Diuteronomi 12:7 - Edo Bible (E Baibol Ẹdo) Version 1996

⁷ Vbe evba nii, vbe odaro e Nọyaẹnmwa Osanobua uwa, ne ọ fiangbe uwa, wẹ kevbe ẹgbẹe ruẹ gha re, wa ghi gha ghọghọ rhunmwuda avbe emwi esi ne uwa miẹn ẹsọn yi.

Diuteronomi 12:7 ပူးပေါင်းရင်းမြစ်များ

I Krọnikol 29:22

Erriọ ọre ọ gha ye wẹ vbe ẹdẹ ne ẹdẹrriọ ẹko kegha rhiẹnrhiẹn iran hia vbe iran re, iran vbe da, vbe odaro e Nọyaẹnmwa. Iran keghi dọlegbe ma e Solomọn ọba ukpogieva. Iran na sa ori ye ọre uhunmwu zẹ vbe ọba iran vbe eni e Nọyaẹnmwa, Iran kevbe ma Zadọk ohẹn.

Nehimaia 8:9

Iran ghi họn emwi ne Uhi nọ rẹn, ọ keghi da iran sẹrriọ wẹ iran na suẹn gha viẹ. Ẹre Nehimaia ne ne ọkhaemwisẹ, Ẹzra ne ohẹn kevbe ne ọ rẹn nene Uhi, kevbe avbe Livai ni gha rhan otọ nene Uhi ma emwa nii, keghi tama iran wẹẹ, “Ẹdẹnẹrẹ na, ẹdẹ nọhuanrẹn nọ ne Nọyaẹnmwa ne Osanobua uwa rhunmwuda ọnii, wa ghẹ khiẹ ra ne uwa vbe gha viẹ.

Asan-Ibo 3:12

Rhunmwuda ọnii, I keghi miẹn emwi ne ima gha sẹtin ru ma gberra wẹ, ne ima gha sẹ ọyẹnmwẹ, ne a vbe ru vbene ẹtin mwa sẹe vbe a he rre agbọn na.

Asan-Ibo 3:13

Te ọ kere ne ima hia gha re, ne a gha da, ne a vbe ya emwi ne ima miẹn ẹsọn yi gha zọmọ. Emwi ne Osanobua ya ru ọmwa ẹse nọ.

Asan-Ibo 5:18

Emwi ne I gualọ otọ ẹre miẹn ọ re ọna khin wẹ, emwi ne ọ kei ne ọmwa sẹ ọrọre ne ọ gha re, ne ọ gha da, ne ọ ye emwi ne ọ miẹn ẹsọn yi gha zọmọ vbe ẹdagbọn kherhe ne Osanobua rhie ne ẹẹn na: uhunmwu ne ọmwa mu rre ọ re onii khin.

Aizaia 23:18

A ghi ya igho ne ọ miẹn vbe ẹki fi ohan ne Nọyaẹnmwa. Ẹ i ra vbe viọ ẹre hin rre, sokpan, avbe emwa ni ga e Nọyaẹnmwa gha ya igho nii dẹlẹ evbare kevbe ukpọn ne iran gha lo.

Aizaia 62:9

Sokpan, wẹ ne ọ kọe, ne ọ vbe rhọ ọka nii ẹre ọ gha vbe rri ebrẹd ẹre, u ghi rho e Nọyaẹnmwa, wẹ ne ọ gbearoghe ne u na kọlọ azara nii ọ re ọ gha vbe da ayọn ẹnrẹn vbe ore Ọgua Osa mwẹ.”

Ezikiẹl 44:3

Sokpan, ovbi ọba ne ọ rre asẹ sẹtin gha rrie evba ya rri evbare nọhuanrẹn vbe odaro mwẹ. Ughugha nọkhua ne ọ ke uwu ẹre ọ re ọ gha la la onurho nii vbe la ladian.”

Joẹl 1:16

Ma bolo aro ua gha ghe ẹre, vbe a fuẹn ima emwiokọ ua, ẹkorhiẹnrhiẹnmwẹ i ghi rre uwu Ọgua Osa Osanobua mwa.

Joẹl 2:26

Eban nian, wa gha miẹn re ne ẹko vbe vuọn uwa. Wa gha rho e Nọyaẹnmwa Osanobua uwa, ne ọ ru emwi ọyunnuan, ne uwa. A i ghi dọlegbe zan emwa mwẹ ọvbehe.

