Ẹksọdọs 8:26 - Edo Bible (E Baibol Ẹdo) Version 1996

²⁶ E Mosis keghi wanniẹn wẹẹ, “Ẹ i re emwi ne ọ gbae ne ima ru vberriọ, rhunmwuda avbe aranmwẹ ne ima ya zọ ese ghe Nọyaẹnmwa Osanobua mwa gha sọnnọ ivbi Igipt, ma gha ye aranmwẹ ne ivbi Igipt wua zọ ese vbe ehe ne iran gha na bẹghe mwa, iran gha filo okuta gbele ima an.

Ẹksọdọs 8:26 ပူးပေါင်းရင်းမြစ်များ

Gẹnẹsis 43:32

Iran keghi rhie ọghe Josẹf nẹẹn, rẹn ọkpa vbe ehe ughaẹn. A kevbe viọ ọ ghe etiọnrẹn ye eteburu ọvbehe, a kevbe viọ ọghe ivbi Igipt ni deba ẹre gha rrie evbare ne iran vbe ehe ughaẹn. Rhunmwuda iran kae ye awua ne a deba emwa Hibru gha rri evbare.

Gẹnẹsis 46:34

Wa ghi khama rẹn wẹẹ, ‘Enọwanrẹn aranmwẹ ọre ima rri ke ẹghẹ ọvbokhan mwa gha de zẹ vbe ne avbe erha mwa vbe gha ru.’ Erriọ ọre uwa gha na ya di odẹ Gosiẹn ya.” Emwi ne ọ yae ta ọna ọrọre wẹ emwa Igipt i ho ẹmwẹ avbe ọsuohuan.

II Ọba 23:13

E Josaia kevbe rhia rua ighẹ avbe Ogiukpo ne Solomọn mannọẹn ye odẹ ahọ e Jerusalẹm, vbe odẹ ekẹn oke oliv, evba iran na te gho avbe ẹbọ ni zughu ọmwa ẹko nii hia, avbe Astat ne ẹbọ ne okhuo e Saidọn, e Kemọs ne ẹbọ e Moab deba Milkọm ẹbọ Amọn.

Ẹzra 9:1

A ghi ru avbe emwi na hia fo nẹ, eso vbe uwu avbe ọkaolotu keghi do khama mwẹ wẹ, emwa nii, avbe ohẹn, deba avbe Livai ma bi egbe ne emwa ni lẹga iran, Amọn, e Moab, Igipt, emwa Kenan, Hiti, Pẹriz, Jebus, kevbe Amọri, emwi osọnnọ ne avbe emwa nii ru ọ re iran vbe ru.

Ẹksọdọs 3:18

Iran gha rhie ehọ nuẹn ta yi, u ghi bu ọba Igipt ke uwẹ kevbe avbe ọkaolotu ivbi Izrẹl, u ghi tama rẹn wẹẹ, ‘E Nọyaẹnmwa, Osanobua avbe emwa Hibru miẹn ima aro. Lahọ gie ima khian okhian ikpẹdẹ eha ghe uwu ato ne ima ya zọ ese ne Nọyaẹnmwa, Osanobua mwa.’

Ẹksọdọs 8:8

Ọba keghi tie Mosis kevbe Errọn, ọna wẹẹ, “Wa na erhunmwu ghe Nọyaẹnmwa ne ọ viọ avbe ẹkirẹ hin imẹ kevbe emwa mwẹ egbe rre, I gha gie emwa uwa gha khian ne iran ya zọ ese ghe Nọyaẹnmwa.”

Aizaia 44:19

Iran ni ru amazẹ i vbe mwẹ ẹwaẹn ra irẹnmwi ne iran gha ya kha wẹẹ, “I giẹẹn eso ua nẹ vbe erhan na, I vbe ya erhẹn ọnrẹn eso le ebrẹd, I vbe tọn emiowo, I na rrii ọe. Ne ọ ghi dekẹe vbe nene erhan, I keghi yae kaa amazẹ. U ghe mwẹ vbe I ya uhunmwu rhanmwẹ otọ ne ike erhan!”