Emọs 4:1 - Edo Bible (E Baibol Ẹdo) Version 1996

¹ Wa danmwehọ ẹmwẹ na, wa ne ikhuo e Sameria, ni ti ye egbe vbe ẹmila ne a koko vbe Basian, ni ru emwa ni ma wegbe khọ, ni wọ avbe ivbiogue uhunmwu, ni nọ wẹ ne avbe ọdafẹn iran gha dẹ ayọn gie iran.

Emọs 4:1 ပူးပေါင်းရင်းမြစ်များ

I Ọba 16:24

Vbe iyeke ọnii, ọ keghi dẹ oke Sameria ne ọ ha igho esiliva arria-isẹn ehan yi ne okpia ọkpa ne a tie ẹre Siẹma. Ọmri keghi gbe ekẹn ga ẹvbo nii, ọ na gha tie ẹre Sameria ne ọ ya ta e Siẹma ne ọ te ka yan uhunmwu oke ni.

Job 20:19

rhunmwuda ne ọ na yan gbe iran ọ na vbe gha zẹ ivbiogue kpokpo ọ na ya iwegbe mu owa ne ọmwa ọvbehe bọe.

Job 24:4

Iran i giẹ emwi ne ọ khẹ ke ovbiogue sẹ ọre obọ. Iran ghi khu e ne ẹ i mwẹ ne ọ ya lẹre.

Psalm 12:5

Sokpan, e Nọyaẹnmwa khare wẹẹ, “Eban nian, mẹ dee, rhunmwuda, a zẹ iran ne ẹi mwẹ kpokpo. Iran ne a zẹ kpokpo gha viẹ eve obalọ. I gha do ru ẹe ne ẹkun sẹ iran otọ, ne egbe rọkhọ iran zẹ vbe ne iran ho.”

Psalm 140:12

E Nọyaẹnmwa, mẹ rẹnrẹn wẹ, wẹ ọ re ọ mu ẹzọ ovbiogue gui, kevbe emwi ne ọ khẹke ne ẹ i mwẹ.

Psalm 22:12

Eghian nibun lẹga mwẹ zẹvbe ẹkhuia ẹmila. Iran hia wa lẹga mwẹ zẹvbe ẹkhuia ẹmila ne ọ khọ, ne a miẹn vbe otọe Basian.

Itan 22:7

Avbe ivbiogue ọrọre eviẹn enife. Mọmọ igho, ọviẹn ọmwa ne u mọmọ ẹre igho ọre u khian.

Asan-Ibo 4:1

I keghi vbe dọlegbe do ghe avbe emwi hia ni sunu ne ẹ i la ihe vbe agbọn, iran ne a zẹ kpokpo gha viẹ egbe, sokpan a i miẹn ne ọ ru iyobọ ne iran. A i miẹn ne ọ ru iyobọ ne iran rhunmwuda obọ ọghe iran ni zẹ iran kpokpo, ọ re ẹtin khua ghe.

Asan-Ibo 5:8

Ghẹ giee yan uwe unu uan adeghẹ arriọba kpokpo ovbiogue, ighe ọ ma vbe gie a bu ohiẹn ẹmwata ne iran, ra ne a rhie emwi ne ọ khẹke iran ne iran. Dọmwadẹ ọmwa iwinna, ọmwa ne irẹn rre ototọ ẹre, ọ re ọ sinmwi ne ẹẹn, ọmwa ne ukpo ẹre ghi vbe yo sẹẹ ọ re ọ sinmwi ne iran eveva.

Aizaia 28:1

Arriọba Izrẹl khian rhie nẹ! O Uyi ẹre hia fafaa zẹvbe ẹde obobo vbe uhunmwu avbe ọkaolotu ẹre ni da ayọn gbe egbe. A te wa ya ori ne ọ winhin wo iran uhunmwu, sokpan, ya ghe vbe ehia lovbiẹ lele otọ, ayọn gbele iran kua.

Aizaia 5:8

Ọghe uwa fo nẹ! Wa gha dẹlẹ owa ọvbehe kevbe ugbo ọvbehe, ne uwa viọ ba ne uwa ka mwẹ. Ẹ i ghi rre gbe ban, emwa ọvbehe i ghi miẹn ehe dia, wa ọkpa ọ re ọ ghi ra gha rre otọe nii.

