Ẹfisọs 4:5 - Edo Bible (E Baibol Ẹdo) Version 1996

⁵ Nọyaẹnmwa ọkpa ọre ọ rrọọ, iyayi ọkpa, isamẹ ọkpa.

Ẹfisọs 4:5 ပူးပေါင်းရင်းမြစ်များ

Zẹkaraia 14:9

Ẹghẹ nii e Nọyaẹnmwa ghi gha re ọba yan otọ agbọn hia, emwa hia gha ga ẹe zẹ vbe Osanobua, iran ghi vbe gha ya eni ọkpa tie ẹre.

Matiu 28:19

Wa bu emwa hia gha rrie ehe hia ne uwa ya gha ya iran khian erhuanegbe mwẹ, wa gha samẹ ne iran vbe Eni ọghe Erha, kevbe Ọmọ kevbe ọghe Orhiọn Ne Ọ Huanrẹn.

Iwinna 10:36

Wa rẹn uhunmwu ne ọ gie gie emwa Izrẹl ne ọ na gha wewe Iyẹn Ne ọ maa ọghe ọfumwegbe la ekpa Jesu Kristi ne ọre Nọyan emwa hia.

Iwinna 2:36

“Rhunmwuda ọnii, wa ne ivbi Izrẹl, wa hia rẹn nian wẹẹ, Jesu nii ne uwa kan mu ugbugbe, Osanobua ya ẹe khian Nọyaẹnmwa kevbe Mẹzaia nẹ.”

Ebe ne Pọl gbẹẹn gie emwa Rom 3:30

Ọkpa ọre Osanobua khin. Rẹn gha ye avbe Ju khian emwata vbe odaro ẹre zẹ vbene iyayi iran kha re, ọ ghi vbe ye avbe iran ne ẹ i re Ju khian emwata vbekpa iyayi iran.

I Kọrinti 1:13

Te a ghi ghae Kristi ye otu ra! E Pọl ọre ọ wu ne uwa vbe uhunmwu ugbugbe ra? Te a sa amẹ ne uwa ne uwa gha re erhuanegbe Pọl ra?

I Kọrinti 1:2

gie esọsi Osanobua ne ọ rre Kọrinti, gie emwa ne a tie re ne iran do gha re emwa ni huanrẹn Osanobua, emwa ni khian ọghọe rhunmwuda ighẹ iran ya egbe ba Kristi Jesu, deba emwa hia ni ghi na erhunmwu ghe Nọyaẹnmwa Jesu Kristi nẹ, zẹ vbe Nọyan iran kevbe ima.

I Kọrinti 12:13

Erriọ ọre ọ ye ne ima hia, e Ju kevbe ne ẹ i re Ju, eviẹn kevbe ne ẹ i re eviẹn, a sa amẹ ne ima ye uwu egbe ọkpa nii nẹ vbe ekpa Orhiọn ọkpa nii, a keghi vbe rhie Orhiọn ọkpa nii ne ima hia wọn vbọ.

I Kọrinti 12:5

Odẹ ne a la ga ughughan ọre ọ rrọọ, sokpan Nọyaẹnmwa ọkpa ọre a yae ga.

I Kọrinti 8:6

Sokpan Osanobua ọkpa ma mwẹ, ọnii ọ re Evbavba ne ọ yi emwi hia, ọmwa ne ima rre agbọn na, Nọyaẹnmwa ọkpa kẹkan ọre ọ vbe rrọọ, ọnii ọrọre Jesu Kristi, ọmwa ne a la ekpa ẹre yi emwi hia, ọmwa ne ima la ekpa ẹre vbe rre agbọn.

II Kọrinti 11:4

Rhunmwuda, ẹko rhiẹnrhiẹn mwẹ ọre uwa ya rhie ẹghẹ ne ọmwaikọmwa ne ọ rre do kpe orhu Jesu ọvbehe ma uwa, ẹ i re ne ima kpe orhu ẹre, wa ghi vbe gha rhan obọ miẹn orhiọn kevbe iyẹn ne ọ maa ne ọ lughaẹn ne Orhiọn kevbe iyẹn ne ọ maa ne uwa rhie vbe obọ ima!

Galatia 5:6

Rhunmwuda, ma gha kugbe ba Kristi Jesu nẹ, a rhuẹ, ra ma rhuẹ, i ghi mwẹ esa ne ọ ye, emwi ne a kha ọrọre iyayi ne ọ winna vbe ekpa aho ẹmwẹ ọmwa.

Ẹfisọs 4:13

Erriọ, ma hia gha koko gha die a re ọkpa vbe uwu iyayi mwa, kevbe uwu vbene ima rẹn ovbi Osanobua, ma ghi do khian ikpia ni sẹ ihe okpia, ma te do sẹ uyomwẹ uvuọnmwẹ omwa vbe ne Kristi ye.