Levitikọs 23:40

Vbe ẹdẹ nẹdẹrriọ, wa ghi hannọ emwi okọ ne ọ maa sẹ vbe ọmọ erhan uwa, wa ghi viọ ewanmwẹ kevbe abọ erhan ni mwẹ ebe ẹsẹse, na uwa suẹn ugamwẹ emwi okọ ne uwa ya ya ọghọ ne Nọyaẹnmwa Osanobua rua.

Malakai 2:13

Wa ghe emwi ọvbehe ne uwa vbe ru. Wa ye ameve uwa ro gue Ogiukpo Osanobua mu otọ, wa gha viẹ, wa gha kpe orhu eve rhunmwuda ighẹ e Nọyaẹnmwa i ghi rhan obọ miẹn emwi ne uwa ya ha oko gie ẹe.

Iwinna 2:46

Ẹdẹgbegbe, iran keghi ya gha mi egbe vbe uwu Ọgua Osa zẹ vbe otu ọkpa. Iran keghi gba gha rri evbare iran kugbe vbe owa, vbe ọyẹnmwẹ kevbe amu egbe rriotọ.

Diuteronomi 12:12

Ẹghẹ nii wa gha ghọghọ vbe odaro ẹre, kevbe ivbi uwa kevbe ọguọmwadia uwa kevbe avbe Livai ni rre ẹvbo uwa, (yerre wẹ avbe Livai i khian gha mwẹ otọ obọ iran.)

Diuteronomi 12:18

Wa kevbe avbe ivbi uwa kevbe eguọmwadia uwa, kevbe avbe e Livai nii rre ẹvbo uwa, odaro Nọyaẹnmwa Osanobua uwa ọkpa ọ re uwa gha na gha rri ọe, vbe ihọkpa kẹkan ne a na ga nii, ne Nọyaẹnmwa ne Osanobua uwa zẹe re vbe evba ne u gie ẹko ruẹ vbe gha rhiẹnrhiẹn rhunmwuda emwi ọma ne Nọyaẹnmwa hẹ ne uwa.

Diuteronomi 12:8

“Ọ gha sẹ ẹghẹ nii nẹ, wa ghẹ ghi ru vbene uwa ka ru de yi do sẹ wanwan nian, dọmwadẹ ọghe ọe ọ re ọ ho vbene ọ khọnrẹn.

Diuteronomi 14:23

U ghi gha rrie ihe ọkpa nii ne Nọyaẹnmwa zẹe wẹ a gha na gha ga irẹn ne u ya sirra ẹre rrie ọkpa vbe uwu igbe ọghe ọka ruẹ ni kevbe ayọn kevbe ofigbọn ọliv kevbe emọ ọdiọn ọghe ẹmila kevbe ohuan ruẹn. U ghi ru ọna ne u miẹn ehe na ruẹ vbene a mu ohan e Nọyaẹnmwa Osanobua ruẹ hẹ ẹghẹ hia.

Diuteronomi 14:26

U ghi lo ẹre ye emwi ne ọ rhirhi khọn ruẹn emiowo, ẹmila, ovbi ohuan, ayọn ebiẹ, vbe evba nii zẹ, wẹ kevbe emwa ẹgbẹe ruẹ ghi rri evbare vbe odaro Nọyaẹnmwa Osanobua ruẹ, wa ghi vbe gha sẹ ọyẹnmwẹ.

Diuteronomi 15:20

Wẹ kevbe ẹgbẹe ruẹ ghi ya gha rri ọe ukpukpo vbe odaro e Nọyaẹnmwa vbe ehe ọkpa kẹkan nii ne a na ga ẹe.

Diuteronomi 26:11

U ghi gie ẹko ruẹ gha rhiẹnrhiẹn, rhunmwuda emwi ni maa ne Nọyaẹnmwa viọ ne uẹn kevbe ẹgbẹ ruẹ, u ghi vbe gie avbe Livai kevbe avbe erriọvbe ni rre ehe ne u ye deba uwa gha titi ẹe.

Diuteronomi 27:7

evba wa gha na vbe gha zẹ ese, wa ghi vbe rri evbare ọghe isara vbe evba, wa ghi vbe gie ẹko uwa gha rhiẹnrhiẹn vbe odaro e Nọyaẹnmwa Osanobua rua.

Diuteronomi 28:47

E Nọyaẹnmwa keghi fiangbe uwa vbe odẹ hia sokpan wa ma ye ẹko oghọghọ kevbe ọyẹnmwẹ ga ẹe.

Filipai 4:4

Wa gha ghọghọ vbe uwu Nọyaẹnmwa, I vbe dọlọ ta ẹe, wa gha ghọghọ.