6 Rhunmwuda onii khekherriọ, wa gha ru vbene uhi e Nọyaẹnmwa khare, ne uwa vbe gha mu ohan rẹn.
Ne emwa ruẹn miẹn ehe na gha mu ohan ruẹn, ne iran vbe gha họn ẹmwẹ ne uẹn vbe ẹghẹ hia ne iran gha ya vbe otọe nii ne u mu ne avbe erha mwa odede.
Afiangbe ọrọre ọghe iran ni ye ọghọ ne Nọyaẹnmwa, iran ni lele iyi ẹre ru emwi.
U ghi vbe ma iran avbe iyi kevbe uhi Osanobua, u ghi vbe rhan otọ re vbene iran gha ya gha yin kevbe vbene iran gha ya ru emwi hẹ ma iran.
Iran eva kegha yin ẹse vbe odaro Osanobua. Iran kegha ye iyi ke ilele Osanobua hia ru emwi.
Vbọ rrọọ nian akpawẹ erriọ ekhọe iran ra gha ye ẹdẹ, vbọrrọ akpawẹ iran gha lohan mwẹ ne iran vbe gha rhie uhi mwẹ mwẹ! Ne agbọn miẹn ehe na ma iran kevbe uniẹn ivbi iran ẹdẹdẹmwẹdẹ.
Gha ye ehia ru emwi, ne agbọn miẹn ehe na ma uwa, wa ghi miẹn ehe na gha rre otọ ne uwa ra ya yin khian rhinrin.
Wa ye rre wẹ te Nọyaẹnmwa gha dia rua, ọ na vbe gha rri uwa oya zẹ vbene erha gbele ivbi ẹre hin ọkhọ rre zẹẹ.
Otọe esiesi ẹre Nọyaẹnmwa viọ uwa rrie, otọe ne avbe ẹzẹ nekhua kevbe ne giẹrẹ ye, ke ẹzẹ ni le la uwu otọ ni vbe ya gha vẹ ladian vbe iya kevbe oke.
Wa gha mu ohan e Nọyaẹnmwa ne uwa ya ekhọe uwa hia ya ẹko ata ga ẹe. Wa ya emwi nekhua ne ọ ru ne uwa rre.