Diuteronomi 1:17 - Edo Bible (E Baibol Ẹdo) Version 1996

¹⁷ Wa ghẹ gbe ghe obọ ọkpa vbe uwa a bu ohiẹn hiehiere. Abọkpa nii wa ya gha bu ohiẹn hia, ọmwa ne ọ khọnrẹn wẹ ne ọ gha khin. Wa ghẹ mu ohan ọmwarhọkpa, rhunmwuda obọ Osanobua ọ re ohiẹn ne uwa bu ke rre. A deghẹ wa miẹn ohiẹn ne ọ wegbe sẹ uwa, wa ghi mu ẹẹn bu mwẹ gha dee ne I bu ẹre.’

Diuteronomi 1:17 ပူးပေါင်းရင်းမြစ်များ

Gẹnẹsis 18:25

Vbe na i na gbe awẹawẹ u i ra gbe ni ma rukhọ ba eni rukhọ. Ọnii i gia ru wẹ i sẹtin ru vberriọ. Ẹghẹ nii, a ghi rri eni ma rukhọ oya zẹ vbe eni rukhọ. Ọnii i gia ru, enọbuohiẹn otọ agbọn hia, te ọ gha ru emwi nọkere.”

II Samuẹl 14:14

Te ima gha he wulo, te ima yevbe amẹ ne a rhurhẹe ku otọ ne ẹ i ghi gia dọlegbe si koko. Emwa gha wulo, uhin ighẹ Osanobua ighi vbe dọlegbe viọ iran gha die agbọn. Sokpan ọba sẹtin gualọ odẹ la rhie ọmwa ke iwe rre.

II Krọnikol 19:5

Ọ keghi viọ iran ni bu ohiẹn lele ẹvbo ne a gba odin gaa vbe Juda hia,

II Krọnikol 19:6

ọ tama iran wẹẹ: “Wa gha mwẹ ẹwaẹn vbe uwa a gha hu ohiẹn, ẹre asẹ ọmwa ne agbọn ọ re uwa ya winna, sokpan asẹ ọghe Nọyaẹnmwa nọ, ọ vbe rrọ yaba uwa vbe uwa a bu ohiẹn.

Job 31:34

Ohan ẹmwẹ ne emwa gha ta ma he mu mwẹ ẹdẹ, I ma he hunwan ẹdẹ ra ne I khui egbe ye owa, rhunmwuda ighẹ ohan ogie iran mu mwẹ.

Psalm 82:2

“Wa dobọ ohiẹn ai ta ẹmwata ne a bu yi, wa ghẹ ghi bu ohiẹn ikpanro ne avbe emwa dan!

Ẹksọdọs 18:18

U gha ru ẹe, te u ra wiẹn egbe ruẹ ya na ke uwẹ kevbe emwa nii guẹ. Ọ na bun gbe sẹ mwẹ, wẹ ọkpa i sẹtin ru ẹe.

Ẹksọdọs 18:22

Gie iran gha re ne ọ bu ohiẹn iran na ne a wa rẹn yọ. Iran sẹtin gha viọ ẹzọ nii lọghọ bu ruẹ rre, sokpan iran ghi gha tobọ iran bu avbe ne giẹrẹ nii rrọọ. Erriọ ọre ọ gha na khuẹrhẹ nuẹn sẹ vbe iran ra guẹ mu vbe ihe na.

Ẹksọdọs 18:26

Iran kegha re emwa nii bu ohiẹn ọghe emwa nii, zẹ vbe emwa ne a wa rẹn yọ, iran kegha viọ ẹzọ nii lọghọ nii rrọọ bu e Mosis rre, sokpan iran na tobọ iran gha bu ohiẹn ẹzọ ne giẹrẹ nii rrọọ.

Itan 18:5

Emwi ne ọ ma gba nọ ne a ya ma ọmwa ne ọ rriabe vbe ne a ma na rhie ase ne ne ọ rria ase.

