Ẹksọdọs 20:2 - Edo Bible (E Baibol Ẹdo) Version 1996

² Mẹ ọrọre Nọyaẹnmwa Osanobua ruẹ ne ọ rhie ruẹ ladian hin otọe Igipt rre, lahin owa ọviọnmwa.

Ẹksọdọs 20:2 ပူးပေါင်းရင်းမြစ်များ

I Ọba 18:39

Emwa nii ghi miẹn emwi na, iran hia keghi dele gbe otọ, iran na datu wẹẹ, “E Nọyaẹnmwa ọrọre Osanobua, e Nọyaẹnmwa ọkpa ọrọre Osanobua!”

II Ọba 17:12

iran ma vbe họn ẹmwẹ ne Nọyaẹnmwa khare wẹ ne iran ghẹ ga ẹbọ.

II Ọba 17:7

E Sameria keghi de guọghọ ua, rhunmwuda ivbi Izrẹl sẹ ẹmwẹ e Nọyaẹnmwa ne Osanobua iran, ọmwa ne ọ wọlọ iran hin obọ ọba Igipt rre, ọ na viọ iran ladian vbe Igipt. Iran keghi ya gha ga ẹbọ ọvbehe.

II Krọnikol 28:5

Rhunmwuda ne Ehaz ne ọba na ru orukhọ, e Nọyaẹnmwa keghi gie obọ e Siria ke ukhunmwu ne ẹẹn vbe okuọ, ọ keghi vbe viọ ni bun vbe ivbi e Juda oghunmwu gha rrie Damaskọs. E Nọyaẹnmwa keghi vbe gie Pẹka ne ovbi e Remalaia ne ọba Izrẹl khọn miẹn Ehaz otọ ọ na gbele arriaisẹn iyehan (120,000) vbe uwu ivbiyokuo e Juda ni din sẹ vbe ẹdẹ ọkpa kẹkan. E Nọyaẹnmwa ne Osanobua avbe erha iran odede kue yọ ne emwi na sunu rhunmwuda ighẹ ivbi e Juda fi iyeke gbe irẹn.

Psalm 50:7

“Wa danmwehọ, wa ne emwa mwẹ I gha guan, I gha sẹ osẹ gbe uwa Izrẹl, mẹ ọrọre Osanobua Osanobua uwa.

Psalm 81:10

Mẹ ọrọre Nọyaẹnmwa ne Osanobua uwa, ne ọ viọ uwa ke otọe Igipt ladian, wa rhan unu uwa, I gha koko uwa.

Psalm 81:11

“Sokpan avbe emwa mwẹ I danmwehọ mwẹ, Izrẹl ma họn ẹmwẹ mẹ.

Psalm 81:7

Ẹghẹ ne uwa na gha rre uwu ọlọghọmwa, wa kpe tie mwẹ, I keghi miẹn uwa fan, ehe ne I lẹre yi vbe uwu okpẹhoho, ọ re I ke rhie ewanniẹn ne uwa, I keghi danmwẹ uwa ghe vbe ẹzẹ Mẹriba.

Ẹksọdọs 13:14

Ọ gha ghi sẹ ẹghẹ nii, a deghẹ ivbi uẹ ghi nọọn wẹẹ, ‘Vbe a ya ena kha yi?’ U ghi wanniẹn tama rẹn wẹẹ, ‘Ẹtin nọkhua ọre Nọyaẹnmwa ya viọ ima ke otọe Igipt ne ima na gha re eviẹn ladian.

Ẹksọdọs 13:3

E Mosis keghi khama emwa nii wẹẹ, “Wa ghi ya ẹdẹnẹrẹ na ne uwa kpao vbe otọ Igipt ẹro, ehe ne uwa na gha re eviẹn, rhunmwuda ẹrẹna ọrọre ẹdẹ ne Nọyaẹnmwa ya ẹtin nọkhua ẹre viọ uwa ladian. Wa gha rri ebrẹd ne ọ ma hue.