Aizaia 56:12

‘Wa rhie ayọn rre, ne a da ehia ne ọ sẹ ima obọ! Ẹdẹ nakhuẹ gha maa sẹ ẹdẹnẹrẹ na!’ ”

Aizaia 58:6

“Egbe aguẹ ne imẹ ho ọ re ọna khin; wa viọ eghan ne a ya wọ emwa uhunmwu, kevbe urọnghọn aita ẹmwata kua, ne uwa gie iran ne a wọ ẹre uhunmwu gha rrie kẹkan.

Jerimaia 50:11

E Nọyaẹnmwa khare wẹẹ, “Wa ne ivbi e Babilọn, wa ọ re ọ ya khọn ẹvbo mwẹ. Wa ghọghọ nian, ẹko wa vbe rhiẹnrhiẹn uwa, wa gha hẹ yo hẹ rre vbe ẹmila ne ọ wiẹn ọka ra ẹsin ne ọ ra mu.

Jerimaia 50:27

Wa gbele ivbiyokuo iran hia a! Wa rẹnkhẹn iran! Ọghe ivbi e Babilọn fo vbotọ! Ẹghẹ sẹ nẹ ne a gha ya rri iran oya!”

Jerimaia 51:34

Ọba e Babilọn giagia e Jerusalẹm, ọ na rrii ọe ọ ke tue ẹvbo nii kua fo zẹ vbe esago. Ọ keghi mi ẹn re, zẹ vbe ugbogiorinmwi ọ viọ avbe emwi ni yẹ ọre vbọ ọ na viọ ni dekẹe kua.

Jerimaia 6:6

E Nọyaẹnmwa ne Oghodua tama avbe ọba nẹ wẹ ne iran gia erhan gbotọ, ne iran ma utete, ne iran miẹn ehe na khọn la Jerusalẹm. Rẹn kha ne wẹẹ, “I gha rria okpẹvbo nii ikhi rhunmwuda a wọ emwa uhunmwu wa rrọọ.

Jerimaia 7:6

Wa ghẹ ghi zẹ ebubẹ ye avbe erriọvbe aro kevbe avbe emọ ni i mwẹ erha kevbe ẹgbẹe. Wa dobọ emwa ni ma rukhọ ne a gbele yi vbe otọe na. Wa dobọ avbe ẹbọ ọvbehe ne uwa ga yi, te ọnii ra miẹn uwa uhunmwu.

Ezikiẹl 18:12

Ọ gbe ivbiogue rhu, ọ rha, ọ wa rhie emwi ne ọmwa ne ọ mọmọ ẹre emwi rhie ne ẹẹn dayi. Ọ yo avbe aro ẹbọ iran ni ga ẹbọ, ọ vbe ga avbe ẹbọ osọnnọ.

Ezikiẹl 22:12

Eso vbe uwu avbe emwa uwa de izigha ya miẹn igho. Eso miẹn igho isu vbe ivbi Izrẹl ne ihua iran ne iran rhie igho na, iran ghi do ye ne iran na mu iran vbuẹvbuẹ fe. Iran mianmian mwẹ nẹ. E Nọyaẹnmwa ne Udazi guaan nẹ.

Ezikiẹl 22:27

Avbe ewọe oga ọba yevbe avbe oduma ni wa zanzan aranmwẹ ne iran gbe. Iran de izigha ne iran miẹn ehe na họn ẹfe.

Ezikiẹl 22:29

Iran ni fe rha, iran do oyi. Iran ye obọ dan mu avbe ivbiogue, iran keghi vbe mu avbe orhunmwuyẹn vbuẹvbuẹ.

Ezikiẹl 22:7

“Emwa ni rre avbe okpẹvbo, ne ọ ghi ya ọghọ ne avbe evbibiẹ iran i ghi rrọọ. Wa gbe avbe orhunmwuyẹn rhu, wa keghi mu avbe ẹgbẹe kevbe emọ ne ẹ i mwẹ erha vbuẹvbuẹ.

