Diuteronomi 12:10 - Edo Bible (E Baibol Ẹdo) Version 1996

¹⁰ Wa gha fian Ẹzẹ Jọdan rra nẹ, e Nọyaẹnmwa gha gie uwa mu otọ nii ne uwa yin evba. Ọ gha degue uwa hin obọ avbe eghian uwa hia rre, ne uwa miẹn ehe na gha rrọọ vbe ọfumwegbe.

Diuteronomi 12:10 ပူးပေါင်းရင်းမြစ်များ

I Ọba 4:25

Ẹghẹ hia ne ọ ya ẹe vbe agbọn, emwi rhọkpa ma ru emwa e Juda kevbe Izrẹl dọmwadẹ igiowa kegha mwẹ ugbo azara ọghe ọe kevbe ọghe erhan ohọ.

I Ọba 8:56

“Rho e Nọyaẹnmwa, ọmwa ne ọ rhie ọfumwegbe ne emwa rẹn, zẹ vbene ọ khare zẹ wẹ rẹn gha ru ẹe. Emwi ọrhẹnrhẹn ne ọ la unu e Mosis ne ọguọmwadia ẹre ve, ọ gele wa ru ehia fẹẹrẹ.

I Krọnikol 22:18

Ọ wẹẹ, “E Nọyaẹnmwa ne Osanobua u wa, gha rrọọ yaba uwa, ọ keghi rhie ọfumwegbe ne uwa vbe igienenẹ. Ọ rhie ẹtin mẹ ne I ya khọn emwa ni te ka rre otọ ẹvbo na, banbanna nian ọguọmwadia uwa kevbe ọghe Nọyaẹnmwa ọ re iran ghi khin.

Psalm 4:8

I gha lovbiẹ, I ghi vbiẹ ua vbe ọfumwegbe wẹ ọkpa kẹkan, Nọyaẹnmwa, ọre ọ rhie mwẹ lẹre vbe ne a i na mwẹ ẹbe.

Ẹksọdọs 33:14

E Nọyaẹnmwa keghi kha wẹẹ, “I gha lele uẹ gha khian, I gha vbe rhie akhọnmiotọ nuẹn.”

Itan 1:33

Sokpan, ọmwaikọmwa ne ọ rhie ehọ mẹ ta yi, ẹkun gha sẹ ọre otọ. Ọ gha rrọ vbe a i mwẹ ẹbe, vbe ne emwi i na vbe rrọ ne ọ gha gie ohan gha mu ẹẹn.”

Jerimaia 23:6

Ẹghẹ ne ọ gha ya vbe ọba, ivbi e Juda gha rrọọ vbe a i mwẹ ẹbe, ivbi Izrẹl ghi vbe gha rrọọ vbe ọfumwegbe, a gha vbe gha tie ẹre, ‘E Nọyaẹnmwa ne Imiẹnfan Mwa.’

Jerimaia 32:37

I ra ya si avbe emwa nii hia koko ke ehe ne I te zagha iran kui vbe ohu mu mwẹ, werriegbe gha die emwa na, I gha gie iran gha rrọ vbe a i mwẹ ẹbe.

Jerimaia 33:11

Urhu ne ọ la ọghe oghọghọ kevbe ọyẹnmwẹ, kevbe uwemwẹ ẹko rhiẹhrhiẹn mwẹ ọghe evbare irhiọha. Wa gha họn vbe emwa na a gha sihuan viọ imuohan ekpọnmwẹ die Ọgua Osa mwẹ, iran ghi kha wẹẹ, “ ‘Wa rhie ekpọnmwẹ ne Nọyaẹnmwa ne Oghodua, rhunmwuda, rẹn maa, itẹbitẹ ọ re ahoẹmwọmwa rẹn khin.’ I gha ya otọ nii khian ne agbọn maa rẹn zẹ vbe ne ọ ka ye dee ẹdẹ. Mẹ ne Nọyaẹnmwa ọ re ọ taa ẹe.”

Ezikiẹl 28:26

Iran gha di evba ya vbe ne a i na mwẹ ẹbe. Iran gha bọlọ owa, iran gha vbe gbe ugbo azara. I gha rri avbe ẹdogbo iran oya, avbe iran ni gha kpe amẹ isikan ku iran, Izrẹl ghi gha re ne ẹkun sọre otọ. Iran gha rẹn wẹ mẹ ọrọre Nọyaẹnmwa ne Osanobua iran.”

Ezikiẹl 34:25

“I gha gu iran ta ile ne ọ gha rhie maa wẹ ẹkun gha sẹ iran otọ. I gha wabọ avbe aranmwẹ akọn dan hin otọe nii rre, ne avbe ohuan mwẹ sẹtin gha rrọọ vbe ne a i na mwẹ ẹbe vbe oha kevbe uwu ẹgbo.

Ezikiẹl 34:28

“Uhunmwu ẹvbo avbe iran ni ga ẹbọ i ghi ra do dọlegbe gha fu iran emwi ọvbehe, avbe aranmwẹ akọn i ghi ra ye gha gbele iran re. Iran gha rrọọ vbe a i mwẹ ẹbe, ọmwarhọkpa i ghi ra dọlegbe runran iran.