Itan 24:23

Avbe emwa ẹwaẹn ọ re ọ vbe guan avbe ẹmwẹ na. Emwi ne ọ ma gba nọ ne ọmwa ne ọbuohiẹn ka gha mwẹ ẹmwẹ nii vbe ekhọe nẹ.

Itan 28:21

Ohiẹn ikhuiwu i maa. Sokpan, enibuohiẹn eso gha ru emwikemwi ne ọ ma gba, sokpan ne ọ miẹn igho odieke ne ọ kanmwa sẹẹ re vbọ.

Itan 29:25

Emwi dan wa nọ ne a gha mu ẹmwẹ emwi ne ọmwa ọvbehe ro vbekpa ọmwa ro, sokpan, u gha mu ẹtin yan e Nọyaẹnmwa, ẹbe fo.

Jerimaia 1:17

Mu egbe, Jerimaia, ya talọ avbe ẹmwẹ hia ne I we ne u tama iran, ma iran. Ghẹ gie ohan iran mu ẹẹn nian, ne a ghẹ miẹn wẹ te I ghi gie ohan iran mu ẹẹn sayọ vbe u gha sẹ ehe ne iran ye ne.

Levitikọs 19:15

Gha re ne ọ ta ẹmwata kevbe uhunmwu ẹmwẹ; u gha ra bu ohiẹn, ghẹ yaba ovbiogue ra ne u mu ohan enọfe.

Malakai 2:9

Rhunmwuda ọnii, te imẹ ghẹghi vbe ru ẹe wẹ ne ivbi Izrẹl gha zan uwa rhunmwuda wa ma ru vbene imẹ ho; wa gha ma emwa emwi, wa i ya obọkpa mu emwa hia.”

Matiu 22:16

Iran keghi rhunmwuda ọnii gie eso vbe uwu avbe erhuanegbe iran ba avbe igbesa Hẹrọd bu Jesu gha khian. Iran tama rẹn wẹẹ, “Ọmwa ẹmwata ọre ima rẹn ruẹn yi, ẹmwata ne ọ rre vbene Osanobua mu ẹmwẹ ẹdẹ agbọn emwa ne agbọn yi, ọre u ma emwa re, vbe ne u i na vbe lele ne agbọn khare, rhunmwuda ighe osi ẹrrẹe ọghe ukpo ne ọmwa ye, ẹ i si ọ.

Iyẹn ne ọ Maan Ọghe Mak 12:14

Iran keghi bu ẹre gha dee, iran tama rẹn wẹẹ, “Ọmamwaemwi, ọmwa ne ọ ta ẹmwata ma rẹn ruẹn yi, wẹ i lele ne agbọn khare, rhunmwuda osi ẹrrẹe i siọ, sokpan, ẹmwata ne ọ rre vbene Osanobua mu ẹmwẹ edẹ agbọn emwa yi ọre u ma emwa re. Tama ima, ọ kere vbe ọmwa a ha igho uhunmwu gie Ọgbaisi e Rom ra ọ ma ke? Ne ima ha ẹre ra ne a ghẹ hae?”

Iyẹn ne ọ Maan Ọghe Luk 20:21

Avbe ọrhẹ ni keghi khama Jesu wẹẹ, “Ọmamwaemwi, ma rẹnrẹn ighẹ emwi ẹmwata ne ọ gbae ọre u ma emwa ẹre. Ma rẹnrẹn ighẹ osi ẹrrẹ i siọ, sokpan ẹmwata ne ọ rre vbene Osanobua mwamwa ẹmwẹ emwa ne agbọn yi ọre u ma emwa re.

Ebe ne Pọl gbẹẹn gie emwa Rom 2:11

Rhunmwuda, aro ọkpa ọre Osanobua ya ghe emwa hia.

Ẹfisọs 6:9

Wa ne arowa, wa vbe gha yin ghe eviẹn uwa vberriọ, wa da obọ aro ne a zẹ mu iran yi. Wa yerre wẹ, ke uwa kevbe eviẹn uwa, arowa ọkpa ọre uwa mwẹ vbe ẹrinmwi, obọ ọkpa ọre irẹn ya mu emwa hia.

