Diuteronomi 2:36 - Edo Bible (E Baibol Ẹdo) Version 1996

³⁶ E Nọyaẹnmwa ne Osanobua mwa keghi gie ima khọn avbe ẹvbo hia ni rre ke Aroa vbe ọkpẹn Ẹzẹ Anọn kpao rhinrin ya sẹ Giliad mu otọ ke ẹe kevbe avbe ẹvbo ni wa rre ọkpẹn nene ẹzẹ tobọ ẹre. A ma miẹn ẹvbo ne ekẹn ọnrẹn yo gbe ne ima.

Diuteronomi 2:36 ပူးပေါင်းရင်းမြစ်များ

II Samuẹl 24:5

Iran keghi fian e Jọdan rra, iran na bu agọ ye odẹ ekẹn Aroa, ne ẹvbo ne ọ rre iya vbe otọ e Gad. Evba iran keghi kpao gha rrie odẹ okuọ vbe Jeza,

II Ọba 10:33

odẹ ahọ ọghe Jọdan rhinrin ya sẹ ẹvbo ne a tie ẹre Aroẹ ne ọ rre odẹ ekẹn vbe ọkpẹn Ẹzẹ Anọn, ne usun ọ re otọe Giliad ye kevbe Basian, ehe ne avbe ẹwae Gad, Riubẹn kevbe Manasẹ ne odẹ ahọ ye.

Psalm 44:3

Ẹ i re umozo iran, ọ re avbe emwa ruẹn ya khọn avbe otọe nii. Ẹ i re ẹtin iran ọ re iran ya khọnmiotọ, ẹtin kevbe iwegbe ruẹ ọre nọ, vbene u na gie iran rẹn ighe u gu iran rrọọ, ne ọ vbe rhie ma ighe u ho ẹmwẹ iran.

Ẹksọdọs 23:31

I gha mwa otọ uwa ne ọ ke okun Akaba ya sẹ Okun Meditẹrrenian kevbe ke ato ya sẹ Ẹzẹ Yufretes. I gha rhie uwa obọ yan emwa ẹvbo nii uhunmwu, wa ghi vbe khulo iran hin odaro uwa rre vbe uwa a gha nana sikẹ odaro.

Aizaia 17:2

Emwa gha lẹkua hin avbe okpẹvbo e Siria rre ẹdẹdẹmwẹdẹ. Iran gha khian ehe ne ohuan kevbe ẹmila na rria, ọmwa ne ọ gha vbe khulo iran hin evba rre i rrọọ.

Jerimaia 48:19

Wa ni rre Aroa, wa mudia ye ọkpẹn odẹ ne uwa gha khẹ, wa nọ avbe iran ni lẹ khian, wa nọ iran emwi ne ọ sunu.

Nọmbas 32:34

Ẹwae ọghe Gad keghi dọlegbe bọlọ avbe ẹvbo ne a gbe odin khinkhian ighẹ Dibọn.

Ebe ne Pọl gbẹẹn gie emwa Rom 8:31

Ugbẹn vbe a ghi miẹn nian wẹ erriọ ọre emwi hia ye, vbe ima gha ghi kha hẹẹ? Deghẹ ma ọre Osanobua deba, de ọmwa ne ọ gha sẹtin mu aro da ima?

Diuteronomi 3:12

“Ma ghi ya ẹvbo nii khian ọghomwa nẹ, I keghi mu avbe otọ ne ọ ke Aroa ne ọ rre ọkpẹn Ẹzẹ Anọn kpao do sẹ ẹvbo Giliad ba ẹvbo ni rrọ ne ẹwae ọghe Riubẹn kevbe Gad.

Diuteronomi 4:48

Otọe ne iran ya khian ọghe iran na keghi ke ẹvbo Aroẹ kpao vbe okhiẹ Ẹzẹ Anọn wa gha khian ya sẹ oke Siriọn, onii nọ wẹ ekẹn Hẹmọn.

Jọsua 1:5

Inu ẹghẹ ne u gha ya vbe agbọn ọmwa ọkpa ne ọ gha sẹtin khọn miẹn ruẹn otọ, ẹ i rrọọ. I gha mudia kuẹ zẹ vbene I mudia ke Mosis. I i ra suẹ rae.

Jọsua 12:2

Saihọn ọba avbe ivbi Amọri ne ọ gha rre Heshọn, otọ arriọba ẹre keghi ke Aroẹ vbe ọkpẹn Iya ọghe Anọn, kevbe ke adesẹneva iya ni kpao, rhinrin ya sẹ Ẹzẹ Jabọk, ehe ne otọ Ammọn sẹe (ena kegha re vbe a wa otọe Gilian ye ihe eva).

Jọsua 13:16

Otọe iran keghi ke Aroẹ kpao (vbe ehọ Iya Anọn) kevbe ẹvbo ne ọ rre adesẹneva iya nii, kevbe avbe otọ ni rriẹe hia ni lẹga Mẹdeba.

Jọsua 13:9

Otọe iran keghi ke Aroẹ (vbe ehọ Iya Anọn) kpao deba ẹvbo ne ọ rre adesẹneva iya nii, kevbe otọe oke ne ọ rriẹe ọghe Mẹdeba hia ya sẹ Dibọn.

Jọsua 21:44

E Nọyaẹnmwa keghi rhie ọfumwegbe ne iran vbe igie enenẹ zẹ vbe ne ọ yan ma avbe erha iran odede. A ma miẹn ọkpa vbe uwu avbe eghian iran hia ne ọ sẹtin da iran obọ yi, rhunmwuda, e Nọyaẹnmwa keghi gie ivbi Izrẹl khọnmiotọ vbe uhunmwu avbe eghian iran hia.

Giọgis 11:22

Iran keghi wa mu otọe emwa Amọri hia kevbe Anọn vbe odẹ ekẹn ya sẹ Jabọk vbe odẹ okuọ kevbe ato kpao vbe odẹ ahọ ya sẹ Jọdan vbe odẹ orrie.

Giọgis 11:26

Ukpo iyisẹn yan uri (300) ọ re Izrẹl kegha rre Hesbọn kevbe Aroa kevbe ẹvbo ni lẹga iran do deba ẹvbo hia ni rre eghute Ẹzẹ Anọn. Vbọzẹ ne u na ma mu ẹẹn werriegbe ke ẹghẹ nii gha dee?