Diuteronomi 27:2 - Edo Bible (E Baibol Ẹdo) Version 1996

² Ẹdẹ ne uwa gha fian Ẹzẹ Jọdan rra ne uwa la otọ nii ne Nọyaẹnmwa Osanobua mu ne uwa, wa ghi viọ okuta nekhua eso mudia, wa ghi ya ekẹn nọkhuẹrhẹ rhu ẹe.

Diuteronomi 27:2 ပူးပေါင်းရင်းမြစ်များ

Job 19:24

Ra ne ọ ya ematọn ka ẹmwẹ mwẹ ye okuta. Ne ọ gbẹn ọẹn, ne ọ ghẹ wi ẹdẹdẹmwẹdẹ.

Ezikiẹl 11:19

I gha rhie orhiọn kevbe ekhọe ọgbọn ne iran. I gha miẹn iran ekhọe okuta ni zevbudu nii, I ghi rhie orhiọn ne ọ họn ẹmwẹ ne iran.

Ezikiẹl 36:26

I gha rhie ẹko kevbe ekhọe ọgbọn ne uwa I gha miẹn uwa ekhọe okuta uwa ne ọ zevbudu nii, I ghi rhie ekhọe ne ọ họn ẹmwẹ ne uwa.

Diuteronomi 11:31

Te uwa ghi ra fian Ẹzẹ Jọdan rra na ne uwa yin otọe nii ne Nọyaẹnmwa Osanobua ra mu ne uwa. Wa ghẹ ghi mu ẹẹn nẹ ighẹ te uwa ghi gbẹkun sẹ otọ nẹ vbe evba.

Diuteronomi 26:1

“Wa ghẹ ghi yin otọe nii ne Nọyaẹnmwa ne Osanobua rua ra mu ne uwa nẹ ighẹ ẹkun vbe sẹ uwa otọ nẹ.

Diuteronomi 27:1

Ẹre Mosis kevbe avbe ọkaolotu ivbi Izrẹl ni dekẹe na tama emwa nii wẹẹ, “Wa gha ya uhi ne I viọ ne uwa ẹrẹ ru emwi.

Diuteronomi 27:3

Wa ghi vbe gbẹnnẹ avbe uhi na kevbe emwi ne a ma uwa ẹre lele ẹe. Wa ghẹ ghi la otọ esiesi ne ọ maa a emwiokọ ne Nọyaẹnmwa Osanobua avbe erha uwa odede ve uwa ẹre nẹ,

Diuteronomi 27:4

ighẹ wa sẹ obọ nọkpa Jọdan nẹ, wa ghi viọ avbe okuta na ye Oke Ebal zẹ vbene I ru igiodẹ ma uwa ẹrẹna, wa ghi ya ekẹn ne ọkhuẹrhẹ rhu ẹe.

Diuteronomi 6:1

“Ena ọrọre avbe uhi ne Nọyaẹnmwa Osanobua tama mwẹ ne I ma uwa ẹre. Wa ghi gha ya iran ru emwi vbe otọe ne uwa ra lao ne uwa ya yin na.

Diuteronomi 9:1

“Wa danmwẹ ehọ ivbi Izrẹl, te uwa ghi ra fian Ẹzẹ Jọdan rra na ne uwa ya mu otọ ẹvbo ni kpọlọ sẹ uwa, kevbe ni vbe mwẹ ẹtin sẹ uwa ne uwa yin ẹnrẹn. Ẹvbo iran wa kpolo, ekẹn ne a gbe ga iran wa yo sẹ iso.

Jọsua 1:11

“Wa lele agọ na khinkhian, ne uwa vbe tama avbe emwa nii wẹẹ, ‘Wa dọlọ emwi uwa yi ye otọ rhunmwuda vbe ọ te sẹ ikpẹdẹ eha, wa gha fian Ẹzẹ Jọdan na rra ne uwa ya mu otọe ni ne Nọyaẹnmwa Osanobua rua ra mu ne uwa.’ ”

Jọsua 4:1

Emwa nii hia ghi la Jọdan gberra nẹ, e Nọyaẹnmwa keghi tama Jọsua wẹẹ,

Jọsua 8:30

E Jọsua keghi bọ aka ọkpa ne Nọyaẹnmwa ne Osanobua ivbi Izrẹl vbe Oke Ebal.

Jọsua 8:31

Ọ keghi ru ẹe zẹ vbe igiodẹ ne Mosis ne ọguọmwadia e Nọyaẹnmwa rhie ne ivbi Izrẹl zẹ vbe ne ọ tae vbe Uhi e Mosis: “Aka ọghe avbe okuta ne a ma ye emwi guọghọ.” Iran keghi zọ ese ne a giẹn uan ghe Nọyaẹnmwa vbe evba, iran na vbe viọ emwi isara iran rre.

Jọsua 8:32

E Jọsua keghi gbẹnnẹ avbe Uhi ne Mosis gbennẹ, yan okuta ọghe aka nii vbene ivbi Izrẹl hia na gha ghe ẹre.