Diuteronomi 10:17

E Nọyaẹnmwa Osanobua uwa kpọlọ sẹ ẹbọ hia kevbe ẹtin hia. Ọmwa ne ọ kpọlọ ne ọ mwẹ ẹtin rẹn khin, ọmwa ne ọ kere ne a gha mu ohan ẹnrẹn ẹsẹse. Ẹ i gbe ghe obọ okpa, ẹ i miẹn igho iyeke.

Diuteronomi 16:19

Wẹ ne iran ghẹ bu ohiẹn ne ẹ i re ẹmwata ra ne iran ghe ikpanro, iran ghẹ vbe miẹn ọmwa oko odieke rhunmwuda te oko odieke rhu emwa aro, uhin ke ọghe umẹwaẹn kevbe emwa ẹmwata, ọ ghi ya iran gha khiẹn ohiẹn bu.

Diuteronomi 24:17

“Ghẹ gban emwi ne ọ khẹke ọmọ ne ẹ i mwẹ erha ra orhunmwuyẹn hin iran obọ rre, ghẹ vbe miẹn ẹgbẹe ukpọn wẹ ne u da ẹe yi ye emwi ne u rhie nẹ ẹn mọmọ.

Diuteronomi 25:1

“Gie a kha ighẹ ivbi Izrẹl eva yo iko ne a ya bu ohiẹn iran, a na bu ase ne ọkpa, a keghi bu abe gbe nọkpa.

Kọlose 3:25

Ọmwa ne ọ zẹ iba, ọmwa ne ọ khọn rẹn wẹ ne ọ gha khin, a gha vbe ha ẹre osa iba ne ọ zẹe, rhunmwuda obọ ọkpa ọre Osanobua ya mu emwa hia.

I Tẹsalonaika 2:4

Vberriọ, vbe ne Osanobua wẹ ne ima gha guan, ọre ima ya guan, rhunmwuda, Osanobua gba ẹko ima, ọre ọna mu ẹmwẹ Iyẹn Ne ọ maa ye ima obọ. Ẹ i re ne ọ gha yẹ emwa ne agbọn ma ru, vbe ẹ i re ne ọ gha yẹ Osanobua ọmwa nọ danmwẹ emwi ne ọ rre ima ekhọe ghe.

Jems 2:9

Sokpan a deghẹ vbene ọmwa ye hẹẹ vbe ore egbe, ọre uwa ya ghe obọ ne uwa gha ya muẹn, wa ru orukhọ nẹ, nene Uhi ghi vbe bu abe gbe uwa zẹ vbe ne ọ rra uhi.

I Pita 1:17

Wa gha na erhunmwu ghe Osanobua, erha ọre uwa tie ẹre re, ọmwa ne ọ ya omwa ọkpa bu ohiẹn emwa hia zẹ vbe iwinna ne dọmwadẹ ọghọe winnaẹn, rhunmwuda ọnii khekherriọ, ẹghẹ ne uwa ghi mwẹ vbe agbọn vbe emwa na, wa ya ẹe gha go wan rẹn.

I Samuẹl 16:7

Sokpan, e Nọyaẹnmwa tama rẹn wẹẹ, “Ghẹ ghe ẹre wẹ ọ tanẹn ra wẹ ọ mose, mẹ he ẹe nẹ, rhunmwuda, ẹ i re vbene ọmwa ne agbọn ghe emwi ọ re imẹ ghe ẹre. Agbọn ghe ikpakpa, sokpan, ekhọe imẹ ghe.”

I Samuẹl 2:25

Ọmwa gha ba emwi ku ru ghe ọmwa ọvbehe, Osanobua sẹtin degue ẹre, sokpan de ọmwa ne ọ ra degue ọmwa ne ọ ba emwi ku ru ghe Osanobua?” Sokpan, iran ma zẹ ye erha iran re, rhunmwuda, Osanobua ta ẹe nẹ wẹ te irẹn ra fuẹn iran uan.