Ezikiẹl 34:16

“I gha gualọ ni wiri vbọ, I ghi viọ iran ni bibi odẹ vbọ werriegbe rre, I gha gbalọ ẹwẹn iran ni kuan egbe vbọ, I ghi vbe sinmwi iran ni khuọnmwi, sokpan, I gha fuẹn ni ti ye egbe kevbe ni wegbe vbọ hin rre, rhunmwuda, ọsuohuan ne ọ ru emwi ne ọ gbae mẹ khin.

Ezikiẹl 39:18

Te iran khian rri ikun avbe ivbiyokuo, iran ghi vbe wọn esagiẹn iran ni khaemwisẹ, vbe agbọn, iran na hia fẹẹrẹ ne a ra gbele ua zẹ vbe ogho, ra avbe oteghe ohuan ra ẹwe, ra ẹmila ni tii.

Joẹl 3:3

Iran yan uta ya gualọ ọmwa, ne a gha viọ avbe oghunmwu na, iran khiẹnnẹ emọ ikpia kevbe emọ ikhuo ọviẹn, ne iran ya gha ha igho ne avbe igberagia, kevbe ne iran ya gha da ayọn.

Emọs 3:1

Wa ne ivbi Izrẹl, wa danmwehọ uhunmwu na ne Nọyaẹnmwa gie vbe ekpa uwa, emwa uhunmwu ẹvbo ni hia fẹẹrẹ ne Nọyaẹnmwa viọ ke Igipt gha dee:

Emọs 3:3

Arhin eva gha sẹtin gba kpaegbe gha rrie ehe ra vbe ẹ i re te iran ka gba taa ẹe ye otọ nẹ?

Emọs 5:11

Wa wọ avbe ivbiogue uhunmwu, wa keghi vbe do iran ọka viọ. Rhunmwuda ọnii, wa i yin owa okuta ne mose mose ne uwa bọlọe, ra na uwa da ayọn ne ọ ke ugbo azara ne uwa gbe rre.

Emọs 6:1

U miẹn vbe ọ gha ba so uwa hẹ, wa ni wa zẹ ọwọbu vbe Zaiọn, kevbe uwa ni kha wẹ vbe nene ẹbe ke dee, ni rre Sameria, wa ne okpemwa ni rre Izrẹl ne okpẹvbo na, wa ne emwa do gha lẹ vba nọ iyobọ!

Emọs 6:6

Ọkpan nọkhua ọ re uwa ya ru ukpu da ayọn, ori ne ọ ghi winhin sẹẹ ọ re uwa ya wo, sokpan, ọ ma da uwa vbe Izrẹl rẹnkhẹn uan.

Malakai 3:5

E Nọyaẹnmwa ne Oghodua khare wẹẹ, “I gha ladian vbe uwu ẹbu uwa ne I do bu ohiẹn. I gha wa sẹ osẹe gbe iran ni ru e emaziki awan, iran ni ghẹ, iran ni sẹ osẹe ohoghe, iran ni gbe igho emwa ne iran ya winna rhu, iran ni mu avbe ẹgbẹe ru kevbe emọ ne ẹ i mwẹ erha, kevbe avbe erhunmwuyẹn, kevbe iran hia ne ẹ i da mẹ.”

Nọmbas 21:33

Ivbi Izrẹl keghi werriegbe, iran keghi la odẹ Basian, Ọg ne ọba Basian keghi viọ ivbiyokuo ẹre gha dee do gu iran ginna vbe Ẹdrẹi.

Diuteronomi 24:14

“Ghẹ mu ọguọmwadia ne ovbiogue ne u rhie vbe iwinna ru, ọ re ovbi Izrẹl nọ ra avbe orhunmwuyẹn ni rre uwa ẹvbo.

Diuteronomi 28:33

Ẹvbo ẹrrẹe ghi viọ emwiokọ uwa ne uwa miẹn ẹsọn nọkhua yi ya kọ, vbene emwirhọkpa ina sẹ uwa obọ gberra ukpokpo ekugbakẹghẹrẹ kevbe obọ ne ọ tọn ne a ya mu uwa.