Ẹksọdọs 16:23 - Edo Bible (E Baibol Ẹdo) Version 1996

²³ Rẹn keghi tama iran wẹẹ, “Iyi ne Nọyaẹnmwa yi ọna khin. Ẹdẹ ikẹtin ọre ẹdẹ ne akhuẹ khin, ẹdẹ ne ọ huanrẹn ọghe ikẹtin ne a ya fiohan ne Nọyaẹnmwa. Wa fian ebrẹd ne uwa gha fian ne uwa vbe le emwi ne uwa gha le. Emwi ne ọ ghi kẹrre hia, wa ya iran gba khua hin rre khẹ ẹdẹnakhuẹ.”

Ẹksọdọs 16:23 ပူးပေါင်းရင်းမြစ်များ

Nehimaia 9:13

Vbe Oke Sainai, u ke ẹrinmwi tuorre u gu emwa ruẹn guan u keghi rhie uhi esi ne iran kevbe iruemwi ne ọ gbae. U keghi rhie Uhi ruẹ ne Mosis ne ọguọmwadia ruẹ, ne ọ viọ gie iran. Amẹ ke uwu okuta ladian vbe ohanmwẹ amẹ gbe iran.

Nehimaia 9:14

U ma iran ẹre ne iran gha ya Ẹdẹ ikẹtin ru emwi ni huanrẹn u na rhie uhi ruẹ la obọ Mosis ne ọguọmwadia ruẹ gie iran.

Ẹksọdọs 16:19

E Mosis keghi tama iran wẹẹ, “Ọmwarhọkpa ghẹ rhie vbọ hin rre khẹ akhuẹ.”

Ẹksọdọs 23:12

“Wa ghi ya ikpẹdẹ ehan winna sokpan vbe ikpẹdẹ ne ogihinrọn, wa ghẹ winna ne ẹmila uwa kevbe ekẹtẹkẹtẹ uwa miẹn ehe na hẹwẹ ne avbe eviẹn kevbe orhunmwuyẹn miẹn ehe na koko ẹtin.

Ẹksọdọs 31:15

Ikpẹdẹ ehan ọre uwa gha ya gha winna iwinna uwa, sokpan ẹdẹ ne ogihinrọn, ẹdẹ ọghe ikẹtin ọre nọ, ne ọ huanrẹn nọ ne Nọyaẹnmwa. Omwa ne ọ rhirhi winna vbe ẹdẹ rriọ a ghi gha gbe ẹe rua.

Jerimaia 17:22

Ra ne iran vbe mu emwikemwi ladian vbe owa iran vbe Ẹdẹ Ikẹtin, iran ghẹ winna vbe Ẹdẹ Ikẹtin. Iran ghi ya ẹe ru ẹdẹ nọhuanrẹn, zẹ vbe ne I tama avbe erha iran odede.

Levitikọs 23:3

Ikpẹdẹ ehan ọre uwa mwẹ ne uwa gha ya gha winna iwinna uwa, sokpan wa ghi yerre wẹ ẹdẹ ne ogihinrọn, ẹdẹ ikẹtin nọ. Vbe ẹdẹ nẹdẹrriọ, wa ghẹ winna, sokpan wa ghi si koko ne uwa ru ugamwẹ, Nọyaẹnmwa ọ re ọ yan ẹdẹ ikẹtin, ehe ne u rhirhi gha ye.

Nọmbas 11:7

Mana keghi yevbe ọmọ erhan negiẹrẹ ne ọ mwẹ egbe ne ọvboro kherhekherhe.

Nọmbas 11:8

Emwa ni ghi ya rhọ ẹre, iran ghi lọe ra ne iran dunmwu ẹre irhuarhua, a ghi do lẹe, a ghi ya fian eka ne parhaparha. A gha ghe ẹre ọ ghi ye vbe ebrẹd ne a ya ofigbọn oliv gbe a ke lẹe. Evbu ne ọ tuo ọre nene mana lele dele ye agọ nii vbe asọn.

Iyẹn ne ọ Maan Ọghe Luk 23:56

Iran na dọlegbe gha rrie owa, iran keghi ya le ori ne ọ winhin kevbe emwi ne ọ winhin ọvbehe ne a ra ya wo egbe Jesu, ọ ghi sẹ Ẹdẹ Ikẹtin, iran keghi kẹtin zẹ vbe ne Uhi khare.

Diuteronomi 5:12

“ ‘Gha zẹ Ẹdẹ ikẹtin kọ ne u ya fi ohan mẹ zẹ vbe ne imẹ ne Nọyaẹnmwa Osanobua ruẹ tama ruẹn.

Arhie Maan 1:10

Vbe Ẹdẹ Nọyaẹnmwa, Orhiọn keghi hin yan mwẹ, I keghi họn urhu ne ọ la ọkpa ne ọ davan zẹ vbe okpe, ọ kegha guan vbe iyeke mwẹ.