Ẹksọdọs 15:13

Wẹ nọ mu eyan ruẹn sẹ, u keghi su avbe emwa ne u dẹ werriegbe, ẹtin ruẹn ọre u ya ma iran odẹ, gha rrie owa ruẹ ne ọ huanrẹn.

Ẹksọdọs 15:16

Ohan kevbe orrirri hẹ rhu iran. Iran gualọ ẹtin ruẹn, izegbe zẹ iran zẹ vbe okuta, avbe emwa ruẹn te do gberra, avbe emwa ruẹn ne u dẹe ke ọviẹn ladian.

Ẹksọdọs 15:26

Ọ keghi kha wẹẹ, “A deghẹ wa họn ẹmwẹ mwẹ, mẹ ne Osanobua rua, ne uwa gha ru emwi ne imẹ ye obọ yi ne uwa gha ye uhi mwẹ rre, ne uwa vbe gha rhie uhi mwẹ hia mwẹ, mẹ i ra ye avbe emianmwẹ ne I mu yan ivbi Igipt rhọkpa rri uwa oya. Mẹ ọrọre Nọyaẹnmwa ne ọ mu uwẹ egbe rran.”

Ẹksọdọs 20:1

Osanobua keghi guan avbe ẹmwẹ na hia. Ọ wẹẹ.

Ẹksọdọs 29:46

Iran gha vbe rẹn wẹ mẹ ọrọre Nọyaẹnmwa ne Osanobua iran, ne ọ viọ iran ke Igipt ladian ne ọ do gha rre uwu ẹbu iran. Mẹ ọrọre Nọyaẹnmwa ne Osanobua iran.

Ẹksọdọs 6:6

Rhunmwuda ọnii, wẹ ghi ya tama ivbi Izrẹl wẹẹ, ‘Mẹ ọrọre Nọyaẹnmwa, I gha fannọ uwa ye otọ vbe obọ iwinna ekuẹnkuẹn ne ivbi Igipt ya ẹtin munọ uwa ya winna. I gha miẹn uwa fan hin uwu eviẹn ne uwa ye ne iran. I gha fannọ uwa ye otọ vbe ekpa ne I gha na tọn obọ mwẹ ne wegbe mu ne I ya rri iran oya nọ mu ohan.

Aizaia 43:3

Rhunmwuda mẹ ọrọre Nọyaẹnmwa ne Osanobua ruẹ, Osanobua nọhuanrẹn ọghe Izrẹl, ọmwa ne ọ miẹn ruẹn fan; I gha sẹ Igipt rae ne I miẹn ruẹn fan. I gha sẹ e Sudan kevbe Siẹba rae.

Jerimaia 16:14

E Nọyaẹnmwa khare wẹẹ, “Ẹghẹ dee ne emwa i ghi ra na gha ya eni mwẹ vẹn ihẹn wẹ Osanobua ne ọ rrọọ, ne ọ viọ ivbi Izrẹl ke otọe Igipt rre.”

Jerimaia 2:6

Iran ma zẹ yọmwẹ re. A gha rhe miẹn wẹ mẹ ọ re ọ fannọ iran ke Igipt ladian. I keghi su iran la otọ oha gberra otọe ne ato kevbe uye ekhae ye otọe ne ọ kae kevbe ne ọ vuọn ne ẹbe ehe ne ọmwa rhọkpa i ye ne a i vbe miẹn ọmwa ne ọ lae gberra ẹdẹ.

Jerimaia 31:1

E Nọyaẹnmwa khare wẹẹ, “Ẹghẹ dee ne I gha na gha re Osanobua ẹwae ne ọ rre Izrẹl hia, iran ghi vbe gha re emwa mwẹ.

Jerimaia 31:33

Ile ọgbọn ne I ghi ra gu ivbi Izrẹl ta, enian ọ khian gha ye, I gha rhie uhi mwẹ ye uwu iran, I ghi vbe gbẹnnẹ ọẹn ye iran ekhọe. Mẹ ghi gha re Osanobua iran, iran ghi gha re emwa mwẹ.

