Ẹksọdọs 29:25 - Edo Bible (E Baibol Ẹdo) Version 1996

²⁵ Iyeke ọnii, u ghi miẹn iran evbare nii, u ghi giẹn ọnrẹn vbe uhunmwu aka, vbe uhunmwu avbe emwi imuohan na a giẹn uan, ne ọ miẹn ehe na rhie uwinhinmwẹ ne ọ yẹ mwẹ ladian, emwi imuohan evbare ne a ya rhie gun mwẹ nọ.

Ẹksọdọs 29:25 ပူးပေါင်းရင်းမြစ်များ

Gẹnẹsis 8:20

E Noa keghi gba aka ne Nọyaẹnmwa. Ọ keghi rhie ọkpọkpa vbe uwe aranmwẹ kevbe ahianmwẹ ne ẹ i mwẹ awua, ọ keghi ya iran zọ ese ne a giẹnrẹn vbe uhunmwu aka nii.

Gẹnẹsis 8:21

Uwinhinmwẹ ọnrẹn keghi yẹ Nọyaẹnmwa, ọ keghi tae wẹẹ, “Mẹ i ghi dọlegbe fi agbọn unu rhunmwuda uyinmwẹ emwa nagbọn, mẹ rẹnrẹn wẹ ke ẹghẹ ọvbokhan rẹn kpao, iro dan ọre ọ rre ekhọe ẹre, Mẹ i ghi dọlegbe fuẹn emwi hia, zẹ vbene I ruẹe ẹdẹnẹrẹ.

Psalm 99:6

Ohẹn ọnrẹn ọ re Mosis kevbe Errọn gha khin, e Samuẹl kevbe re ọmwa, ne ọ gha na erhunmwu ghe ẹre; iran kpe tie Nọyaẹnmwa.

Ẹksọdọs 29:18

U ghi wa giẹn ogho nii hia vbe uhunmwu aka. Izọhẹ ne a giẹn ne Nọyaẹnmwa ọre ọna khin, izọhẹ ne a ya erhẹn ru nọ ke ẹe kevbe uwinhinmwẹ ne ọ yẹ mwẹ.

Ẹksọdọs 29:24

U ghi viọ evbare na hia ye Errọn kevbe ivbi ẹre obọ, u ghi wẹ ne iran ya ẹe fiohan vbene a gha na wẹ ne iran niẹn rẹn ladian zẹ vbe emwi izọhẹ gun mwẹ.

Ẹksọdọs 29:41

U ghi gbe ovbi ohuan nọkpa vbe ota, zẹ vbe ne u vbe ru ẹe vbe owiẹ, u ghi gie izọhẹ evbare evba da lele ẹe, izọhẹ evbare ọre ọna khin mẹ, mẹ ne Nọyaẹnmwa, uwinhinmwẹ ọnrẹn wa yẹ mwẹ.

Levitikọs 1:13

Ọmwa nii ghi kpe ibiẹ ọre kevbe owẹ ọre, ohẹn ghi do mu ese nii gie Nọyaẹnmwa, ọ ghi giẹn ehia fẹẹrẹ vbe uhunmwu aka, uwinhinmwẹ emwi ihaoko evbare na yẹ Nọyaẹnmwa.

Levitikọs 1:9

Okpia nii ghi kpe avbe ibiẹ ọre kevbe avbe owẹ ọre, ohẹn ne ọ ru ugamwẹ ghi giẹn ese nii hia vbe aka. Uwinhinmwẹ emwi imuohan evbare na yẹ Nọyaẹnmwa.

Levitikọs 10:13

Wa rri ọe vbe ehe ne ẹ i mwẹ awua, ne ọ khẹke uwa vbe ivbi uwa vbe uwu evbare ne a rhie gie Nọyaẹnmwa nọ. Emwi ne Nọyaẹnmwa tama mwẹ ọre ọnii khin.

Levitikọs 2:11

A ghẹ ya eyist gbe ebrẹd ne uwa ya ha oko gie Nọyaẹnmwa, wa ghẹ ya eyist ra owọn le evbare ne a ya ha oko gie Nọyaẹnmwa.

Levitikọs 2:16

Ohẹn ghi giẹn ekherhe ne a rhie vbọ kevbe ofigbọn, ne ọ gha re ama kevbe eturari hia zẹ vbe iha oko evbare gie Nọyaẹnmwa.

