Ẹksọdọs 6:8 - Edo Bible (E Baibol Ẹdo) Version 1996

⁸ I gha viọ uwa gha rrie otọe nii ne I mobọ yan wẹ 1 gha mu ne Ebraham, Aizik kevbe Jekọb. I gha mu ne uwa ne ọ gha re ọwua, mẹ ọrọre Nọyaẹnmwa.’ ”

Ẹksọdọs 6:8 ပူးပေါင်းရင်းမြစ်များ

Gẹnẹsis 14:22

Sokpan Ebram keghi wanniẹn wẹẹ, “Ekhọekekhọe ọre i wa ya vẹn ihẹn vbe odaro Nọyaẹnmwa Osanobua Nọyosẹ, ọmwa ne ọ yii ẹrinmwi kevbe agbọn.

Gẹnẹsis 15:18

Ẹdẹ nẹdẹrriọ, Nọyaẹnmwa keghi gu Ebram ta ile wẹẹ, “I yanrẹn ighẹ I gha mu otọ na hia ne uniẹn ruẹn, ke ẹzẹ ne ọ rre ehe ne Igipt lae ya sẹ Yufretes ne okpẹzẹ.

Gẹnẹsis 26:3

U ghi di emwa ya, I gha rrọọ yaba ruẹ, I gha fiangbuẹ rhunmwuda, I gha mu otọ na nuẹn kevbe uniẹn ruẹn. I gha mu eyan ne I yan ma Ebraham ne erhaa sẹ.

Gẹnẹsis 28:13

Iyekọni, ọ keghi miẹn vbe Nọyaẹnmwa mudia ke irẹn, ọ wẹẹ, “Mẹ ọrọre Nọyaẹnmwa, Osanobua Ebraham kevbe Aizik. Otọ ne u lovbiẹ yi na, I gha yae nuẹn ke uwẹ kevbe uniẹn ruẹn,

Gẹnẹsis 35:12

I gha mu otọ ne I mu ne Ebraham Aizik nuẹn, I gha vbe mu ẹẹn ne ivbi uniẹn ruẹn vbe iyeke ruẹ.”

Nehimaia 9:15

“Ẹghẹ ne ohanmwẹ na gha gbe iran, u ke ẹrinmwi koko iran. U tue amẹ ke uwu okuta gie iran, vbe ovbamẹ gbe iran, u tama iran ne iran gha kha yan otọ nii, ne u yan yi wẹ u mu ne iran.

Ẹksọdọs 13:5

E Nọyaẹnmwa wa yan ma avbe erha uwa wẹ rẹn gha mu otọe Kenan, otọe Hiti kevbe Amọri kevbe Hivi kevbe Jebus ne uwa. Otọe ne rọkhọ ne ọ maa emwi okọ wa nọ. Ọ gha ghi viọ uwa sẹ otọe nii nẹ, wa ghi gha ru emwiukpo na vbe nene uki ne okaro ukpukpo.

Ẹksọdọs 32:13

Ye avbe eguọmwadia ruẹ; rre, avbe Ebraham, Aizik kevbe Jekọb kevbe vbene u yan ma iran vbe eni ruẹn, ne u na khama iran wẹẹ, ‘I gha viọ emọ uniẹn ivbi uẹ ni yevbe orhọnmwẹ nii rre iso nuẹn. Otọe ne I ve na, I gha vbe muẹn ne avbe ivbi uẹ, ọ ghi gha re ọghe iran ẹdẹdẹmwẹdẹ.’ ”

Ẹksọdọs 6:2

Osanobua keghi gu e Mosis guan wẹẹ, “Mẹ ọrọre Nọyaẹnmwa.

Ẹksọdọs 6:4

I vbe gu iran ta ile vbe ne I na yan wẹẹ, I gha mu otọ Kenan ne iran, otọe ne iran gha ye, zẹ vbe orhunmwuyẹn.

Ẹksọdọs 6:6

Rhunmwuda ọnii, wẹ ghi ya tama ivbi Izrẹl wẹẹ, ‘Mẹ ọrọre Nọyaẹnmwa, I gha fannọ uwa ye otọ vbe obọ iwinna ekuẹnkuẹn ne ivbi Igipt ya ẹtin munọ uwa ya winna. I gha miẹn uwa fan hin uwu eviẹn ne uwa ye ne iran. I gha fannọ uwa ye otọ vbe ekpa ne I gha na tọn obọ mwẹ ne wegbe mu ne I ya rri iran oya nọ mu ohan.

