Emọs 2:11 - Edo Bible (E Baibol Ẹdo) Version 1996

¹¹ I hannọ eso vbe ivbi uwa zẹ, ne iran gha re akhasẹ, kevbe eso vbe avbe igbama uwa, ne iran do gha re Nazarait. Ohoghe nọ ra ivbi Izrẹl? Mẹ ne Nọyaẹnmwa guan nẹ.

Emọs 2:11 ပူးပေါင်းရင်းမြစ်များ

I Ọba 17:1

Akhasẹ ọkpa ne a tie ẹre Elaija ne ovbi e Tisbi ne Giliad ke tama Ehab wẹẹ, “Vbe eni e Nọyaẹnmwa ne Osanobua Izrẹl ne imẹ ga, I tama ruẹn nian wẹ amẹ i ghi ra rhọ, evbu i ra ghi vbe tuo ọ te ya sẹ ukpo eha vbe ẹ i re te I fi ẹmwẹ na werriẹ ta.”

I Ọba 18:4

ẹghẹ ne Jezibẹl na gha gbele avbe akhasẹ e Nọyaẹnmwa, Obedaia keghi viọ iyisẹn vbe uwu iran, ọ na viọ iran lẹre, ekigbesiyeha vbe uvun ọkpọkpa, ọ na gha ye amẹ vbe evbare koko iran.

I Ọba 19:16

U ghi vbe ma e Jehu ne ovbi e Nimsi ọba Izrẹl. U ghi rhie Elaisia ne ovbi e Siafat ne ovbi ẹvbo ne a tie ẹre Ebel Mehola u ghi ya ẹe ma akhasẹ ye ihe egbe ruẹ.

I Ọba 20:13

Vbe uwu ẹghẹ ne a kha na, akhasẹ ọkpa na ya tama Ehab ne ọba wẹẹ, “E Nọyaẹnmwa khare wẹẹ, ‘Ghẹ gie ohan ivbi iyokuo ni bun na mu ẹẹn! I gha rhie ruẹ obọ yan iran uhunmwu ẹrẹna, u ghi rẹn wẹ mẹ ọrọre Nọyaẹnmwa!’ ”

I Ọba 20:35

Zẹ vbene Nọyaẹnmwa gie, ọkpa vbe uwu ivbiotu akhasẹ keghi tama ogieva ẹre wẹẹ, “Fi mwẹ emwi.” Sokpan, ọ keghi he.

I Ọba 20:41

Akhasẹ nii keghi fannọ ukpọn hin arọ rre. Ọba keghi wa rẹn vbe ọwarọkpa wẹ ọkpa vbe uwu avbe akhasẹ nọ.

I Ọba 22:8

Ehab keghi wanniẹn wẹẹ, “Ọkpa ye rrọọ, Makaia ne ovbi Imla, sokpan I i ho ẹmwẹ ọnrẹn rhunmwuda, ẹ i ta ẹmwẹ esi ma mwẹ, emwi dan nọ vbe ẹghẹ hia.” E Jehosiafat keghi wanniẹn wẹẹ, “Ghẹ kha vberriọ.”

II Ọba 17:13

E Nọyaẹnmwa gie avbe odibo ẹre kevbe avbe akhasẹ ne a tama Izrẹl kevbe Juda wẹẹ, “Wa la hin odẹ dan ne uwa la khian rre, ne uwa gha ru vbene I khare zẹ vbene ọ rre uwu uhi ne I rhie ne avbe erha uwa odede, ne I vbe rhie ne avbe akhasẹ ne eguọmwadia mwẹ rhie ye uwa obọ.”

II Ọba 6:1

Ọ ghi sẹ ẹdẹ ọkpa, avbe ivbi otu akhasẹ ne Elaisia hẹ khian keghi do tu ma rẹ wẹẹ, “Ehe ne ima ye kanmwa gbe.

II Krọnikol 36:15

E Nọyaẹnmwa ne Osanobua avbe erha iran odede kegha gie avbe akhasẹ rre ne ọ do gha bu iran ude, rhunmwuda, rẹn te gha ho ne ọ sẹ iran kevbe Ọgua Osa rae.

