Ẹksọdọs 6:12 - Edo Bible (E Baibol Ẹdo) Version 1996

¹² Sokpan e Mosis tama Nọyaẹnmwa wẹẹ, “Ugbẹn vbe a miẹn wẹ nene ivbi Izrẹl tobọ iran ma rhie ehọ mẹ ta yi, vbọzẹ ne ọba Igipt gha na rhie ehọ mẹ ta yi? Mẹ nọ, I i guara guan.”

Ẹksọdọs 6:12 ပူးပေါင်းရင်းမြစ်များ

Ẹksọdọs 3:11

E Mosis keghi khama Osanobua wẹẹ, “Gha ọre imẹ ne I gha na bu e Fero ne I ya viọ ivbi Izrẹl ke Igipt ladian?”

Ẹksọdọs 3:13

Sokpan e Mosis keghi tama Osanobua wẹẹ, “Vbe ne ọ ye na nian, I ghẹ ghi bu ivbi Izrẹl gha khian, I na ya tama iran wẹẹ, ‘Osanobua avbe erha uwa odede ọre ọ gie mwẹ bu uwa gha dee,’ iran gha nọ mwẹ wẹẹ, ‘Vbe a tie eni ẹnrẹn?’ Vbe I a ghi ra tama iran hẹẹ?”

Ẹksọdọs 4:1

E Mosis keghi wanniẹn tama e Nọyaẹnmwa wẹẹ, “Sokpan a deghẹ ivbi Izrẹl ma ya mwẹ yi vbo, ighẹ iran ma rhie ehọ mẹ ta yi, iran na wẹẹ, ‘E Nọyaẹnmwa ma rhie egbe ma ruẹn.’ Vbe I a gha ghi ru?”

Ẹksọdọs 4:10

Sokpan, e Mosis keghi tama Nọyaẹnmwa wẹẹ, “Lahọ ghẹ gie mwẹ, Nọyaẹnmwa, mẹ ma he guara guan vbe ẹbu ẹdẹ, kevbe ne u vbe ya suẹn gha gu mwẹ guan gha dee, I ma he vbe ye guẹ, Nọyaẹnmwa. I i gua ra guan, te I ta ẹe lọkọlọkọ, I ghi vbe gha ba ẹmwẹ.”

Ẹksọdọs 6:13

Ẹ Nọyaẹnmwa keghi yi iyi ma e Mosis kevbe Errọn ne iran ya tama ivbi Izrẹl kevbe ọba Igipt wẹ te a gie iran wẹ ne iran viọ ivbi Izrẹl ke otọe Igipt ladian.

Ẹksọdọs 6:30

Sokpan e Mosis tama e Nọyaẹnmwa wẹẹ, “U rẹnrẹn ghẹ I i guara guan, ọba ọghe Igipt i rhie ehọ mẹ ta yi?”

Ẹksọdọs 6:9

E Mosis keghi ya ta ẹmwẹ na ma ivbi Izrẹl, sokpan iran ma rhie ehọ nẹẹn ta yi rhunmwuda, ihe eviẹn ne iran ye, ya egbe wọ iran.

Aizaia 6:5

Mẹ keghi kha wẹẹ, “I wiri! Ọghomwẹ fo nẹ, rhunmwuda ẹmwẹ ne ọ rhirhi ke akhuarhamwunu mwẹ ladian, orukhọ nọ, uwu ẹbu emwa ne ẹmwẹ ne iran guan hia wa vbe re orukhọ ọ re I ye. Sevba, mẹ keghi ye aro mwẹ bẹghe Ọba, e Nọyaẹnmwa ne Oghodua.”

Jerimaia 1:6

Mẹ keghi wanniẹn wẹẹ, “E Nọyaẹnmwa ne Udazi, I i guara guan, ọvbokhan I khin.”

Jerimaia 6:10

Mẹ keghi wanniẹn wẹẹ, “Deghẹ mẹ gu iran guan, I na gha bu iran ude, gha ọ ra danmwehọ mwẹ yi? Iran ze vbe udu, iran he ne iran danmwehọ uhunmwu ne u gie, iran ghi gha giẹ ye ẹmwẹ ne u wẹ ne I tama iran.

Levitikọs 26:41

Ne I na rhunmwuda ọnii mu aro da iran, ne I na viọ iran oghunmwu gha rrie ẹvbo eghian iran. Ọ gha sẹ okiekie, vbe a ghi vbokho avbe ivbi uwa nẹ iran mu egbe rrie otọ nẹ, ighẹ iran vbe rri oya ye orukhọ kevbe isọtẹ iran nẹ.

Iwinna 7:51

“Wa na ni zẹ udu gbee! Wẹ ne ekhọe ibisi, wa ni kan igban khiọ ehọ, ne ẹ i họn ẹmwẹ Osanobua. Vbene avbe erha uwa gha ye ọre uwa vbe ye. Orhiọn Ne Ọ Huanrẹn ọre uwa gu suan ẹdẹ.

Diuteronomi 30:6

E Nọyaẹnmwa Osanobua rua gha rhie ekhọe ne ọ họn ẹmwẹ ne uwa kevbe avbe ivbi uwa, wa ghi ya ekhọe uwa hia kevbe orhiọn uwa hia ho ẹmwẹ ọnrẹn wa ghi vbe gha yin otọe nii khian.