Diuteronomi 18:1 - Edo Bible (E Baibol Ẹdo) Version 1996

¹ “Ewae e Livai ne ọ re ọghe avbe ohẹn, a i ra ghae ne iran vbe otọe nii, emwi izẹ ọhẹ kevbe emwi izọ ese ọvbehe ne emwa viọ gie Nọyaẹnmwa ọre iran gha ya gha koko egbe.

Diuteronomi 18:1 ပူးပေါင်းရင်းမြစ်များ

Jerimaia 33:18

Kevbe wẹ te a gha vbe gha miẹn ohẹn rhinrin vbe ẹwae Livai, ne ọ gha ga mwẹ ne ọ gha vbe gha yo imuohan ọka gunmwẹ, ne ọ vbe gha zọ ese.”

Ezikiẹl 44:28

“Emwi ne ọ sẹ avbe ohẹn obọ vbe emwi ne I viọ ne ivbi Izrẹl, ne ọ gha re emwi ne a ya ye emọ otọ, ke orre ọkpa ya sẹ ọvbehe ọrọre ukpo ohẹn. A i kue ne iran gha họn emwi vbe Izrẹl. Mẹ ọrọre emwi ne ọ kere ne iran gha mwẹ.

Nọmbas 18:20

E Nọyaẹnmwa keghi tama Errọn wẹẹ, “Wẹ ghẹ miẹn ọmwa rhọkpa emwi ne ọ gia re vbe ukhu, a i ra vbe ghae ne uẹn vbe otọ Izrẹl. Mẹ ne Nọyaẹnmwa ọrọre emwi ne ọ ke ne uẹn.”

Nọmbas 26:62

Avbe Livai ne ikpia hia ni ghi rre ke ọmọ ukpo ọkpa gha khian kegha re arriaisẹn ehayan-ugie (23,000). A ma ka iran ba ivbi Izrẹl nekpa rhunmwuda a ma gha emwi ẹwae rhọkpa ne iran vbe Izrẹl.

Diuteronomi 10:9

Ọnii ọ siẹe ne a na ma gha otọ ne ẹwae Livai zẹ vbene ẹwae nekpa ye. Emwi ne ọ sẹ iran obọ ke gha re ukpo ohẹn zẹ vbene Nọyaẹnmwa Osanobua uwa yan rẹn.)

Diuteronomi 12:19

Inu ẹghẹ ne uwa gha ya vbe otọe uwa, wa ghẹ mianmian avbe Livai.

Jọsua 13:14

E Mosis ma gha otọ ne ẹwae e Livai, sokpan, iran ghi gha viọ emwi ne a ya zọ ese ne a giẹn gie e Nọyaẹnmwa, enii ghi gha re ọghe iran zẹ vbene Nọyaẹnmwa tama e Mosis.

Jọsua 13:33

Sokpan, e Mosis ma mu otọe ne ẹwae avbe Livai ne ọ gha re ọghe iran. Ọ keghi tama iran wẹ oghae vbe emwi ne a ya mu ohan gie e Nọyaẹnmwa Osanobua ọghe Izrẹl ọrọre emwi ne iran ra gha mwẹ.

Jọsua 18:7

Avbe e Livai i ra gu uwa nekpa gha otọe, rhunmwuda ne ọ kan iran ọrọre ne iran gha ga zẹ vbe avbe ohẹn ọghe Nọyaẹnmwa. Avbe ẹwae ọghe Gad, Riubẹn kevbe obọkpa vbe ẹwae Manasẹ mu otọ ọghe iran nẹ vbe odẹ ahọ ọghe Jọdan, otọe nii ne Mosis ne ọguọmwadia e Nọyaẹnmwa mu ne iran.”