Jerimaia 11:21

Ivbi Anatọt te ho ne a gbe mwẹ, uan. Iran keghi tama mwẹ wẹ iran gha gbe mwẹ uan deghẹ I ye gha wewe uhunmwu ne Nọyaẹnmwa gie khian.

Jerimaia 2:31

Ivbi Izrẹl, wa danmwehọ ẹmwẹ ne I guan. Mẹ he ye vbe ato ne uwa ẹdẹ ra, zẹ vbe ẹvbo dan ne ọ su ebiebi. Vbe uwa ghi na kha hẹ wẹ emwi ne ọ khọn uwa ọ re uwa ra gha ru ighe wa i dọlegbe bu mwẹ dee.

Jerimaia 2:5

E Nọyaẹnmwa khare wẹẹ, “De ẹzọ ne avbe erha uwa odede miẹn gunmwẹ gui yi?” De emwi ne iran ghi rhunmwuda ẹre fi iyeke gbe mwẹ? Iran tobọ iran keghi khian ne ẹ i mwẹ esa ne ọ ye.

Jerimaia 26:11

Ọ re avbe ohẹn kevbe avbe akhasẹ na tama avbe ọkaolotu kevbe emwa nii wẹẹ, “Te ọ kere ne a bu ohiẹn uwu gbe ọmwa na rhunmwuda, ọ taa ẹmwẹ dan gie ẹvbo ima na. Wa tobọ uwa ye ehọ uwa họẹn.”

Jerimaia 7:25

Ke ẹdẹ ne erha uwa ke Igipt ladian gha dee do sẹ ẹdẹnẹrẹ na, te I gha gie avbe eguọmwadia mwẹ ighe avbe akhasẹ gie uwa.

Eve Orriara 4:7

Avbe ivbiọba mwẹ keghi te gha re emwa ne ẹ i mwẹ awua, iran keghi gha re ne ọ hianrẹn vbe esia, iran te wegbe, iran vbe mwẹ ẹtin, egberranmwẹ iran ghi wa vẹ ne a rẹn.

Maika 2:6

Emwa nii gha na iyẹn mwẹ iran wẹẹ, “Ghẹ ghi ya unu salọ ima. Ghẹ ghi talọ egbe ẹmwẹ nii. Osanobua i fa ima an.

Iwinna 4:18

Rhunmwuda ọnii, iran keghi tie iran la owa, iran yan ma iran wẹ ne iran ghẹ gie a họn ẹn wẹ iran ye ya eni Jesu gu ọmwaikọmwa guan, a ghẹ i ghi ya ẹe ma emwa emwi.

Iwinna 5:28

“Te ima wa mobọ yan ma uwa wẹ ne uwa ghẹ ghi ya eni ọmwa na ma ọmwarhọkpa emwi. Wa ma miẹn emwi ne uwa ru nian. Wa ya iruẹmwi uwa gba Jerusalẹm hia, te uwa ghi ra gie a lẹ ẹmwẹ uwu ẹre ginna ima obọ.”

Iwinna 7:51

“Wa na ni zẹ udu gbee! Wẹ ne ekhọe ibisi, wa ni kan igban khiọ ehọ, ne ẹ i họn ẹmwẹ Osanobua. Vbene avbe erha uwa gha ye ọre uwa vbe ye. Orhiọn Ne Ọ Huanrẹn ọre uwa gu suan ẹdẹ.

Diuteronomi 18:18

I gha gie akhasẹ vbe ruẹ ke uwu emwa iran gie iran; I gha tama rẹn ẹmwẹ ne ọ gha ta, irẹn ghi vbe rhie iyi ne I yi hia ma iran.

I Samuẹl 19:20

Ọ na gie emwa eso ne iran ya mu ẹẹn. Iran keghi do vba avbe akhasẹ eso, iran gha kuu, iran gha vannọ, e Samuẹl kegha re ọkaolotu iran. Ẹre orhiọn Osanobua na hin emwa e Sọl, iran kevbe suẹn gha ku iran na gha vannọ.

I Samuẹl 3:20

Ẹre ivbi Izrẹl hia, ehe ne ọ sẹe, ehe ne ọ rhanmwẹ, na rẹn wẹ akhasẹ e Nọyaẹnmwa ọ re Samuẹl wa khin.