Daniẹl 7:9 - Edo Bible (E Baibol Ẹdo) Version 1996

⁹ Ehe ne I na ye ghe ẹre nii, a keghi munọ avbe ẹkete yotọ. Ọmwa nii ne ọ wa rrọ dee ẹdẹdẹmwẹdẹ keghi tota ye ọkpa vbe avbe ẹkete nii, ukpọn rẹn keghi fuọfua vbe isonorhọ, eto ẹre keghi yevbe ititi oru ne a ma gua. Ẹkete ẹre ni ne a mu yan emwi ne ọ lẹga vbe owẹ imọto erhẹn, keghi zẹ ogidi erhẹn kua.

Daniẹl 7:9 ပူးပေါင်းရင်းမြစ်များ

I Ọba 22:19

E Makaia keghi rhie te ẹe wẹẹ “Danmwehọ vbene Nọyaẹnmwa kha hẹ! I keghi bẹghe vbe Nọyaẹnmwa tota ye ẹkete ẹre vbe ẹrinmwi, avbe odibo ẹre keghi mudia lẹga ẹre.

II Krọnikol 18:18

E Mikaia keghi rhie te ẹe wẹẹ, Banbanna nian, danmwehọ vbene Nọyaẹnmwa kha hẹ: “I keghi bẹghe vbe Nọyaẹnmwa miẹndia vbe ẹkete ẹre vbe ẹrinmwi, avbe odibo ẹre hia ke tẹn dia ke ẹe.

Psalm 45:8

Uwinhinmwẹ oziya kevbe alọe rre ukpọn ruẹn; avbe ikpezikẹn ghi gha ku ne uẹn ghe, vbe uwu ẹguae ruẹ ne a ye akọn eni tee.

Psalm 90:2

Vbe uwẹ te do yi avbe oke ra u te do ru ẹe ne agbọn gha rrọ wẹ ọrọre Osanobua etẹbitẹghori wẹ ọ re ọ vbe ra gha re Osanobua ẹdẹdẹmwẹdẹ.

Psalm 93:2

Ke omuhẹn gha dee, te ẹkete ruẹ wa de ziẹn gbain, Nọyaẹnmwa, wẹ rrọ nẹ ẹghẹ te do suẹn.

Aizaia 6:1

Vbe ukpo ne Ọba Uzaia wu, I keghi bẹghe Nọyaẹnmwa. Ọ keghi tota ye ẹkete ẹre, ọ yo, ọ keghi vbe ye gelete, emwi ne ọ ya mu egbe keghi vuọn Ọgua Osa hia.

Aizaia 9:6

A biẹ ọmọ ọkpa ne ima! A rhie ọmọ okpia ọkpa ne ima! Rẹn ọ ra gha re ogie mwa. Eni ne a ra gha tie ẹre ọrọre, “Ọbude Ọyunnuan.” “Osa ne Oghodua,” “Erha Etẹbitẹ,” “Okoro Ọfumwegbe.”

Jerimaia 49:38

I gha fuẹn avbe ọba kevbe olotu iran an fẹẹrẹ, I ghi do mu ẹkete mwẹ gbọ ye evba.

Ezikiẹl 1:26

Ẹkete ne ọ yevbe ne a ye okuta ighobioye safaia ru kegha rre odukhunmwu emwi ne ọ yevbe ekharha ne a fi nii, emwi okpa ne ọ yevbe ọmwa nagbọn keghi tota yan ẹkete nii.

Daniẹl 7:13

Vbe uwu u mian na vbe asọn nii, I keghi bẹghe emwi ọkpa ne ọ yevbe ọmwa. Ọ kegha bu mwẹ dee, okuku amẹ wa lẹga ẹre, ọ keghi bu ọmwa ne ọ wa rrọọ dee ẹdẹdẹmwẹdẹ nii, a na rhie ẹre ma rẹn.

Daniẹl 7:22

Ẹre rẹn ni ne ọ wa rrọ ẹdẹdẹmwẹdẹ na rre, ọ keghi bu ase ne emwa Osanobua ne ọ Sẹehia. Ẹghẹ sẹe nẹ ne emwa Osanobua gha na gha mwẹ ẹtin ọba.

Maika 5:2

E Nọyaẹnmwa khare wẹẹ, “Bẹtlẹhẹm Efrata, ọkpa vbe uwu ẹvbo ni kanmwa sẹẹ vbe Juda ọre uwẹ khin, sokpan, uwu uwẹ ọ re I gha ke rhie ne ọ khaemwisẹ ladian ne Izrẹl, rẹn gha vbe ke uniẹn nẹdẹ ne a ka ya gha bu ẹvbo nii ladian.”

