Emọs 2:4 - Edo Bible (E Baibol Ẹdo) Version 1996

⁴ E Nọyaẹnmwa khare wẹẹ, “Te ivbi e Juda wa gha ru orukhọ yan egbe yan egbe, rhunmwuda ọnii, I gha wa rri iran oya ye emwi na. Iran zan iruẹmwi mwẹ, iran ma vbe ya iyi mwẹ ru emwi. Ẹbọ ohoghe ne avbe erha iran ghoro, vbe dee iran odẹ nẹ,

Emọs 2:4 ပူးပေါင်းရင်းမြစ်များ

II Ọba 17:19

Uhin ighẹ emwa e Juda tobọ iran ma vbe họn ẹmwẹ ne Nọyaẹnmwa ne Osanobua iran. Iran keghi vbe gha ya egbe ta uyinmwẹ ivbi Izrẹl.

II Krọnikol 25:14

Ugbẹn vbe Amezaia ghi khọn ivbi Idọm muotọ nẹ ọ keghi viọ ẹbọ iran gha die owa, ọ keghi kọ iran, ọ na gha gho iran, ọ na gha giẹn eturari ne iran.

II Krọnikol 30:7

Wa ghẹ ye vbe avbe erha uwa odede kevbe ivbi Izrẹl ni ma mudia ẹse vbe ehe ne Nọyaẹnmwa Osanobua iran ye. Wa tobọ uwa miẹn ọẹn nian wẹ ọ rri iran oya yọ ẹsẹse.

Nehimaia 1:7

Uyinmwẹ dan ma yin ghe ruẹ, ma ma vbe ru vbene u gie mwa. Uhi ne u rhie ne Mosis ne ọguọmwadia ruẹ rhie gie ima, ma ma mu ẹẹn sẹ.

Nehimaia 9:26

“Sokpan, emwa ruẹn sọtẹ, iran ma họn ẹmwẹ ne uẹn iran keghi fi iyeke gbe Uhi ruẹ, iran gbele avbe akhasẹ ni bu iran ude ni tama iran ne iran dọlegbe bu ruẹ gha dee iran kegha yagha a yan egbe yan egbe.

Aizaia 28:15

Wa gha rhuọ wẹ wa gu uwu koo ẹmwẹ nẹ, wa kevbe gu agbọn iran ni wulo nẹ koo ọta, wa keghi gba mu ẹẹn kọ ye efọnkpa. Aro uwa wa vbe dae wẹ, ẹghẹ ne ọfuan gha na rre, ọ gha fi uwa yi, rhunmwuda, wa mu ẹtin yan ohoghe kevbe erẹrẹ ne ọ miẹn uwa fan.

Aizaia 44:20

Ẹwaẹn ne ọ rre emwa ma vbe kpọlọsẹ ọghe ọmwa ne ọ rri emuẹn. Emwi akpa ne ọ rre ọre uhunmwu bibi ẹre odẹ sẹ vberriọ nẹ wẹ ẹ i ghi gia yọre obọ. Ẹ i sẹtin tae ma egbe ẹre wẹ amazẹ ne irẹn mu mwẹ obọ ighe ẹ i re Osanobua hiehiere.

Jerimaia 16:11

Ẹghẹ nii u ghi tama iran wẹẹ, ‘E Nọyaẹnmwa khare wẹ, avbe erha uwa odede fi iyeke gbe mwẹ, iran ke ya gha ghoo, iran keghi ya gha gaa avbe ẹbọ ọvbehe. Iran hee mwẹ yotọ, iran ma rhie emwi ne ima iran re.

Jerimaia 16:12

Sokpan wa ọ re ọ wa vbe rhia sẹẹ avbe erha uwa odede. Wa hia ọ re ọ wa ze vbe udu, wa kevbe mwẹ ekhọe dan, wa i vbe hẹnmwẹ mẹ.

Jerimaia 17:27

“Sokpan, te ọ kere ne iran gha họn ẹmwẹ mẹ, ne iran gha ru Ẹdẹ Ikẹtin zẹ vbe ẹdẹ nọhuanrẹn. Iran ghẹ mu ihẹikeikẹ la onurho e Jerusalẹm gberra vbe ẹdẹ vberriọ, iran gha danmwẹ ọẹn, I gha mu erhẹn ye onurho e Jerusalẹm. Erhẹn gha giẹn ẹguae ne ọ rre Jerusalẹm, ai ra vbe miẹn ọmwa ne ọ gha sẹtin dọ ẹre yọ.”

