Ẹfisọs 3:17 - Edo Bible (E Baibol Ẹdo) Version 1996

¹⁷ Kevbe, wẹ ne Kristi la ekpa iyayi bọ owa ẹre ye uwu uwa, I vbe na erhunmwu wẹ, ne uwa gbe inian, kevbe ne uwa gbe ẹyotọ uwa yan aho ẹmwẹ ọmwa.

Ẹfisọs 3:17 ပူးပေါင်းရင်းမြစ်များ

Aizaia 57:15

“Mẹ ọrọre Osanobua ne ọ yo kevbe ne ọ kpọlọ ne ọ rrọ ẹdẹdẹmwẹdẹ. Ehe ne ọ yo kevbe ne ọ huanrẹn ọ re imẹ dia, sokpan mẹ vbe di ọghe iran ni mu egbe rriotọ, kevbe ni roiro fi uyinmwẹ werriẹ ya, ne imẹ miẹn ehe na rhie idaehọ kevbe imuẹntiyan ọghe iran werriegbe ye ihe.

Matiu 13:6

Ugbẹn vbe ovẹn ghi yunmwu, ọ keghi luẹluẹ, ukhu ẹre ne ọ da zọọ keghi kakaa rhunmwuda inian rẹn ma he la otọ dinmwi.

Iyẹn ne ọ Maan Ọghe Luk 6:48

Ọ yevbe okpia ne ọ bọ owa, ọ gbe olu ẹre dinmwi, ọ na gbe ẹyotọ ẹre yan okuta. Ẹzẹ keghi ro vẹ la oke, vbene ọ bi owa ni sẹ, ọ ma rueghe rhunmwuda a bọ ẹe ẹse.

Iyẹn ne ọ Maan Ọghe Jọn 14:17

Agbọn i sẹtin rhan obọ miẹn ẹnrẹn rhunmwuda ighẹ agbọn i sẹtin dẹghe ẹre amawẹ, ọ gha rẹn ọnrẹn. Sokpan wa rẹn ọnrẹn, rhunmwuda, ọ gu uwa ọ vbe rre uwu uwa.

Iyẹn ne ọ Maan Ọghe Jọn 14:23

Jesu wanniẹn wẹẹ, “Ọmwa ne ọ rhirhi ho ẹmwẹ mwẹ gha ru vbene I khare, Erha mwẹ gha ho ẹmwẹ ọnrẹn, kevbe imẹ kevbe Erha mwẹ ghi bu ẹre gha dee, ma ghi do di owa ẹre ya.

Iyẹn ne ọ Maan Ọghe Jọn 17:23

Mẹ vbe uwu iran, wẹ vbe uwu imẹ, ne iran miẹn ehe na wa gha re ọkpa, ne agbọn miẹn ehe na rẹn ighẹ wẹ ọre ọ gele gie mwẹ, kevbe wẹ zẹ vbene u ho ẹmwẹ mwẹ, erriọ ọre u vbe ho ẹmwẹ iran.

Iyẹn ne ọ Maan Ọghe Jọn 6:56

Ọmwa ne ọ rri efun egbe mwẹ, ọ na vbe wọn esagiẹn mwẹ, rre uwu imẹ, mẹ vbe rre uwu irẹn.

Ebe ne Pọl gbẹẹn gie emwa Rom 5:5

Idaehọ na ẹ i hiẹ ọmwa, rhunmwuda Osanobua tue ahoẹmwọmwa ẹnrẹn ye ima ekhọe nẹ vbekpa Orhiọn Ne Ọ Huanrẹn ne Osanobua ya ru ima ẹse.

I Kọrinti 3:6

Me kọ emwiokọ, Apọlọs keghi gbe amẹ khakhae. Sokpan Osanobua ọre ọ ru ẹe ne ọ na zọọ.

I Kọrinti 8:1

Vbe ekpa emwi ne a ya ru ẹbọ: Ẹmwata nọ wẹ, “ma hia ọre ọ rẹn emwi,” zẹ vbe ne itan kha re. Sokpan egbe irẹnmwi vberriọ, uhiomwẹ ọre ọ si ye ọmwa egbe, sokpan ahọ ẹmwẹ ọmwa ọre ọ de ọmwa igiẹ.