Ezikiẹl 20:15

“Rhunmwuda ọnii, mẹ keghi yan vbe ato wẹ, mẹ i ghi viọ iran gha rrie otọe ne I mu ne iran, otọe ne ẹfe ye ke ne ọ maa emwiokọ, otọe ne ọ maa sẹ vbe uwu ehia.

Ezikiẹl 20:23

“Rhunmwuda ọnii, I keghi vbe yan eyan ọvbehe vbe uwu ato vbe evba. I keghi yan wẹ, I gha zagha iran kua lele ehehia vbe otọ agbọn.

Ezikiẹl 20:28

I viọ iran gha die otọ ne I wẹ I gha mu ne iran. Iran ghi miẹn avbe oke ni yo kevbe avbe erhan ni mwẹ ebe nunuunu, iran kegha zọ ese vbe ehe ne ehia ye.

Ezikiẹl 20:42

I gha ghi viọ uwa dọlegbe gha die otọ Izrẹl, otọe ne I khare ighe I gha mu ne avbe erha uwa odede, ẹghẹ nii, wa gha do rẹn ighe mẹ ọrọre Nọyaẹnmwa.

Ezikiẹl 36:7

Mẹ ne Nọyaẹnmwa ne Udazi yan tae nẹ wẹ, a gha rri avbe ẹvbo ni yin lẹga ẹre oya.

Ezikiẹl 47:14

Te I wa yan ma avbe erha uwa odede wẹ I gha mu otọe na ne iran, banbanna nian, wa gha ẹre umwọmwẹ ne egbe uwa.

Nọmbas 10:29

E Mosis keghi tama Hobab ne ovbi Jetro ne orruan rẹn ne ovbi Midian wẹẹ, “Te ima ghi ra kpao gha rrie ehe ne Nọyaẹnmwa khare ighẹ rẹn gha mu ne ima. Ọ yan mẹ wẹ rẹn gha ya Izrẹl khian ne ọ fee, lele ima gha dee, ma gha ghae ne uẹn vbe ẹfe ima.”

Nọmbas 11:12

Ẹ i re mẹ ọre ọ yi iran, ẹ i re imẹ ọ biẹlẹ iran! Vbu a ghi na wẹ ne I ru zẹ vbe ọkokọmọ ne I viọ iran ye ekuabọ mwẹ zẹ vbe ọmọmọ gha rrie otọ ne u ve wẹ u gha mu ne avbe erha iran odede hẹ?

Nọmbas 14:30

I te yan wẹ I gha gie uwa yin otọe ni, sokpan, nian ọkpa vbe uwu uwa ne ọ gha yin ẹnrẹn ẹ ghi rrọọ gberra Kelẹb kevbe Jọsua.

Nọmbas 23:19

Osanobua i ye vbe emwa ne agbọn, ni ta ohoghe; rẹn i re ọmwa kẹkan ne ọ gbe yo gbe rre. Emwi ne ọ rhirhi ta, ọre ọ ru; ọ gha guan, a ghi ru ẹe.

Diuteronomi 32:40

Vbene aro na da ẹe ighẹ mẹ ọ re Osanobua ne ọ rrọọ, I niẹn obọ ghe ukhunmwu, I keghi yan,

Diuteronomi 4:31

Osanobua ne ọ mwẹ itohan rẹn khin. Rẹn i ra he uwa ye otọ ra ne ọ fuẹn uwa a, rẹn tobọ re i ra vbe mianmian ile ne irẹn gu avbe erha uwa odede ta.

Jọsua 24:13

I keghi mu otọ ne uwa ma miẹn ẹsọn yi ne uwa, deba ẹvbo ne uwa ma bu. Evba wa ye na, wa gha rri ọmọ erhan ne a ya ru ayọn ne ọ baa vbe erhan ẹnrẹn kevbe oliv vbe erhan ne uwa ma kọ.”

Arhie Maan 10:6

Ọ keghi ya eni Osanobua yan, ọmwa ne ọ rrọọ ẹdẹ kevbe ẹdẹdẹmwẹdẹ, ọmwa ne ọ yi ẹrinmwi kevbe emwi hia ni rre uwu ẹre, agbọn kevbe emwi hia ni rre uwu ẹre, okun kevbe emwi hia ni rre uwu ẹre. Odibosa nii keghi kha wẹẹ, “A i ghi si ẹe kpẹe vbe otọ ọvbehe.

I Samuẹl 15:29

Ọba Oghodua ugborrirri ọghe Izrẹl i ta ohoghe ra ne ọ gha fi ekhọe werriẹ, rẹn i re ọmwa kẹkan, ẹ i gbe yo gbe rre.”