Diuteronomi 13:3 - Edo Bible (E Baibol Ẹdo) Version 1996

³ Ghẹ zẹdẹ zẹ ye ọ re hiehiere, e Nọyaẹnmwa Osanobua ruẹ ọ re ọ ya ẹe danmwẹ ọẹn ghe, ne ọ miẹn ehe na ghe a deghẹ wẹ ye ekhọe ruẹ hia kevbe orhiọn ruẹn hia ho ẹmwẹ Nọyaẹnmwa.

Diuteronomi 13:3 ပူးပေါင်းရင်းမြစ်များ

I Ọba 13:19

Ẹre akhasẹ ne ọ ke Juda rre nii na lele akhasẹ ne ediọnmwa nii gha rrie, ọ na ya gu ẹe rrie evbare.

Psalm 119:2

Afiangbe ọrọre ọghe iran ni lele iyi ẹre ni họn ẹmwẹ ne ẹẹn kekhọekekhọe.

Psalm 66:10

Osanobua, wẹ danmwẹ ima ghe nẹ zẹ vbene a kpe esiliva vbe erhẹn erriọ ọ re uwẹ danmwẹ ima ghe.

Psalm 81:7

Ẹghẹ ne uwa na gha rre uwu ọlọghọmwa, wa kpe tie mwẹ, I keghi miẹn uwa fan, ehe ne I lẹre yi vbe uwu okpẹhoho, ọ re I ke rhie ewanniẹn ne uwa, I keghi danmwẹ uwa ghe vbe ẹzẹ Mẹriba.

Ẹksọdọs 20:20

E Mosis keghi tama emwa nii wẹẹ, “Wa ghẹ fian afianma, te Osanobua do danmwẹ uwa kẹkan ne u wa miẹn ehe na gha mu ohan rẹn, ne u wa ghẹ ru oru khọ.”

Aizaia 8:20

Wẹ ghi zẹ wanniẹn iran wẹẹ, “Danmwehọ emwi ne Nọyaẹnmwa ma uwa ẹre! Wa ghẹ danmwehọ avbe iran ni miẹn aro, emwi ne iran ra tama uwa i mwẹ asa ne ọ ye ne uwa.”

Matiu 24:24

Rhunmwuda, avbe akhasẹ kevbe Mẹzaia ohoghe gha rre. Iran gha winna iwinna ama kevbe iwinna ọyunnuan ni bun ne iran ya rẹrẹ emwa ne Osanobua hannọ zẹ re deghẹ ẹtin iran sọe.

Iwinna 17:11

Emwa ni rre ẹvbo na ọre ẹdẹ gbe vbe ẹko sẹ iran ni rre Tẹsalonaika. Iran keghi wa gbe ẹkun sẹ otọ gha danmwehọ ikporhu nii, iran kegha tie Ebe ẹsẹse gualọ otọ ẹre ne iran miẹn ehe na rẹn a deghẹ ẹmwata ọre ẹmwẹ ne Pọl tae khin.

I Kọrinti 11:19

(Vbe ne a i na gbe awẹawẹ, ẹ i mwẹ iwannegbe ma gha rre ẹkpo uwa ne iran ni ru emwi esi miẹn ehe na wa gia rẹn taara.)

II Kọrinti 8:8

Ẹ i re te I vinnọ uhi ye otọ, sokpan, I gha ta vbene emwa ọvbehe gbe igiangian ye ẹmwẹ iyobọ ne a ru hẹ, te I ho ne I rẹn vbene aho ẹmwẹ ọmwa uwa re ọghe ẹmwata hẹẹ.

Ẹfisọs 4:14

Ẹghẹ nii, ma i ghi ra gha re emọ obọ ne ulẹmwẹ ẹzẹ mu yo mu rre, kevbe ne ẹhoho ẹziza, ọghe iruẹmwi emwa erẹrẹ, bi yo bi rre, emwa ni ya ero ne ọ ke ẹko iran zọ rre de emwa ọvbehe odẹ.

