Ẹksọdọs 12:29 - Edo Bible (E Baibol Ẹdo) Version 1996

²⁹ Ọ ghi sẹ ogiasọn, e Nọyaẹnmwa keghi gbele avbe emọ ọdiọn nii rre Igipt, ke egbe ovbi ọba Igipt ne ọdiọn ne ọ ra rriọba lele ẹe kpao, sẹ egbe ọmọ ọdiọn ọghe oleghan ne ọ rre uwu ẹwẹdọ uhae, emọ ne avbe aranmwẹ ka biẹlẹ, a kevbe gbele ehia a.

Ẹksọdọs 12:29 ပူးပေါင်းရင်းမြစ်များ

Gẹnẹsis 15:14

Sokpan mẹ gha rri ẹvbo ne ọ ru iran emwi na oya, iran ghi miẹn iran emwi ẹfe ne ọ kpọlọ vbe iran a khian kpao vbe ọfumwegbe.

Job 34:20

Ọmwa sẹtin wa wu uwu udomwurri vbe asọn, Osanobua sẹtin kinmwi emwa fua, iran ghi la ọrhiae rrie, ọmwa ne ọ wegbe i vbe zẹdẹ lọghọ irẹn ugbemwẹ hiehiere.

Psalm 105:36

Ọ gbele emọ ikpia ni re emọdiọn, ọghe ẹgbẹe ni rre otọe Igipt hia.

Psalm 135:8

Ọ gbele emọdiọn ni rre Igipt hia, ọghe emwa nagbọn kevbe ọghe avbe aranmwẹ.

Psalm 136:10

Ọ gbele emọdiọn ọghe ivbi Igipt, etẹbitẹ ọ re ahoẹmwọmwa rẹn khin.

Psalm 78:50

Ọ ma vbe gbe ibiẹ rriẹ vbe ohu nii, ra ne ọ vbe fi yi vbe uwu iran, sokpan, ọ keghi ya egboghogbogho lọkọ iran an.

Psalm 78:51

Ọ gbele avbe emọdiọn, vbe ẹgbẹe ni rre Igipt hia.

Ẹksọdọs 11:1

E Nọyaẹnmwa keghi tama e Mosis wẹẹ, “Oya ọkpa kẹkan ọre I ghi ra rri ọba Igipt kevbe ivbi Igipt re. Iyeke ọnii, ọ gha gie uwa kpao. Vbe ne ẹmwata ẹghẹ ne ọ gha na gie uwa kpao, te ọ ra khulo uwa ladian mwa.

Ẹksọdọs 12:12

“Vbe asọn nii, I gha la otọ Igipt gberra, I ghi gbele emọ ọdiọn ni re ikpia hia vbe otọe nii, kevbe ọghe emwa nagbọn kevbe ọghe emwirri. I gha rri avbe ẹbọ nii rre Igipt oya. Mẹ ọrọre Nọyaẹnmwa.

Ẹksọdọs 12:28

Ivbi Izrẹl kegha khian ya ru zẹ vbene a khare. Iran keghi ru zẹ vbene Nọyaẹnmwa tama e Mosis kevbe Errọn.

Ẹksọdọs 13:15

Ugbẹn vbe ọba Igipt ghi yin ehọ, vbene ọ ma na gie ima kpao, ọre Nọyaẹnmwa na gbele emọ ọdiọn nii re ikpia nii rre otọ Igipt hia, ọghe emwa nagbọn kevbe ọghe emwirri. Ọ nii ọ si ẹe ne ima na ya emọdiọn nii re ọwọe zọ ese ghe Nọyaẹnmwa sokpan a ghi dẹlẹ ivbi mwa nikpia ne ọdiọn werriegbe.

Ẹksọdọs 4:23

I tama ruẹn ne u gie ovbi mwẹ gha khian ne ọ ya ga mwẹ sokpan u keghi he. Wanwanna nian, mẹ gha gbe ovbi uẹ ne okpia ne ọdiọn.’ ”

Ẹksọdọs 9:6

Vbe ikpẹdẹ ne ọ lele ẹe, e Nọyaẹnmwa keghi ru zẹ vbene ọ khare, emwirri ivbi Igipt hia keghi wulo, sokpan ne ọ wu vbe emwirri ivbi Izrẹl i rrọọ.

Aizaia 24:22

Osanobua silo avbe ọba koko ye uwu uvun zẹvbe oleghan. Ọ gha khui iran ye uwu ẹwẹdọ rhinrin ọ te do sẹ ẹghẹ ne a gha ya rri iran oya.

Aizaia 41:11

“Iran ni gu uwa mu ohu gha rẹn emwiekhue a khọn miẹn ọmwa otọ. I ran ni gu uwa gbinna gha wulo.

Aizaia 51:14

A gha rherhe fannọ iran ni re oleghan kua, iran gha wa tọ iran ghi vbe gha mwẹ evbare ne iran ho hia.

Jerimaia 38:13

Iran keghi sii mwẹ ladian hin uwu uhae nii rre. Vbe iyekọni, a na ghi da mwẹ yi ye uwu ẹguae.

Jerimaia 38:6

Rhunmwuda ọnii, iran keghi mu mwẹ. Iran keghi ya irri mu mwẹ fi uwu uhae e Malkaia ne Okoro, ore ẹguae ọ re nene uhae ye. Amẹ i ghi rre nene uhae, ekhuọrhọ okpa ọ re ọ ghi rrọọ, ọ keghi ziẹn mwẹ.

Habakọk 3:5

Ọ gie emianmwẹ ke odaro irẹn ọ na wẹ ne uwu lele irẹn iyeke.

Zẹkaraia 9:11

E Nọyaẹnmwa khare wẹẹ, “Rhunmwuda ile ne I gu uwa ta, ne a ya esagiẹn izọese ye ẹre okhi, I gha fannọ emwa ruẹn kua. Lahin otọe uvun iwe ne amẹ i ye rre.

Nọmbas 33:4

Vbe iran wa re emọ ọdiọn iran ne Nọyaẹnmwa gbele ua. Ọ keghi ye emwi ne ọ ru na rhiema wẹ rẹn mwẹ ẹtin sẹ avbe ẹbọ Igipt.

Nọmbas 8:17

Ẹghẹ ne I na gbele emọ ọdiọn vbe Igipt, I keghi ya emọ ọdiọn ikpia ọghe ivbi ẹgbẹe Izrẹl fi ohan zẹ vbe ọghomwẹ, deba emọ ọdiọn ọghe aranmwẹ.

Hibru 11:28

Iyayi ọre ọ ya mu emwiukpo Alagberra gbọọ, ọ na wẹ ne a sanmwẹ esagiẹn ye onurho ne ogiuwu ghẹ gbele emọ ọdiọn ọghe Izrẹl.

Hibru 12:23

Wa kegha die uwu ẹbu oghọghọ ivbi Osanobua nii, ke aro emwa ne a gbẹnnẹ eni iran ye otọ vbe ẹrinmwi. Wa keghi hu Osanobua ne ọre ne ọ bu ohiẹn emwa hia gha dee ke ẹe kevbe orhiọn avbe emwa ẹmwata ne a ya khian ne ọ fo na.