Daniẹl 9:3 - Edo Bible (E Baibol Ẹdo) Version 1996

³ I keghi kakabọ na erhunmwu ghe e Nọyaẹnmwa Osanobua, I kegha rinmwian ẹẹn, I kegha ya ohanmwẹ gbe egbe, I kegha rhuan ukpọn akhiẹ, I na vbe gha tota ye uwu emuẹn.

Daniẹl 9:3 ပူးပေါင်းရင်းမြစ်များ

II Samuẹl 12:16

E Devid keghi na erhunmwu ghe Nọyaẹnmwa wẹ ne egbe rran ọmọ nii. E Devid ma ghi rri evbare. Asọn hia, ọ ghi la ughugha ẹre, ọ ghi ya lovbiẹ ye otọ owa.

Ẹzra 10:6

Iyeke ọnii, ọ keghi kpao vbe odaro Ọgua Osa rre, gha rrie owa ne Jehohanan ne ovbi Eliasib dia, ọ na gbe asọn nii vbe evba, ọ na gha khiẹ ye orukhọ avbe ọyiwe nii, ọ ma re, ọ ma da.

Ẹzra 8:21

A ghi sẹ Ẹzẹ ne a fiaẹn ọghe Ahava, I keghi wẹ ne ima hia yo aguẹ, ne avbe mu egbe rriotọ vbe odaro Osanobua mwa, ne a vbe rinmwiaẹn ne ọ su ima vbe okhian mwa, kevbe ne ọ degue ima kevbe ivbi ima deba emwi ne ima mwẹ hia.

Ẹzra 9:5

Ọ ghi sẹ ẹghẹ ne a ya zọ ese ota, I keghi guakpao vbe ehe ne I tota yi gha khiẹkhiẹ egbe, ẹwu ne I sọlọ ua ni keghi ye rrọ mwẹ urhu, I na diguẹ ne I na erhunmwu, I na viọ obọ da odukhunmwu ghe Nọyaẹnmwa Osanobua mwẹ.

Nehimaia 9:1

Vbe ikpẹdẹ ne ọ ya gba vbe enẹyan ugie vbe uki ọkpa nii, avbe ivbi Izrẹl keghi si egbe koko ne iran do ye aguẹ ya khiẹ ye orukhọ iran. Iran keghi wannegbe iran hin uwu ẹbu avbe ọrriọvbe rre nẹ, iran keghi rhuan ukpọn akhiẹ iran na zẹ ekẹn ye uhunmwu zẹ vbe ama akhiẹ. Iyeke ọnii, iran keghi kpaegbe mudia gha miẹn orukhọ ne iran kevbe avbe erha iran odede ru kue.

Ẹsta 4:16

“Ye si avbe Ju ni rre Susa hia koko, wa yo aguẹ ne uwa gha na erhunmwu mẹ. Wa ghẹ re wa ghẹ da la avan eha kevbe asọn eha. Me kevbe ibiẹka ikhuo ni re eguọmwadia mwẹ, gha vbe ru vberriọ. Vbe iyekọni, I gha bu ọba gha khian, a gha rhe miẹn wẹ uhi ma kha vberriọ. A deghẹ te I gha ghi ye uhunmwu khiẹ ọre rhunmwuda ne I na ru vberriọ, a gunmwẹ ye uhunmwu khiẹ ọre.”

Job 42:6

Rhunmwuda ọnii, ekhue ẹmwẹ ne I talọe hia mu mwẹ. I roiro fiwerriẹ vbe uwu ebubẹ kevbe emuẹn.”

Psalm 35:13

Vberriọ, ẹghẹ ne egbe ma na rran iran, ukpọn akhiẹ ọ re I gha rhuan. I kegha ya ohanmwẹ rri egbe, I na gbe uhunmwu kotọ na erhunmwu.

Aizaia 22:12

Ẹghẹ nii, Oghodua ne Udazi keghi datie uwa ne uwa gha viẹ kevbe ne uwa vbe gha khiẹ, ne uwa khiokhio eto ua, ne uwa vbe rhuan ukpọn akhiẹ.

Jerimaia 33:3

“Kpe tie mwẹ, I gha khuẹnniẹn. uẹn I gha ta ẹmwẹ ọyunnuan ni mu ohan ne u ma he rẹn emwirhọkpa vbe ekpa ẹre ma ruẹn.

