Diuteronomi 4:1 - Edo Bible (E Baibol Ẹdo) Version 1996

¹ Ẹre Mosis na tama emwa nii wẹẹ, “Wa gha mu uhi hia ne I rhie ne uwa sẹ, wa gha rre agbọn, wa ghi vbe yin otọe nii ne Nọyaẹnmwa ne Osanobua avbe erha uwa odede ra mu ne uwa.

Diuteronomi 4:1 ပူးပေါင်းရင်းမြစ်များ

Psalm 105:45

Ne avbe emwa rẹn, miẹn ehe na gha ya uhi ẹre ru emwi ne iran vbe rhie iyi ẹre hia mwẹ. Wa rho e Nọyaẹnmwa!

Psalm 119:4

Nọyaẹnmwa, wẹ rhie uhi ruẹ ne ima nẹ, u na wẹ ne ima gha ya ẹe ru emwi ekhọe kekhọe.

Ẹksọdọs 18:20

U ghi vbe ma iran avbe iyi kevbe uhi Osanobua, u ghi vbe rhan otọ re vbene iran gha ya gha yin kevbe vbene iran gha ya ru emwi hẹ ma iran.

Jerimaia 11:6

Ẹre Nọyaẹnmwa na tama mwẹ wẹẹ, “Gha rrie avbe ore nọkhua ọghe Juda kevbe avbe idunmwu ni rre Jerusalẹm. Ya ta uhunmwu ne I giee vbe evba, ma emwa nii ne iran danmwehọ ẹmwẹ ne a ta ye nene ile, ne iran gha ya ẹe ru emwi.

Ezikiẹl 11:20

Ẹghẹ nii, iran gha rhie uhi mwẹ mwẹ, iran ghi vbe ya iyi mwẹ hia ru emwi vbe ẹko ata. Iran ghi gha re emwa mwẹ, mẹ ghi vbe gha re Osanobua iran.

Ezikiẹl 20:11

I yi iyi mwẹ ma iran, I keghi vbe ma iran uhi mwẹ ne ọ rhie arrọọ ne ọmwaikọmwa ne ọ yae ru emwi.

Ezikiẹl 20:21

Sokpan, orre nii keghi vbe yagha mwẹ. Iran rra uhi mwẹ, iran ma ya iyi mwẹ ru emwi, iyi ne ọ rhie arrọọ gie ọmwaikọmwa ne ọ ya ẹe ru emwi. Iran mu Ẹdẹ Ikẹtin rhia. Mẹ te wa mu egbe ne I gie iran họn ẹmwẹ obọ ohu mwẹ vbe egbe vbe uwu ato vba, ke ne I wa gbele iran hia a.

Ezikiẹl 36:27

I gha rhie orhiọn mwẹ ye uwu uwa, I ghi vbe miẹn wẹ wa ya uhi kevbe iyi mwẹ ru emwi.

Ezikiẹl 37:24

Ọba ne ọ yevbe Devid ne ọguọmwadia mwẹ ghi gha re ọba iran. A gha si iran hia koko ye ototọ enọkhaemwisẹ ọkpa, iran ghi gha ye ekhọekekhọe ya uhi mwẹ ru emwi.

Levitikọs 18:5

Wa gha ru emwi zẹ vbene I mwamwa uhi ẹre ye otọ ne uwa. Te uwa ra ya ẹe sinmwi uhunmwu uwa ye agbọn deghẹ wa ru vberriọ. Mẹ ọrọre Nọyaẹnmwa.

Levitikọs 19:19

“Gha ya uhi mwẹ ru emwi. Ghẹ gie emwirri ni i re ọkpa gha mu egbe ne iran miẹn ehe na biẹlẹ azẹguagua. Ghẹ kọ emwi okọ ughughan eva ye otọ okpa. Ghe rhuan ukpọn ne a ya emwi ughughan eva do.

Levitikọs 19:37

Wa gha ya uhi kevbe ilele mwẹ hia ru emwi. Mẹ ọ re Nọyaẹnmwa.”

Levitikọs 20:8

Wa gha ya uhi mwẹ ru emwi rhunmwuda mẹ ọ re Nọyaẹnmwa mẹ ọ re ọ vbe ya uwa khian ne ọ huanrẹn.”