Jerimaia 6:19

Otọ agbọn, danmwehọ! Zẹ vbe emwi ne I ra ya rria iran ikhi ye uma ne iran si, I ra gie ọkhọ rruan iran na, rhunmwuda, iran he iruemwi mwẹ yotọ, iran ma vbe ya ẹmwẹ mwẹ ru emwi.

Jerimaia 8:2

Ne a gha na te si iran koko ne a re iran, a gha zagha ugboloko iran lele otọe zẹ vbe emwi ne a ya ye emwiokọ maa sayọ. A gha wawa iran lele otọ vbe uwu ovẹn, kevbe uki kevbe avbe orhọnmwẹ ne ọ wa yẹ avbe emwa na, kevbe ne iran vbe gha ghoo, ne iran vbe gha gualọ otọ emwi vbe obọ ẹre, kevbe ne iran gha ya uhunmwu rhanmwẹ otọ na.

Jerimaia 8:9

A ye ekhue mu avbe umẹwaẹn uwa, ehia tighi ye iran aro, obọ vba iran. Iran hee ẹmwẹ mwẹ yotọ nẹ, de ẹwaẹn ne iran ghi mwẹ nian?

Jerimaia 9:14

Sokpan iran keghi zevbudu, iran ke ya gha gho e Baal ne ẹbọ, zẹ vbene avbe erha iran ma iran re ne iran gha ru.

Ezikiẹl 13:22

Wa wa ya ohoghe ne uwa tae gbin emwa esi ẹtin, avbe emwa ne imẹ i ho ni ru ẹre emwi rhọkpa. Wa i gie emwa dan zobọ vbe emwi dan ne iran ru, ne iran rhie uhunmwu iran ke ẹbe ladian.

Ezikiẹl 20:13

Uhin wẹ vbe uwu ato, iran ke wa gha yagha mwẹ. Iran rra uhi mwẹ, iran keghi vbe fi iyeke gbe iyi mwẹ ne ọ rhie arrọọ ne ọmwaikọmwa ne ọ ya ẹe ru emwi. Iran ke wa mu Ẹdẹ Ikẹtin rhiaa fẹẹrẹ, I te wa mu egbe ne I gie iran họn obọ ohu mwẹ vbe egbe vbe uwu ato nii, ne I wa fuẹn iran an.

Ezikiẹl 20:16

I yan eyan ni rhunmwuda, iran he iyi mwẹ yotọ, iran rra uhi mwẹ, iran keghi vbe mu Ẹdẹ Ikẹtin rhia, ẹbọ iran ne iran ga ọ re ọ yẹ iran sẹ.

Ezikiẹl 20:18

I keghi ya obọ sekhae ne avbe igbama ni rrọọ wẹẹ: Wa ghẹ ya avbe uhi ne avbe erha uwa odede mu yotọ ru emwi, wa ghẹ lele avbe emwi ne iran ru dee ẹdẹ, ra ne uwa ya ye avbe amazẹ gha mu awua ye egbe uwa egbe.

Ezikiẹl 20:24

I ru ọna, rhunmwuda, iran he iyi mwẹ yotọ, iran rraa uhi mwẹ, iran mu Ẹdẹ Ikẹtin rhia, iran keghi vbe gha gho avbe ẹbọ ne avbe erha iran ghoro.

Ezikiẹl 20:30

Banbanna nian, tama ivbi Izrẹl vbene I kha hẹ wẹẹ: Vbọzẹ ne uwa gha na gha ru avbe orukhọ ne avbe erha uwa ru yi, ra ne uwa vbe gha rhikhan lele avbe ẹbọ iran?

Ezikiẹl 22:28

Avbe akhasẹ keghi gbegue avbe orukhọ na, zẹ vbe ne emwa ya orhue gue ekẹn ne a gbe. Iran miẹn umian ohoghe, iran keghi vbe ta ẹmwẹ a tae yotọ ne ọ vbe re ohoghe. Iran ghi gha kha wẹ ẹmwẹ e Nọyaẹnmwa ọ re iran ta, sokpan mẹ ne Nọyaẹnmwa ne Udazi ma gie iran.

