹe vbe uwu uwa vbe otọe ne uwa ra yin na.

Diuteronomi 28:22

E Nọyaẹnmwa ghi tue emianmwẹ ne ọ ke egbe ẹmwẹ ọkpa la egbe ọmwa ọvbehe ku uwa kevbe egbe ne ọ hinmwian kevbe ọnii, ọ gha ru ẹe ne amẹ ghẹ rhọ ọ ka uwa hia ghi so hie kevbe irhunrhun, ne ọ ya ẹe fuẹn emwiokọ uwa hia a. Ọfuan na ghi gu uwa gha rrọọ wa te ya wulo.

Diuteronomi 28:60

Ọ ghi dọlegbe tue egbe emianmwẹ dan ne aro uwa ka sẹ vbe Igipt ku uwa, wa i vbe miẹn uhunmwu vbo.

Diuteronomi 7:15

E Nọyaẹnmwa gha degue uwa hin obọ emianmwẹ hia rre. Ẹ i ra gie egbe emianmwẹ dan ne aro uwa sẹ vbe Igipt sẹ ehe ne uwa ye. Sokpan, ọ gha kun ehia yan avbe eghian uwa.