Levitikọs 22:31

E Nọyaẹnmwa keghi kha wẹẹ, “Wa gha ya uhi mwẹ ru emwi, mẹ ọ re Nọyaẹnmwa.

Matiu 28:20

Wa ma iran ẹre ne iran gha yin zẹ vbene I yi ẹre iyi ne uwa. Wa yerre wẹ I gha gu uwa gha rrọọ vbe ẹghẹ hia rhinrin ya sẹ ufomwẹ agbọn.”

Iyẹn ne ọ Maan Ọghe Luk 1:6

Iran eva kegha yin ẹse vbe odaro Osanobua. Iran kegha ye iyi ke ilele Osanobua hia ru emwi.

Iyẹn ne ọ Maan Ọghe Jọn 15:14

Erriọ nọ, ose mwẹ wa khin deghẹ wa da uhi mwẹ yi.

Ebe ne Pọl gbẹẹn gie emwa Rom 10:5

Ẹmwẹ ne Mosis gbẹn ọ na khin, vbekpa ọghe ne a rhunmwuda ighẹ a mu nene Uhi sẹ, dọlọ ọmwa kugbe ba Osanobua: “Ọmwa ne ọ rhirhi mu nene Uhi sẹ gha la ekpa ẹre gha rrọọ.”

Diuteronomi 1:3

Vbe ikpẹdẹ ne okaro ọghe uki ne ogiowọrọ vbe ọ rre ukpo iyeva ne iran ghi kpao vbe Igipt rre, e Mosis keghi talọ emwi hia ne Nọyaẹnmwa wẹ ne ọ tama emwa ni ma iran.

Diuteronomi 1:8

Ena ọrọre, otọ ne imẹ ne Nọyaẹnmwa yan rẹn wẹ I gha mu ne avbe erha uwa odede Ebraham, Aizik kevbe Jekọb, kevbe avbe ivbi iran, ọ re ena khin, wa gha khian ya yin ẹnrẹn.’ ”

Diuteronomi 11:1

“Wa ho ẹmwẹ Nọyaẹnmwa Osanobua rua, ne uwa vbe gha ya uhi ẹre hia ru emwi.

Diuteronomi 11:32

Wa ghi gie a miẹn wẹ wa ya uhi hia ne I ra viọ ne uwa ẹrẹna ru emwi.

Diuteronomi 13:1

“Akhasẹ ọkpa ra ọmwa ne ọ rhan otọ imina ọkpa sẹtin do khama ruẹn ighẹ rẹn gha rhie ama ra ọyunnuan ọkpa ma ruẹn.

Diuteronomi 16:20

Ghẹ ru ọmwa khọ. Gha mudia ye ẹmwata ẹghẹ hia, ne uwa miẹn ehe na yin otọe ni ne Nọyaẹnmwa Osanobua rua mu ne uwa, ne uwa vbe gha yin ẹnrẹn khian.

Diuteronomi 30:16

Adeghẹ wa ya uhi e Nọyaẹnmwa Osanobua uwa ne imẹ rhie ne uwa ẹrẹna gha ru emwi, adeghẹ wa họn ẹmwẹ ne ẹẹn, wa na viọ uhi ẹre hia ya gha ru emwi, ẹghẹ nii agbọn gha ma uwa, wa ghi vbe khian okpẹvbo nọkhua ne emwa ni bun ye. E Nọyaẹnmwa Osanobua uwa ghi fiangbe uwa vbe otọe ne uwa ra ya yin na.

Diuteronomi 30:19

Te I tama uwa nian ne uwa zẹ vbọ, adeghẹ ẹfe nọ ra uwu, a deghẹ afiangbe Osanobua nọ ra ihẹn. I kevbe tie agbọn vbe ẹrinmwi ne iran sẹ osẹe ye ne uwa zẹe vbọ. Wa zẹ ẹfe.

Diuteronomi 30:20

Wa ho ẹmwẹ e Nọyaẹnmwa Osanobua rua, wa gha họn ẹmwẹ ne ẹẹn ne uwa gha ye ẹko ata gu ẹe yin, ne uwa vbe avbe ivbi uwa sẹtin tọ vbe otọe ne irẹn ve wẹ rẹn gha mu ne avbe erha uwa odede, Ebraham, Aizik kevbe Jekọb.”

