Emọs 2:6 - Edo Bible (E Baibol Ẹdo) Version 1996

⁶ E Nọyaẹnmwa khare wẹẹ, “Te ivbi Izrẹl wa gha ru orukhọ yan egbe yan egbe, rhunmwuda ọnii, I gha wa rria iran ikhi ye emwi na. Iran khiẹnnẹ iran eviẹn ighẹ emwa ẹmwata ni ma sẹtin ha osa ne iran re, avbe ivbiogue ne ẹ i ra miẹn igho ya ha osa ibata e esanda.

Emọs 2:6 ပူးပေါင်းရင်းမြစ်များ

II Ọba 18:11

Ọgbaisi ọghe Asiria keghi viọ ivbi Izrẹl gha rrie Asiria zẹ vbe oghunmwu, ọ keghi ya viọ iran ye ẹvbo ne a tie ẹre Hala, eso kegha rre ọkpẹn ẹzẹ ne a tie ẹre Habọ vbe otọe Gozan, eso kevbe gha rre otọe Medis.

II Ọba 18:12

E Sameria keghi de guọghọ rhunmwuda ivbi Izrẹl ma họn ẹmwẹ e Nọyaẹnmwa ne Osanobua iran, sokpan, iran rra ile ne ọ gu iran ta, iran kevbe rra uhi hia ne ọ yi ne Mosis ne ọguọmwadia e Nọyaẹnmwa. Iran ma danmwehọ, iran ma vbe ya ẹe ru emwi.

Aizaia 10:2

Erriọ ọ re uwa ru ẹe ne uwa i na gie emwi ne ọ khẹke avbe ivbiogue sẹ iran obọ, wa i gie a bu ohiẹn ẹmwata ne iran. Erriọ ọre uwa vbe ya viọ ukhu ne ọ sẹ ẹgbẹ kevbe emọ ne ẹ i mwẹ erha obọ.

Aizaia 29:21

Osanobua gha fuẹn iran an ighe avbe emwa ni ta ẹrrẹe ọtakhọ, iran ne ẹ i gia rri emwa dan oya, iran ni ta ohoghe ne a ghẹ miẹn ehe na bu ohiẹn ẹmwata ne emwa esi.

Ezikiẹl 22:13

“I gha so ekpa mwẹ yan oyi ne uwa rha kevbe izigha ne uwa de.

Joẹl 3:3

Iran yan uta ya gualọ ọmwa, ne a gha viọ avbe oghunmwu na, iran khiẹnnẹ emọ ikpia kevbe emọ ikhuo ọviẹn, ne iran ya gha ha igho ne avbe igberagia, kevbe ne iran ya gha da ayọn.

Joẹl 3:6

Wa viọ ivbi e Juda kevbe Jerusalẹm, wa na viọ iran khian rrei, wa na ya khiẹnnẹ iran ne ivbi e Grik.

Zẹkaraia 11:5

Iran ni yan iran gbele iran, a ma vbe ru iran emwirhọkpa. Iran khiẹnnẹ emiowo iran, iran keghi vbe kha wẹẹ, ‘Wa rho e Nọyaẹnmwa, ma fe nẹ, uhin ighẹ avbe ọsuohuan iran ma tohan iran hiehiere.’ ”