Ezikiẹl 36:37

E Nọyaẹnmwa ne Udazi khare wẹẹ, “I gha dọlegbe gie ivbi Izrẹl do nọ iyobọ vbe obọ mwẹ, I gha gie iran vbe gha muan yọ zẹ vbe oghẹn ohuan.

Daniẹl 6:10

E Daniẹl ghi họn ighe a rhie obọ ye ebe nii nẹ, ọ kegha rrie owa. Vbe owa egedege ne ọ ye, avbe ewindo eso ni viọ aro da e Jerusalẹm keghi rrọọ. Zẹ vbene ọ ka ru ẹe de yi, evba nii ọ re ọ na gha diguẹ vbe ewindo ne a kiere nii, ọ na gha na erhunmwu ghe Osanobua igbaeha vbe ẹdẹ.

Daniẹl 9:2

Vbe ukpo ne okaro ne ọ rriọba, I kegha tie ebe nọhuanrẹn nii, I keghi vbe gha mu ẹmwẹ ukpo e kigbesiyenẹ ne Jerusalẹm ra wa ya gha re itowa ro, zẹ vbene Nọyaẹnmwa tama e Jerimaia ne akhasẹ.

Daniẹl 9:20

I keghi ye gha na erhunmwu nii khian, I keghi miẹn orukhọ mwẹ kẹe kevbe orukhọ ọghe Izrẹl ne emwa mwẹ, I na gha rinmwian e Nọyaẹnmwa Osanobua mwẹ ne ọ dọlọ rhie Ọgua Osa ẹre nọhuanrẹn ye ihe.

Daniẹl 9:4

I na erhunmwu ghe e Nọyaẹnmwa Osanobua mwẹ, I keghi miẹn orukhọ emwa mwẹ kue I keghi kha wẹẹ, “E Nọyaẹnmwa Osanobua mwẹ, wẹ kpọlọ ẹsẹse, ma vbe ya ọghọ nuẹn. Te uwẹ rhie obọ lele ile ne u tae, u keghi mwẹ aho ẹmwẹ ọmwa ne ẹ i fafaa ghe iran ni ho ẹmwẹ ruẹn, iran na vbe gha ya uhi ruẹ ru emwi.

Joẹl 1:13

Wa yọ ukpon akhiẹ ne uwa gha viẹ ne avbe ohẹn ni ga vbe Ogiukpo. Wa gha rrie uwu Ọgua Osa, ne uwa ya ye asọn hia khiẹ! Ọka ra ayọn i ghi rrọ, ne uwa gha ya ru imuohan gie Osanobua uwa.

Joẹl 2:12

“Sokpan, vbene emwi hia ye ye na, wa fiwerriẹ ne uwa bu mwẹ gha dee, ekhọekekhọe hia, deba aguẹ, kevbe eve kevbe akhiẹ.” Erriọ Nọyaẹnmwa khare:

Jona 3:5

Emwa e Ninevi keghi ya ẹmwẹ Osanobua yi. Iran keghi ta ẹe wẹ ne emwa hia yo aguẹ, ẹre emwa nii hia, kevbe ne ọ kpọlọ sẹẹ ya sẹ ne ọ kanmwa sẹ, keghi viọ ukpọn akhiẹ rhuan, ne iran ya rhie ma ighe iran fi uyinmwẹ werriẹ nẹ.

Matiu 17:21

Sokpan erhunmwu kevbe aguẹ ọkpa ọre ọ sẹtin khu egbe ọna ladian, emwi ọvbehe i rrọọ ne ọ gha sẹtin.]”

Iyẹn ne ọ Maan Ọghe Luk 2:37

Ọdọ re ghi vbe wu nẹ, ọ keghi vbe ya ukpo enẹ yan iyenẹ ru ẹgbẹ. Ẹ ghi kpao vbe Ọgua Osa rre. Asọn vbe avan ọre ọ ya ga Osanobua vbe aguẹ kevbe erhunmwu.

Iwinna 10:30

Kọniliọs keghi kha wẹẹ, “Odẹ ẹghẹ vbe nian vbe nẹghẹdia, I kegha na erhunmwu vbe uwu owa mwẹ, vbe ẹghẹ ẹgogo eha ọghe avan. Vbe udomwurri, orhiọnkpa ne ọ ya ukpọn nọ fi wain wain mu egbe, keghi mudia ye odaro mwẹ,