Diuteronomi 6:5

Ye ekhọe ruẹ hia ho ẹmwẹ Nọyaẹnmwa Osanobua ruẹ, kevbe orhiọn ruẹn hia kevbe ẹtin ruẹn hia.

Diuteronomi 8:16

Ọ rhie mana ne uwa re vbe uwu ato, egbe evbare ne avbe erha uwa odede ma re ẹdẹ. Ọ keghi gie ọlọghọmwa gie uwa ne ọ miẹn ehe na danmwẹ uwa ghe, ne ọ miẹn ehe na ya emwi ne ọma fiangbe uwa vbe okiekie.

Diuteronomi 8:2

Wa ghi yerre vbene Nọyaẹnmwa Osanobua uwa su uwa vbe okhian ne ọ taẹn la uwu ato nii vbe ukpo iyeva ni gberra na, ọ na vbe gie ọlọghọmwa gie uwa ne ọ ya danmwẹ uwa ghe, ne ọ miẹn ehe na rẹn emwi ni rre uwa ekhọe, nẹ ọ miẹn ehe na vbe rẹn adeghẹ wa gha ya uhi ẹre ru emwi.

II Tẹsalonaika 2:11

Rhunmwuda ọna, Osanobua keghi gie ẹtin idodẹ, ne ọ ya gha winna vbe uwu iran, iran na ghi gha ya emwi ohoghe yi.

I Jọn 2:19

Vbe ẹmwata, ẹ i re otu ima iran na ye o, ọ ni ọ si ẹe ne iran na kpao sẹ ima rae, akpawẹ otu ima iran ye, te iran gha gu ima tota. Sokpan iran kpao sẹ mwa rae, ne aro miẹn ehe na dae wẹ, ẹ i re otu mwa iran ye.

I Jọn 4:1

Wa ne ọse mwẹ ni ghaan, wa ghẹ gha ya iran hia ni kha ighẹ iran mwẹ nene Orhiọn yi, sokpan wa ghi ka danmwẹ ọẹn ghe nẹ ne uwa miẹn ehe na rẹn a deghẹ obọ Osanobua ọre nene orhiọn ne iran mwẹ ke rre. Rhunmwuda avbe akhasẹ ohoghe ni bun wa vẹ gba ehe hia.

I Jọn 4:4

Sokpan, wa ne ivbi mwẹ, ọ ghe Osanobua ọre uwa khin, wa vbe munọ avbe akhasẹ ohoghe gbe otọ nẹ, rhunmwuda Orhiọn ne ọ rre uwu uwa wo vbe egbe sẹ orhiọn ne ọ rre uwu iran ni re ọ ghe agbọn na.

Arhie Maan 13:14

Ọ keghi ye iwinna ọyunnuan ne a rhie ẹghẹ nẹẹn ya winna mu emwa hia ni rre agbọn rẹrẹ vbe sirra aranmwẹ oha ne okaro nii. Aranmwẹ oha na keghi wẹ ne emwa ne agbọn hia ma amazẹ ọkpa ne a ya ya ọghọ nẹẹn ighẹ aranmwẹ oha nii ne a ya umozo kuan rẹn egbe ne ọ ma wu.

Giọgis 2:22

Odẹ vbe nian ọre I gha ya rẹn a deghẹ ivbi Izrẹl gha rhie uhi mwẹ mwẹ vbene avbe erha iran ru ra ẹn o.”

I Samuẹl 26:19

U ghi danmwehọ mwẹ, Umogun. A deghẹ e Nọyaẹnmwa ọ re ọ werriẹ ruẹ aro da mwẹ, a gha zọ ese imuohan gie ẹe, ọ gha fi ekhọe werriẹ, sokpan, a deghẹ emwa ne agbọn ọ re ọ ru ẹe, e Nọyaẹnmwa ọ re ọ gha fi iran unu. Rhunmwuda, iran khu mwẹ hin otọe e Nọyaẹnmwa rre. Iran wẹ ne I ya gha ga ẹbọ ẹrrẹe, kevbe ne I vbe gbe ihoi vbe otọe ne Nọyaẹnmwa mu ne emwa rẹn.