Daniẹl 7:7 - Edo Bible (E Baibol Ẹdo) Version 1996

⁷ Ehe ne I na ye ghe ẹre nii aranmwẹ ne ogienẹ keghi ladian ọ wa mwẹ ẹtin ne ọ mu ọmwa ohan, ọ gbe orrirri. Akọn ematọn ẹnrẹn ne lẹulẹu, ọ re ọ ya piẹn emwi ne ọ miẹn gbe, ọ ghi ya owẹ mama iran ginna otọ. Ọ keghi mwẹ igho igbe ne ọ ya lughaẹn ne avbe aranmwẹ nekpa.

Daniẹl 7:7 ပူးပေါင်းရင်းမြစ်များ

II Samuẹl 22:43

I dunmwu iran an, iran keghi yevbe ebubẹ, I ya owẹ rrilo iran muotọ, zẹ vbe ekẹn vbe orere.

Job 41:14

De ọmwa ne ọ gha sẹtin yan ẹre agbanmwẹ nii, ne a yọyọ akọn ni mu ohan ni gba?

Ezikiẹl 40:2

Vbe uwu umian, Osanobua, keghi mu mwẹ gha rrie otọ Izrẹl, ọ keghi mu mwẹ yan oke ne ọ yo, I keghi ya bẹghe vbe odaro mwẹ avbe owa ne a bọlọe eso, ọ keghi yevbe ẹvbo ne ọ kpolo.

Daniẹl 2:19

Vbe Asọn nii zẹẹ, a keghi ta imina nii ma e Daniẹl vbe aro umian, rẹn keghi rho Osanobua ẹrinmwi:

Daniẹl 7:13

Vbe uwu u mian na vbe asọn nii, I keghi bẹghe emwi ọkpa ne ọ yevbe ọmwa. Ọ kegha bu mwẹ dee, okuku amẹ wa lẹga ẹre, ọ keghi bu ọmwa ne ọ wa rrọọ dee ẹdẹdẹmwẹdẹ nii, a na rhie ẹre ma rẹn.

Daniẹl 7:2

Emwi ne I miẹn vbe asọn nii ọna khin. Ẹhoho keghi hoho ke igienenẹ rre, ọ na ghi mu aro okun rueghe.

Daniẹl 8:10

Ọ wegbe sẹrriọ wẹ ọ keghi sẹtin gha gu ivbiyokuo ẹrinmwi gbinna, avbe orhọnmwẹ tobọ iran, ọ keghi munọ eso gbotọ vbọ, ọ na ye owẹ rrilo iran ginna otọ.

Daniẹl 8:22

Igho enẹ ne ọ ghi zọ vbe a kpan igho nokaro fuan nẹ, mudia ye ihe avbe arriọba enẹ ne otọe arriọba ni ra ghae egbe yi, ne ẹ i ghi ra wegbe vba arriọba ne okaro.

Zẹkaraia 2:1

Vbe umian ọvbehe, I keghi bẹghe okpia ọkpa ne ọ rhie ọkpọ ne a ya mwa emwi mwẹ obọ.

Arhie Maan 12:3

Ama ọvbehe keghi vbe rhie egbe maa vbe iso. Ugbogiorinmwi ne gẹdẹgbẹ ọkpa ne ọ baa kegha rre evba, ọ keghi mwẹ uhunmwu ihinrọn, igho igbe, ẹde ọkpọkpa kegha rre dọmwadẹ uhunmwu ẹnrẹn.

Arhie Maan 13:1

Iyeke ọnii, I keghi ya bẹghe aranmwẹ oha ọkpa vbe ọ ke uwe okun ladian dee, ọ keghi mwẹ igho igbe kevbe uhunmwu ihinrọn. Ẹdẹ keghi rre ọkpọkpa vbe uwu avbe igho na, a keghi gbẹn eni uyinmwẹ dan ye ọre uhunmwu.

Arhie Maan 17:12

“Igho igbe ne a u bẹghe, kegha re ọba igbe ni ma he suẹn gha rri ọba, sokpan, a gha rhie asẹ ne iran ne iran gu aranmwẹ oha nii rriọba la ẹgogo ọkpa.

Arhie Maan 17:7

Odibosa nii keghi tama mwẹ wẹẹ, “Vbe ọ zẹ ne ọna na yan ruẹn unu uan yi? I gha ta oro emwi ne a ye okhuo na kevbe aranmwẹ oha ne ọ mu ẹn khian kha, aranmwẹ oha nii ne ọ mwẹ uhunmwu ihinrọn kevbe igho igbe.

Arhie Maan 17:8

Aranmwẹ oha ne u bẹghe nii, te ka gha rre agbọn yi, sokpan, banbanna nian, ẹ i ghi rrọọ ọvbehe, ọ wu nẹ, te ọ ghi ra ke uwu uvun ne ẹ i mwẹ otọ ladian na, ọ ghi ladian ne a ya fuẹn ọnrẹn uan. Emwa ni rre agbọn ne a ma he gbẹnnẹ eni ẹnrẹn ye ebe ẹfe emwa ni rrọọ, ni ma he wu vbe a te do suẹn agbọn, unu gha yan iran ẹsẹse vbe iran a miẹn aranmwẹ oha nii. Rhunmwuda, ọ te ka gha rre agbọn yi, sokpan, ẹ i ghi rre agbọn ọvbehe, sokpan ọ gha ye dọlegbe ya egbe ladian.