Ezikiẹl 22:8

Wa i yọghọ ne avbe ehe nọhuanrẹn, wa i vbe lele emwi ru vbe Ẹdẹ Ikẹtin.

Hozia 12:2

E Nọyaẹnmwa mwẹ ẹzọ ne ọ gha ba ivbi Juda re, ọ gha vbe rri ivbi Izrẹl oya, rhunmwuda uyinmwẹ emwa rẹn. Ọ gha ha iran osa emwi ne iran ru.”

Hozia 12:3

E Jekọb ne erha iran odede kevbe Isọ ne irẹn vbe ọre gba re ivin eva gba ru egbe vbe iran eva he rre uwu ẹko iye iran; e Jekọb ghi waan nẹ ọ gu Osanobua suan.

Hozia 6:11

“Zẹ vbe ọghe uwa ne ivbi Izrẹl, I rhie ẹghẹ yotọ nẹ ne I gha ya rri uwa oya ye emwi ne uwa ru na.

Emọs 1:3

E Nọyaẹnmwa khare wẹẹ, “Tẹ ivbi e Damaskọs wa gha ru orukhọ yan egbe yan egbe, rhunmwuda ọnii, I gha wa rri iran oya ye emwi na. Ekhọe ababe ọ re iran ya gha ru emwi ne iran ru ivbi e Giliad re.

Emọs 3:2

“Vbe avbe uhunmwu ẹvbo hia ni rre agbọn na, wa ọkpa ọre I rẹnrẹn, wa ọkpa ọre I vbe gbe aro ghe vbọ. Ọnii ọre ọ si ẹe ne orukhọ uwa na re emwi ne ọ mu ohan, ọnii ọ si ẹe ne a na miẹn wẹ ẹ i mwẹ I ma rri uwa oya yọ.”

Maika 6:12

Iran ni fe vbe emwa ruẹn ya avbe ivbiogue ru enegbe iran, ọhọn ohoghe wa hia fẹẹrẹ wa khin.

Habakọk 2:18

De esa ne ẹbọ ye yi? Emwi ne ọmwa ya obọ ru kẹkan ma, nẹ ẹ i vbe ta ẹmwẹ ọkpa ma ruẹn gberra ohoghe. De ọ maa ọkpa ne ọmwa ne ọ mu ẹtin yan rẹn ra miẹn vbọ yi — ẹbọ ne ẹ i sẹtin guan.

Ebe ne Pọl gbẹẹn gie emwa Rom 1:25

Iran fi ẹmwata ne ọ rre ẹmwẹ Osanobua werriẹ ya khian ohoghe. Iran keghi ga, iran na vbe gha ya uhunmwu rhanmwẹ otọe ne emwi ne Osanobua yi, ne iran gha na te gha ga Ayi Ne ọ yi tobọ ẹre, ne a gha rhie uyi na ẹdẹdẹmwẹdẹ, Isẹ.

I Tẹsalonaika 4:8

Rhunmwuda ọnii, ọmwaikọmwa ne ọ ma rhan obọ miẹn iruẹmwi na, ẹ i re ọmwa ne agbọn ọre ọ ma rhan obọ miẹn ighẹ Osanobua ne ọ rhie nene iruẹmwi rre nọ, ọmwa ne ọ rhie Orhiọn Ne Ọ Huanrẹn ọghọe ne uwa.

I Pita 1:18

Rhunmwuda wa rẹn osa ne a hae ya dẹ uwa hin obọ ẹre rre ighẹ uyinmwẹ ne ẹ i mwẹ ere, ne uwa miẹn vbe obọ avbe erha uwa odede. Ẹ i re avbe emi ne ọ fafaa, vbe ne avbe igoru vbe esiliva ye.

Giọgis 10:6

Ivbi Izrẹl keghi vbe dọlegbe rukhọ ghe e Nọyaẹnmwa. Iran na gha gho e Bal kevbe Astat deba avbe ẹbọ e Siria, e Saidọn, e Moab, Amọn kevbe Filistia. Iran keghi fi iyeke gbe e Nọyaẹnmwa, iran ma gha gae.