Habakọk 1:12

E Nọyaẹnmwa, ke omuhẹn fẹẹrẹ gha dee, wẹ ọrọre Osanobua. Wẹ ọrọre Osanobua mwẹ, nọhuanrẹn kevbe etẹbitẹ. Nọyaẹnmwa, Osanobua kevbe ọmwa ne ọ degue mwẹ hin ẹbe rre, wẹ hannọ ivbi e Babilọn zẹ, u keghi ya iran wegbe ne iran miẹn ehe na gha rri ima oya.

Matiu 17:2

Ọ keghi sirra iran fi egbe werriẹ, aro ẹre kegha fi wain wain vbe owẹn, ukpọn rẹn keghi fuọfua vbe ukpa.

Matiu 28:3

A gha ghe ẹre, ọ yevbe ayan, ukpọn rẹn keghi fua vbe isonorhọ.

Iyẹn ne ọ Maan Ọghe Mak 9:3

Ukpọn rẹn kegha fuọfua ọ kevbe fi wain wain, ọ fuọfua gberra vbene ọmwaikọmwa vbe agbọn na gha sẹtin họ ẹre sẹ.

Iwinna 2:30

Akhasẹ rẹn khin, ọ rẹn emwi ne Osanobua ve irẹn re. Osanobua tama rẹn wẹ, rẹn gha ya ọkpa vbe uwu avbe uniẹn ọnrẹn ma ọba, zẹ vbene irẹn vbe ye.

Iwinna 2:33

A tọẹn mu gha rrie obọ erha ọmwa Osanobua, ne ọ ya miẹn ẹre Orhiọn Ne Ọ Huanrẹn ne Erha ẹe ve ẹre. Emwi ne uwa ghi bẹghe na nian, kevbe ne uwa vbe họn, emwi ne ọ ya ru ima ẹse nọ, ọ keghi hihiẹe yan ima.

Filipai 3:9

Ne I vbe khian ne a wa kugbe ba irẹn fo. Mẹ i ghi mwẹ emwi obọ mwẹ ne I gha ya tie egbe mwẹ ọmwata, egbe ne I gha te la ekpa a ru vbene nene Uhi khare gha mwẹ, ọmwata ne I ghi khin na nian, keghi re ne a la ekpa a ya Kristi yi rhie ne ọmwa, a re ọmwata ne ọ ke obọ Osanobua rre, ne ẹyotọ ẹre re iyayi.

I Timoti 6:16

Rẹn ọkpa kẹkan ọre ne ẹ i wu ẹdẹ, ne ọ rre uwu uwanmwẹ ne ẹ i gie a ghe. Ọmwa ne ọmwa ọkpa ma he ye aro kan, kevbe ne ọmwaikọmwa i sẹtin miẹn ọre aro, ọghọe ọre uyi khin deba ẹtin etẹbitẹ. Isẹ.

I Jọn 1:5

Ọna ọrọre ẹmwẹ ne ima họn vbe unu Ovbi ẹre, ne ima vbe do tama uwa: Uwanmwẹ ọre Osanobua khin, ebiebi i vbe rre uwu irẹn hiehiere.

Arhie Maan 1:14

Eto ẹre keghi fua vbe ititi oru ra zẹ vbe isonorhọ, aro ẹre kegha kpannọ ogiọnmwẹ, ọ ye vbe erhẹn.

Arhie Maan 19:18

Wa larre ne uwa do rri efun egbe ọghe avbe ọba kevbe ekaokuo nekhua, ivbiyokuo, efun ẹsin kevbe emwa ni hin iran, efun emwa hia kevbe eviẹn kevbe eni yan egbe iran, kevbe ni kpọlọ kevbe ni kanmwa!”

Arhie Maan 20:4

Vbe iyeke ọnii, I keghi do bẹghe avbe ẹkete kevbe iran ni tota yọ, a keghi rhie ẹtin ne iran, ne iran ya gha bu ohiẹn, I keghi vbe bẹghe orhiọn avbe emwa ne a gbele ba ẹmwẹ wẹ, iran kpe orhu ẹmwata ne Jesu rhie rre kevbe ẹmwẹ Osanobua. Iran ma ya uhunmwu rhanmwẹ otọ ne aranmwẹ oha nii, ra amazẹ ọre, ra a ma wẹ ne a vin ama aranmwẹ oha nii ye iran uharo ra obọ. Iran keghi gu Kristi gha rrọọ, iran keghi vbe gu ẹe khaemwisẹ zẹ vbe ọba la ukpo arriaisẹn nii.

Arhie Maan 4:2

Vbe ọwarọkpa nii, Orhiọn keghi hin yan mwẹ. Vbe odukhunmwu vbe ẹrinmwi, ẹkete ọkpa kegha rrọọ, orhunmwu ọkpa keghi tota yọọ.