Ezikiẹl 38:11

U gha kha wẹ u ra mu okuo la ẹvbo ne ẹ i mwẹ ẹtin, ehe ne emwa hia na rrọ vbe ọfumwegbe kevbe ne ẹkun na sotọ vbe avbe ẹvbo ne a ma gbe ekẹn ga vbe ne ẹ i na mwẹ ne ọ gbinna ne ẹẹn.

Ezikiẹl 38:8

Vbe iyeke ukpo nibun, I gha tama rẹn ne ọ ya khọn ẹvbo ọkpa ne a ke viọ avbe emwa nii werriegbe gha dee do si iran koko, ne iran vbe gba gha rrọọ ke ẹghẹ nii gha dee vbe ne a i na fian afianma okuo. Ọ gha mu okuo la avbe oke Izrẹl ne ọ dihoi rua kevbe ne emwa na lẹkua ke ẹghẹ ne ọ kpẹre gha dee, sokpan, ne emwa hia ghi ye nian vbe a i mwẹ ẹbe.

Diuteronomi 11:31

Te uwa ghi ra fian Ẹzẹ Jọdan rra na ne uwa yin otọe nii ne Nọyaẹnmwa Osanobua ra mu ne uwa. Wa ghẹ ghi mu ẹẹn nẹ ighẹ te uwa ghi gbẹkun sẹ otọ nẹ vbe evba.

Diuteronomi 3:27

Gha rrie uhunmwu oke Pisga vbe ehe ne ọ sẹe ne u ghe odẹ okuọ kevbe ekẹn, ahọ kevbe orrie. Kakabọ gbe aro ke otọ ghe emwi ne u bẹghe rhunmwuda, wẹ i ra fian Jọdan rra.

Diuteronomi 33:12

Ọ keghi kha vbekpa ẹwae Bẹnjamin wẹẹ: “Ewae ne Nọyaẹnmwa ho ẹmwẹ ọnrẹn ne ọ vbe degue ẹdẹgbegbe iran ya rrọọ vbe a i mwẹ ẹbe vbe odaro ẹre. Ọ keghi vbe di uwu ẹbu iran ya.”

Diuteronomi 33:28

Ẹre ivbi e Jekọb na gha rrọọ vbe ọfumwegbe ọ kevbe gbe ẹkun sẹ otọ vbe otọ ne ọka kevbe ayọn na kpọ ehe ne iso na gie evbu gha tue ye otọ.

Diuteronomi 4:22

Otọe edinran ọ re i ra wu yi, mẹ i ra fian ẹzẹ rra, sokpan te uwa ghi ra fian ẹn rra na ne uwa ya yin otọ esiesi nii.

Diuteronomi 9:1

“Wa danmwẹ ehọ ivbi Izrẹl, te uwa ghi ra fian Ẹzẹ Jọdan rra na ne uwa ya mu otọ ẹvbo ni kpọlọ sẹ uwa, kevbe ni vbe mwẹ ẹtin sẹ uwa ne uwa yin ẹnrẹn. Ẹvbo iran wa kpolo, ekẹn ne a gbe ga iran wa yo sẹ iso.

Jọsua 11:23

E Jọsua keghi khọn otọe ni hia fẹẹrẹ zẹ vbene Nọyaẹnmwa tama e Mosis. Ọ keghi muẹn ne ivbi Izrẹl ne ọ gha re ọghe iran, a na do gha ẹre ako ako, ọkpọkpa ne ẹwae ọkpọkpa. Ẹre emwa nii na ghi hẹwẹ vbe okuo.

Jọsua 14:1

Ọna ọrọre vbene a ya ghae otọe nẹ ivbi Izrẹl hẹ vbe Kenan vbe odẹ ekẹn Jọdan. Eliaza ne ohẹn, e Jọsua ne ovbi e Nọn kevbe ọkaolotu avbe ẹgbẹe ni rre Izrẹl ọ re ọ ghae nene otọ ne emwa nii.

Jọsua 3:17

Ẹghẹ ne iran na ye owẹ fian ẹn gberra vbe otọ ne ọ kae nii, avbe ohẹn ni mu Ẹkpẹti Ile ọghe Nọyaẹnmwa keghi mudia ye otọe ne ọ kae vbe adesẹneva Jọdan a te do miẹn wẹ emwa hia lae gberra.

Jọsua 4:12

Emwa ẹwae Riubẹn kevbe Gad kevbe a gha wa ẹwae Manasẹ ye ihe eva, keghi mu egbe ne a gha ya khọn okuo zẹ vbene Mosis tama iran.

I Samuẹl 7:12

Ẹre Samuẹl na mu okuta ọkpa, ọ keghi mu ẹẹn ye ẹkpo Mizpa kevbe Siẹn, ọ wẹẹ, “Te Nọyaẹnmwa wa yi ima obọ ke ẹghẹ ni gha dee.” Ọ na rhunmwuda onii gha tie ẹre “Okuta Iyobọ.”