Levitikọs 2:2

Ọ ghi mu ẹẹn bu ohẹn Errọn gha dee. Ohẹn ne ọ ru ugamwẹ ghi zẹ uguobọ ọkpa irhuarhua nii, ọ ghi giẹn ọnrẹn uan vbe aka ne a ya rhie ma wẹ te a ya ẹe zọ ese ghe Nọyaẹnmwa. Uwinhinmwẹ emwi ihaoko evbare vbenian yẹ Nọyaẹnmwa.

Levitikọs 2:9

Ohẹn ghi rhie ekherhe vbọ zẹ vbe ama wẹ a ya ehia ha oko gie Nọyaẹnmwa nẹ, ọ ghi giẹn ọnrẹn vbe aka. Uwinhinmwẹ emwi ihaoko evbare vbenian yẹ Nọyaẹnmwa.

Levitikọs 3:11

Ohẹn ne ọ ru ugamwẹ ghi giẹn ena hia zẹ vbe evbare ihaoko gie Nọyaẹnmwa.

Levitikọs 3:14

Ọ ghi vbe viọ ehe ne a ra sunu yi gie Nọyaẹnmwa zẹ vbe emwi ihaoko evbare: ẹvbi hia ni rre ẹkpokhurhu ẹre.

Levitikọs 3:16

Avbe ohẹn ghi giẹn ena hia zẹ vbe emwi ihaoko evbare gie Nọyaẹnmwa. Ẹvbi ni rrọ hia, ọghe Nọyaẹnmwa nọ.

Levitikọs 3:3

Iran ghi viọ ne a ra sunu yi na vbe egbe aranmwẹ nii gie Nọyaẹnmwa zẹ vbe ihaoko evbare:

Levitikọs 3:5

Avbe ohẹn ghi giẹn ena hia vbe uhunmwu aka deba ese ne a giẹn uan nii. Uwinhinmwẹ emwi ihaoko evbare na yẹ Nọyaẹnmwa.

Levitikọs 3:9

Ọ ghi viọ ehe ne a ra sunu yi vbe egbe aranmwẹ na gie Nọyaẹnmwa zẹ vbe emwi ihaoko evbare: ẹvbi ẹre, kevbe ẹrhunrhun ẹnrẹn ne a wa fian la ugboloko uvinyeke, ẹvbi ni wa rhu lele ẹkpokhurhu ẹre hia.

Levitikọs 7:25

Ọmwaikọmwa ne ọ rri ẹvbi aranmwẹ ne a ya zẹ ọhẹ gie Nọyaẹnmwa a ghẹ ghi vbe ka ẹe ba emwa Osanobua ọvbehe.

Levitikọs 7:5

Ohẹn ghi giẹn ẹvbi na hia vbe aka zẹ vbe izẹ ọhẹ evbare gie Nọyaẹnmwa. Izẹ ọhẹ a hae werriegbe nọ.

Levitikọs 8:28

E Mosis keghi miẹn iran evbare na, ọ na giẹn ọnrẹn uan vbe uhunmwu aka ese na giẹn uan, zẹ vbe ese ne a ya ma ohẹn. Ọna ke gha re izọhẹ evbare, uwinhinmwẹ ọnrẹn ke gha yẹ e Nọyaẹnmwa.

Ẹfisọs 5:2

Wa gie aho ẹmwẹ ọmwa gha kha yan ẹdẹ agbọn uwa, zẹ vbene Kristi ho ẹmwẹ mwa, ne ọ na ya ẹdẹ agbọn rẹn fi ohan ne ima, zẹ vbe emwi imuohan kevbe emwi izọ ese ne ọ winhin, ne ọ yẹ Osanobua.

I Samuẹl 2:28

I keghi hannọ ẹgbẹe ọghe ọe zẹ, vbe uwu ẹwae ni rre Izrẹl hia ne iran gha re ohẹn mwẹ, ne iran gha ga vbe Ogiukpo, ne iran gha giẹn eturari kevbe ne iran gha rhuan adaghọ ya nọ mwẹ ọta. I kevbe rhie asẹ ne iran, ne iran gha ghae vbe emwi ne a giẹn uan vbe aka.