Jerimaia 34:13

ne Osanobua Izrẹl na tama mwẹ, wẹ ne I ya khama avbe emwa nii wẹẹ, “Ẹghẹ ne I na viọ avbe erha uwa odede ke Igipt ladian, I gu iran taa ile, I keghi fannọ iran ke ọviẹn ladian. I keghi tama iran wẹ,

Ezikiẹl 20:19

“Mẹ ọrọre Nọyaẹnmwa ne Osanobua rua. Wa gha ya uhi mwẹ kevbe iyi mwẹ ru emwi.

Ezikiẹl 20:5

Tama iran vbene I khare. Ẹghẹ ne I na hannọ Izrẹl zẹ, te I ve iran emwi. I rhie egbe mwẹ ma iran vbe Igipt, I keghi tama iran wẹẹ: Mẹ ọrọre Nọyaẹnmwa ne Osanobua rua.

Ezikiẹl 20:7

I keghi tama iran ne iran viọ ẹbọ osọnnọ ne iran ho ẹmwẹ ọnrẹn kua, kevbe ne iran ghẹ ye ẹbọ ohoghe ọghe Igipt mu awua ye egbe iran egbe, rhunmwuda, mẹ ọrọre Nọyaẹnmwa ne Osanobua iran

Hozia 12:10

“I gu avbe akhasẹ guaan, I keghi ya umian nibun ne iran miẹn, I keghi vbe la unu avbe akhasẹ bu emwa mwẹ ude yotọ khẹ ọ dee.

Hozia 13:4

E Nọyaẹnmwa khare wẹẹ, “Mẹ ọrọre Nọyaẹnmwa ne Osanobua rua ne ọ viọ uwa ke Igipt ladian. Wa imwẹ Osanobua ọvbehe gberra imẹ, mẹ ọkpa kẹkan ọ re ọ vbe re ọmiọnmwafan uwa.

Levitikọs 11:45

Mẹ ọrọre Nọyaẹnmwa ne ọ viọ uwa ke Igipt ladian, ne I mẹ sẹtin gha re Osanobua rua. Wa ghi gha re ne ọ huanrẹn, rhunmwuda ọmwa ne ọ huanrẹn mẹ khin.”

Levitikọs 19:36

Wa gha lo uwan ẹmwata, ukhuamwẹ ẹmwata ke omwa ẹmwata. Mẹ ọre Nọyaẹnmwa Osanobua rua, te I dẹ uwa ke otọ Igipt gha dee.

Levitikọs 23:43

Ne avbe ivbi uwa miẹn ehe na rẹn wẹẹ Nọyaẹnmwa ya ivbi Izrẹl di irhu ne a gbe ya vbe ẹghẹ ne ọ na viọ iran ke otọ Igipt ladian. Rẹn ọrọre Nọyaẹnmwa Osanobua rua.

Levitikọs 25:38

Vbene Nọyaẹnmwa Osanobua ruẹ khare ọre ọna khin, ọmwa ne ọ viọ uwa ke Igipt ladian, ne ọ miẹn ehe na rhie otọ Kenan ne uwa kevbe ne ọ vbe gha re Osanobua uwa.

Levitikọs 25:42

“Eviẹn ọghe Nọyaẹnmwa ọ re ivbi Izrẹl khin, rẹn ọ re ọ viọ iran ke Igipt ladian, a ghẹ khiẹn iran ya ru ọviẹn hiehiere.

Levitikọs 25:55

Ovbi Izrẹl i sẹtin gha re ọviẹn etẹbitẹ, rhunmwuda eviẹn Nọyaẹnmwa ọ re ivbi Izrẹl khin, rẹn ọ re ọ viọ iran ke otọ Igipt ladian, rẹn ọ re Nọyaẹnmwa Osanobua iran.”

Levitikọs 26:1

E Nọyaẹnmwa keghi kha wẹẹ, “Ghẹ ma amazẹ ra ama ọmwa, ọ re okuta ra okuta na a kare, ne uwa gha gae. Mẹ ọ re Nọyaẹnmwa Osanobua rua.

