Ẹksọdọs 20:11 - Edo Bible (E Baibol Ẹdo) Version 1996

¹¹ Ẹdẹ ehan ọre mẹ ne Nọyaẹnmwa ya yi ẹrinmwi, agbọn, avbe okun kevbe emwi nii rre uwu iran hia, sokpan vbe ikpẹdẹ ne ne ogihinrọn, I keghi kẹtin. Ọnii ọ zẹe ne imẹ ne Nọyaẹnmwa na fiangbe Ẹdẹ Ikẹtin, I na ya ẹe khian ne ọ huanrẹn.

Ẹksọdọs 20:11 ပူးပေါင်းရင်းမြစ်များ

Gẹnẹsis 1:28

Ọ keghi fiangbe iran vbenian wẹẹ, “Wa ghi biẹlẹ emọ nibun vbe ne a gha na miẹn wẹ uniẹn ruan ghi gba ehe hia vbe agbọn, iran ghi gha khaemwisẹ ya rẹn. I rhie ẹtin nuẹn ya gha kha yan avbe ehẹn, avbe ahianmwẹ kevbe avbe aranmwẹ oha hia.

Gẹnẹsis 1:31

Osanobua keghi ghe emwi hia ne irẹn yi, ẹko ke sẹ ọre ọyẹnmwẹ ẹsẹse. Ẹdẹ ghi gbe ẹdẹ keghi mu, ọnii na gha re ikpẹdẹ ne ogiehan.

Ẹksọdọs 31:17

Ama etẹbitẹ nọ ne imẹ vbe Izrẹl rhunmwuda, mẹ ne Nọyaẹnmwa, ẹdẹ ehan ọre I ya yi ẹrinmwi kevbe agbọn, vbe ikpẹdẹ ne ogihinrọn, I keghi da obọ iwinna yi, I na hẹwẹ.’ ”

Ẹksọdọs 8:22

Vbe ẹdẹ ne ẹdẹrriọ, mẹ gha sẹ otọe Gosiẹn rae, ehe ne avbe emwa mwẹ ye, a ghi miẹn wẹ ikian i rre odọ, ne u miẹn ehe na rẹn wẹ mẹ ne Nọyaẹnmwa ọre ọ winna vbe ẹvbo na.

Ẹksọdọs 9:29

E Mosis keghi tama rẹn wẹẹ, “I gha wa da lahin adesẹ ore ẹvbo rre, I gha niẹn obọ ghe ehe ne Nọyaẹnmwa ye. Avan ne ukhumwu gha da obọ yi ayan i ghi ra vbe gha rrọọ ọvbehe, ne uwa miẹn ehe na rẹn ighẹ Nọyaẹnmwa ọre ọ yan agbọn na.

Aizaia 42:10

Wa so ihuan ọgbọn ghe Nọyaẹnmwa wa so ihuan urhomwẹ ọnrẹn, wa ne otọ agbọn hia. Wa rho ẹre, wa ni gua khian vbe okun wa rho ẹre, wa ne emwi ni rre amẹ, wa so ihuan, wa ne otọe urria kevbe emwa ni rrọọ hia.

Aizaia 48:13

Obọ mwẹ ọ re ọ gbe ẹyotọ agbọn ọ na vbe tan iso gbadaa. I gha gie ne a tie otọe kevbe iso, iran ghi rre vbe ọwarọkpa do rhie egbe ma.

Iwinna 14:15

“Iho mwa, vbọzẹ ne uwa na ru emwi na yi? Emwa kẹkan vbe ne uwa ye ọre ima vbe khin. Iyẹn Ne ọ maa ọre ima rre do kpe orhu ẹre vbe edinran, ne a miẹn ehe na fi uwa ekhọe werriẹ hin emwi akuọkan na rre ghe Osanobua ne ọ rrọọ, ọmwa ne ọ yi ẹrinmwi kevbe agbọn kevbe okun kevbe emwi hia ni rre uwu iran.

Iwinna 20:7

Vbe Ẹdẹ uzọla, ma keghi si egbe koko ne a rri evbare ivbiotu. Pọl kegha gu avbe emwa ni guan, ọ keghi guan rhinrin ya sẹ ogiasọn rhunmwuda rẹn gha kpao vbe ẹdẹ a gbe.

Iwinna 4:24

Iran ghi họn ẹmwẹ na, iran keghi ku urhu gbe ya na erhunmwu ghe Osanobua wẹẹ, “Ayi ne Ọ yi, nọ yan ẹrinmwi kevbe agbọn, okun kevbe emwi hia ni re uwu iran.

Diuteronomi 5:15

Yerre we eviẹn wa te vbe gha khin vbe otọ Igipt, kevbe wẹ mẹ ne Nọyaẹnmwa Osanobua ruẹ ọ re ọ ye ẹtin kevbe iwegbe mwẹ nọkhua fan uwa vbe irri. Ọnii ọ zẹe ne I na wẹ ne uwa gha zẹ nene ẹdẹ kọ ya hẹwẹ.

Hibru 4:4

Rhunmwuda vbe uwu ebe, iran guan kan ikpẹdẹ ne ogihinrọn, “Osanobua keghi hẹwẹ vbe iwinna rẹn hia.”

Arhie Maan 10:6

Ọ keghi ya eni Osanobua yan, ọmwa ne ọ rrọọ ẹdẹ kevbe ẹdẹdẹmwẹdẹ, ọmwa ne ọ yi ẹrinmwi kevbe emwi hia ni rre uwu ẹre, agbọn kevbe emwi hia ni rre uwu ẹre, okun kevbe emwi hia ni rre uwu ẹre. Odibosa nii keghi kha wẹẹ, “A i ghi si ẹe kpẹe vbe otọ ọvbehe.