Filipai 2:11

Ehia ghi vbe yae go vbe azagba wẹ, Jesu Kristi ọrọre Nọyaẹnmwa ne uyi ọghe Osanobua e Evbavba.

Filipai 3:8

Ẹ i re avbe emwi nii ọkpa, te I ghi ka emwi hia ye ọ rhiae rhunmwuda emwi ọvbehe ne ọ ru ighobioye sẹẹ enii, ọnii ọrọre, a rẹn Kristi Jesu Nọyaẹnmwa. Rhunmwuda ẹre, I keghi filo emwi hia kua, I keghi ka ehia ye emwi ne ẹ i mwẹ esa, ne I miẹn ehe na gha mwẹ Kristi.

Taitọs 1:1

E Pọl ne ọguọmwadia Osanobua, kevbe ukọ ọghe Jesu Kristi, ọre ọ gbẹn ebe na rre. Te a hannọ mwẹ zẹ, a na vbe gie mwẹ wẹ, ne I ya ru iyobọ ne iyayi emwa ne Osanobua hannọ zẹ, kevbe ne I vbe dia iran ye odẹ ẹmwata, zẹ vbene iwinna ugamwẹ mwa ma emwa ẹre.

Taitọs 1:4

I gbẹn ebe gie Taitọs ne ovbi mwẹ ne ovbi mwẹ vbe ekpa iyayi ne ima gba yaẹn. Osanobua ne Erha kevbe Kristi ne Ọmiọnmwafan mwa ne ọ rhie ẹsọhẹ kevbe ọfumwegbe nuẹn.

Hibru 13:7

Wa ye avbe ọkaolotu uwa ni karo rre, iran ni kpe orhu Osanobua ma uwa. Wa roro ẹe, vbe ne iran ya yin hẹ, kevbe vbene iran ya wulo hẹ, ne uwa gha ye egbe ta iran vbe ẹmwẹ iyayi.

Hibru 6:6

Vbe iyeke ọna, iran keghi lahin iyayi iran rre. Ẹ ghi gia ru ne a viọ iran werriegbe rre do roiro fi uyinmwẹ werriẹ, rhunmwuda, te iran vbe dọlegbe kan Ovbi Osanobua mu ugbugbe, iran keghi fa ẹre ua vbe sirra emwa hia.

Jems 2:18

Sokpan orhiọnkpa sẹtin kha wẹ, “Wẹ mwẹ iyayi, mẹ mwẹ iwinna.” Ewanniẹn mwẹ ọrọre wẹ, “Tama mwẹ vbene u gha sẹtin gha mwẹ iyayi hẹẹ vbene iwinna ina rrọọ, mẹ gha ya iwinna rhie iyayi mwẹ ma ruẹn.”

I Pita 3:21

Amẹ na keghi re emwikemwi ne a ya gie isamẹ ne ọ miẹn uwa fan banbanna nian, ẹ i re vbe ekpa ne ọ na kpe iruẹn ne ọ rre ikinnegbe kua, sokpan vbe ekpa eyan ne a ya ekhọe ne ọ ma bu abe gbe ọmwa yan ma Osanobua. Te isamẹ la ekpa arhiọkpaegbe Jesu Kristi miẹn uwa fan.

II Pita 1:1

E Saimọn Pita ne ọguọmwadia kevbe ukọ Jesu Kristi, ọre ọ gbẹn ebe na gie avbe emwa ni ne a la ekpa ẹmwata Osanobua mwa kevbe Jesu Kristi Ọmiọnmwafan mwa rhie iyayi ighobioye ne ọ vbe ye vbe ọghomwa na nẹ.

Ebe ne Jud gbẹẹn 1:20

Sokpan zẹ vbe ọghe uwa, wa ne ọse mwẹ, wa gha wo ye egbe vbe emwi iyayi uwa ne ọ huan sẹ. Wa gha na erhunmwu vbe ẹtin Orhiọn Ne Ọ Huanrẹn.

Ebe ne Jud gbẹẹn 1:3

Wa ne ọse mwẹ ni ghan, ẹghẹ ne I na wa gha hia ne I gbẹn ebe gie uwa, vbe ekpa imiẹnfan ne ọre ọghe ima hia, ọre ọ na wa do la mwẹ ekhọe ne I gbẹn ebe gie ua, ne I ya rhie igiẹdu ne uwa, ne uwa gha gbinna nẹẹn khian ighẹ iyayi ni ne Osanobua rhie ne emwa rẹn hia uhukpa nii.