Diuteronomi 4:40

Wa gha ya uhi ẹre hia ne I viọ ne uwa ẹre na ru emwi, ẹghẹ nii agbọn ghi gha ma uwa ma ivbi uwa. Wa ghi vbe gha yin otọe nii ne Nọyaẹnmwa Osanobua uwa mu ne uwa ne ọ gha re ọghe uwa ẹdẹdẹmwẹdẹ.”

Diuteronomi 4:45

Ọ keghi viọ avbe uhi na ma ima vbe iran lahin Igipt rre nẹ vbe iran rre odẹ ahọ Ẹzẹ Jọdan vbe iya ne ọ mu aro da ẹvbo Betpeọ, otọe Saihọn ne ọba ivbi Amọri ọ re ọna ye, Hesbọn ọ re ọ ke gha khaemwisẹ rre. E Mosis kevbe ivbi Izrẹl keghi khọn miẹn ẹre otọ vbe iran ke Igipt ladian nẹ.

Diuteronomi 4:8

Agbọn ẹvbo ọvbehe i rrọ, vbe ọ khọnrẹn wẹ ne iran kpọlọ sẹ, ne ọ mwẹ uhi ne ọ gbae ne ọ yevbe egbe ne I ma uwa ẹre ẹrẹna.

Diuteronomi 5:1

E Mosis keghi tie ivbi Izrẹl hia si koko, ọ tama iran wẹẹ, “Wa ne ivbi Izrẹl, wa danmwẹ ehọ uhi hia ne I ra viọ ne uwa ẹrẹna. Wa ruẹ iran ne uwa vbe miẹn wẹ wa ya iran gha ru emwi.

Diuteronomi 5:33

Gha ye ehia ru emwi, ne agbọn miẹn ehe na ma uwa, wa ghi miẹn ehe na gha rre otọ ne uwa ra ya yin khian rhinrin.

Diuteronomi 6:1

“Ena ọrọre avbe uhi ne Nọyaẹnmwa Osanobua tama mwẹ ne I ma uwa ẹre. Wa ghi gha ya iran ru emwi vbe otọe ne uwa ra lao ne uwa ya yin na.

Diuteronomi 6:24

Ẹre Nọyaẹnmwa ne Osanobua ima, na tama ima ne ima gha ye avbe uhi na hia ru emwi kevbe ne avbe gha mu ohan irẹn. Adeghẹ ma ru vberriọ, ọ gha gbe aro ghe ẹvbo mwa, ọ ghi ye ẹfe kpọ vbọ.

Diuteronomi 7:11

Rhunmwuda ọnii, wa ghi gha ya emwi ne a ma uwa re ru emwi, wa gha ya uhi hia ne I viọ ne uwa ẹrẹna ru emwi.

Diuteronomi 8:1

“Wa ghi ye ẹko ata gha ru emwi hia e I tama uwa ẹrẹna ne uwa miẹn ehe na gha rre agbọn, ne uwa vbe gha muan yọ, ne uwa vbe yin otọe nii ne Nọyaẹnmwa ve avbe erha mwa odede ẹre.

Diuteronomi 8:11

“Wa gie a miẹn wẹ wa ma mianmian e Nọyaẹnmwa Osanobua rua, wa ghẹ mwẹ wa ma gha ya uhi ẹre ne I ma uwa ẹre ẹrẹna ru emwi.

Diuteronomi 9:1

“Wa danmwẹ ehọ ivbi Izrẹl, te uwa ghi ra fian Ẹzẹ Jọdan rra na ne uwa ya mu otọ ẹvbo ni kpọlọ sẹ uwa, kevbe ni vbe mwẹ ẹtin sẹ uwa ne uwa yin ẹnrẹn. Ẹvbo iran wa kpolo, ekẹn ne a gbe ga iran wa yo sẹ iso.

Jọsua 3:9

Ẹre Jọsua na tama emwa nii wẹẹ, “Wa larre edinran, ne uwa danmwẹ ehọ ẹmwẹ ne Nọyaẹnmwa ne Osanobua uwa ra guan.