Levitikọs 26:13

Mẹ ne Nọyaẹnmwa Osanobua rua ọ re ọ viọ uwa ke Igipt ladian ne uwa ghẹ ghi gha re eviẹn ọvbehe. I guọghọ ẹtin ne ọ te de uwa ginna otọ, I na gie uwa gha khian vbe ne uwa na tọn uhunmwu uwa mu ẹsẹse.”

Emọs 2:10

I viọ uwa ke Igipt ladian, I na su uwa la ato gberra vbe ukpo iyeva, I na mu otọ ivbi Amọri ne uwa, ne ọ gha re ọwua.

Ebe ne Pọl gbẹẹn gie emwa Rom 10:12

Emwa hia ọre a kha, rhunmwuda alughaẹn i rrọọ ne Ju ra iran ne ẹ i re Ju, Osanobua ọrọre Nọyan ehia, ọ ghi vbe gha fiangbe iran hia ni datie ẹre wọrhọwọrhọ.

Ebe ne Pọl gbẹẹn gie emwa Rom 3:29

Ra ne ne Osanobua, Osanobua ọ ghe avbe Ju ọkpa nọ ra? Ẹ i re rẹn ọre ọ vbe re Osanobua avbe iran ne ẹ i re Ju ra? Ẹsẹse, rẹn vbe nọ.

Diuteronomi 13:10

Filo okuta gbe ẹe rua, te ọ te ho ne ọ bibi ruẹ odẹ hin ehe ne Nọyaẹnmwa Osanobua ruẹ ye rre, ọmwa ne ọfan-an vbe irri vbe Igipt ne uwẹ na te re ọviẹn.

Diuteronomi 15:15

Wa ghi yerre wẹ, eviẹn wa gha a khin vbe Igipt, e Nọyaẹnmwa ne Osanobua uwa keghi fannọ uwa kua, ọna ọ si ẹe ne I na rhie uhi na ne uwa.

Diuteronomi 20:1

“De ghẹ wa yo okuo, ne uwa ya gu eghian uwa gbinna wa na miẹn ikẹkẹ okuo kevbe ẹsin kevbe ivbiyokuo ni bun sẹ ọghe uwa, wa ghẹ gie ohan iran mu uwa. E Nọyaẹnmwa Osanobua rua ne ọ viọ uwa ke Igipt ladian, gha rrọ yaba uwa.

Diuteronomi 5:15

Yerre we eviẹn wa te vbe gha khin vbe otọ Igipt, kevbe wẹ mẹ ne Nọyaẹnmwa Osanobua ruẹ ọ re ọ ye ẹtin kevbe iwegbe mwẹ nọkhua fan uwa vbe irri. Ọnii ọ zẹe ne I na wẹ ne uwa gha zẹ nene ẹdẹ kọ ya hẹwẹ.

Diuteronomi 5:6

‘Mẹ ọrọre Nọyaẹnmwa Osanobua ruẹ, ne ọ fan uwa vbe irri lahin otọ Igipt ne uwa na te re eviẹn rre.

Diuteronomi 7:8

Sokpan e Nọyaẹnmwa ho ẹmwẹ uwa, ọ na wẹ rẹn gha vbe mu eyan ne ọ yan ma avbe erha uwa odede sẹ. Ọna ọ si ẹe ne ọ na ya ẹtin ẹnrẹn nọkhua miẹn uwa fan, ọ na fannọ uwa kua hin eviẹn ne uwa khin ne ọba Igipt rre.

Giọgis 2:1

Odibo e Nọyaẹnmwa keghi ke Gilgal kpao gha rrie Bokim, ọ Keghi tama ivbi Izrẹl wẹẹ “I viọ uwa ke Igipt ladian, I keghi viọ uwa gha die otọ ne I ve avbe erha uwa odede re. I keghi kha wẹẹ, ‘Mẹ I ra rra ile ne I gu uwa ta.

Giọgis 6:10

I tama uwa wẹ mẹ ọrọre Nọyaẹnmwa ne Osanobua uwa, kevbe wẹ ne uwa ghẹ gho ẹbọ avbe emwa Amọri ne uwa di otọ ẹre ya na. Sokpan, wa ma zẹ yọ mwẹ re.”