II Kọrinti 13:5

Wa tobọ uwa gualotọ egbe uwa, ne uwa ghe ẹre deghẹ wa gele rrọọ vbe uwu iyayi. Iyayi ighẹ wa rẹnrẹn ighẹ Jesu Kristi re uwu uwa? Sokpan a ma gha kha ighẹ uwa wa ba odẹ ku nẹ.

II Kọrinti 6:16

Vbe Ọgua Osa kevbe amazẹ ọghe iran nigẹbọ ra ya gue obọ egbe hẹ yi? Rhunmwuda Ọgua osa ọghe Osanobua nọ rrọọ, ọre ima khin. Zẹ vbe ne Osanobua tobo ẹre kha re: “I gha bọ owa mwẹ ye ehe ne iran ye. I ghi yin ehe ne iran ye. Mẹ ghi gha re Osanobua iran, iran ghi gha re emwa mwẹ.”

Galatia 2:20

Ọre a ghi na miẹn nian wẹ, ẹ i re imẹ ọre ọ ghi rre agbọn ọvbehe, sokpan Kristi ọre ọ rre agbọn vbe uwu imẹ vbene I ghi ya rre agbọn na nian, iyayi ọre I ghi ya rrọọ vbe uwu ovbi Osanobua, ọmwa ne ọ ho ẹmwẹ mwẹ, ọ na rhie ẹdẹ agbọn rẹn mẹ.

Galatia 5:6

Rhunmwuda, ma gha kugbe ba Kristi Jesu nẹ, a rhuẹ, ra ma rhuẹ, i ghi mwẹ esa ne ọ ye, emwi ne a kha ọrọre iyayi ne ọ winna vbe ekpa aho ẹmwẹ ọmwa.

Kọlose 1:23

Ne ẹ i mwẹ a ma ru nọ khekherriọ, ne uwa gha mwẹ iyayi khian vbe uhunmwu ẹyotọ ne ọ de ziẹn kevbe ne gbain, ne uwa ghẹ gie a bẹghe uwa hin idaehọ ne uwa miẹn rhie ẹghẹ ne uwa na họn iyẹn ne ọ maa. Iyẹn ne ọ maa na ọre imẹ ne Pọl khian ọguọmwadia ẹre, iyẹn ne ọ maa na ne a kpe orhu ẹre ma emwa hia ni rre agbọn na nẹ.

Kọlose 1:27

Rhunmwuda nene emwamwa ọghe Osanobua ọre ọna khin. Ne ọ we oro ẹre rua ma emwa irẹn, oro emwi ighobioye kevbe uyi ne ọ viọ khẹ emwa rẹn hia. Nene oro ọna khin: Kristi rre uwu uwẹ, ọnii rhie maa wẹ, te a ghi ra ghae su uẹ egbe vbe uyi Osanobua.

Kọlose 2:7

Wa gie inian uwa dinmwi ye uwu irẹn, wa hẹnhẹn ẹdẹ agbọn uwa yan irẹn, ne uwa gha wegbe yọ vbe uwu iyayi uwa, zẹ vbene a ma uwa ẹre. Wa gie ẹko uwa vuọn ne ekpọnmwẹ.

I Jọn 4:16

Ma tobọ mwa rẹnrẹn, ma keghi vbe yae yi ighẹ aho ẹmwẹ ọmwa ne Osanobua mwẹ ghe mwa. Aho ẹmwẹ ọmwa ọre Osanobua khin, ọmwaikọmwa ne ọ rre uwu aho ẹmwẹ ọmwa ọ rre uwu Osanobua, Osanobua vbe rre uwu irẹn.

I Jọn 4:4

Sokpan, wa ne ivbi mwẹ, ọ ghe Osanobua ọre uwa khin, wa vbe munọ avbe akhasẹ ohoghe gbe otọ nẹ, rhunmwuda Orhiọn ne ọ rre uwu uwa wo vbe egbe sẹ orhiọn ne ọ rre uwu iran ni re ọ ghe agbọn na.

Arhie Maan 3:20

Dọ re! I mudia ye onurho gha so obọ, a deghẹ ọmwaikọmwa ghi họn, ọ na kie ẹre mẹ, I gha bu ẹre la owa, I ghi gu ẹe rri evbare, rẹn ghi vbe gun mwẹ rri evbare.