Daniẹl 6:4 - Edo Bible (E Baibol Ẹdo) Version 1996

⁴ Rhunmwuda ọnii, avbe iran ni su ẹvbo nekpa kevbe avbe gọvina kegha gualọ ehe ne iran gha na miẹn abakuru vbe odẹ ne Daniẹl ya gbearoghe otọe arriọba nii sokpan iran ma miẹn, rhunmwuda, ọmwa ne ọ gie a mu ẹtin yan ọ re Daniẹl khin, ọ ma vbe ru emwi ne ọ ma gba ọghe ogberhu.

Daniẹl 6:4 ပူးပေါင်းရင်းမြစ်များ

Gẹnẹsis 41:38

Ọ keghi khama iran wẹẹ, “De ehe ne a gha na miẹn ọmwa ọvbehe nẹ ọ maa sẹẹ Josẹf ne ọ mwẹ orhiọn Osanobua.”

Gẹnẹsis 43:18

A ghi viọ emwa nii sẹ owa e Josẹf, ohan kegha mu iran, iran kegha ro wẹẹ, “Rhunmwuda igho ne iran werriegbe viọ ye ima ẹkpo ọre iran na viọ ima gha die emwa na. Iran gha dekun ima wan, iran ghi viọ ima oghunmwu, iran ghi miẹn ima ekẹtẹkẹtẹ ima.”

Itan 29:27

Ọmwata i ho ẹmwẹ ọmwa dan, ọmwa dan i vbe ho ẹmwẹ ọmwata.

Asan-Ibo 4:4

I vbe rẹn emwi ne ọ si ẹe nẹ, ne emwa na miẹn ẹsọn sẹrriọ vbe agbọn na, ne ọ miẹn ehe na dunna ne iran: emwi ne ọ siẹe ọrọre wẹ emwi ne ogieva iran mwẹ viẹn ye iran aro, sokpan, ọna i vbe mwẹ esa, te ọ yevbe ne a khu ẹhoho khian.

Jerimaia 18:18

Emwa nii keghi kha wẹẹ, “Wa gia gualọ vbene a gha ru ẹmwẹ e Jerimaia hẹ. A gha miẹn avbe ohẹn ne ọ gha ma ima emwi rhinrin, avbe umẹwaẹn ni gha bu ima ude, kevbe avbe akhasẹ ni gha ta ẹmwẹ Osanobua ma ima. Wa gie a mu ẹmwẹ kuan rẹn, ne a ghẹ ghi danmwehọ ẹmwẹ ne ọ ta.”

Jerimaia 18:23

Sokpan, Nọyaẹnmwa, wẹ rẹn emwamwa iran wẹ ne iran ghe mwẹ uan. Ghẹ ye ọkhọ iran bọ iran, ra ne u ya orukhọ iran bọ iran. Mu iran gbotọ ne obọ ke ukhunmwu ne iran, ne u vbe ye obọ mu iran vbe ohu a gha mu uẹn.”

Jerimaia 20:10

I ghi họn vbe agbọn hia tae wẹẹ, “Ohan gba ehe hia, wa gia ya gu ẹe gui ma iran ni khaemwisẹ.” Uhin ghe te avbe ọse mwẹ ni sikẹ mwẹ sẹẹ, khẹ ẹghẹ ne I gha ya de, iran wẹẹ, “Wẹ wẹ ẹ ghi gia rẹrẹ, ẹghẹ nii, obọ ima ghi vba ẹre ne a rria ẹre ikhi.”

Jerimaia 29:7

Wa gha ru emwi ne ọ maa ye dọmwadẹ ẹvbo ne I kue ne a viọ uwa oghunmwu gha rrie. Wa gha na erhunmwu ghe mwẹ ne iran rhunmwuda, agbọn gha maa iran, ọ gha vbe maa uwa.

Daniẹl 3:8

Ẹghẹ na nian, ivbi e Babilọn keghi miẹn ehe la la ivbi e Ju egbe.

Daniẹl 5:12

Ẹtin ughaẹn ọ re ọ wa gue ẹe, ẹwaẹn gba ne ẹẹn, ẹmwẹ imina ne a rhan otọ ẹre ẹmwẹ ibo ne a san, kevbe ẹmwẹ emwi ọkpaodin ne a rhan otọ ẹre. Rhunmwuda ọnii nian, gie ne a tie okpia na ne erha a he ẹre Bẹtẹsiaza, o gha tama ruẹn emwi ne a ya ena hia kha.”

Daniẹl 6:22

Osanobua giee odibo ẹre rre do ya obọ guee avbe oduma unu ne iran ghẹ sẹtin ru mwẹ emwi rhọkpa. Ọ ru ẹe vberriọ rhunmwuda ọ rẹnrẹn wẹ, I ma rẹn ọkpa, I ma rẹn eva, kevbe wẹ, I ma fidọn ghe ruẹ Umogun.”

Matiu 26:4

Iran keghi mwamwa vbene iran gha ya do mu Jesu hẹ ne iran gbe ẹe rua.

Matiu 27:18

Rẹn wa rẹn ighe ikhuiwu ọre iran ya si Jesu gie irẹn.

Iyẹn ne ọ Maan Ọghe Luk 20:20

Iran keghi rhunmwuda ọnii gha khẹ ẹghẹ ne ọ kere. Iran keghi rhie igho ne emwa eso ne iran mu akpa ọmwata yọ bu Jesu gha khian ya gualọ ẹre ẹmwẹ ne unu ne iran miẹn ehe na rhie ẹre yan asẹ kevbe ẹtin Ne ọ khaemwisẹ obọ.

Iyẹn ne ọ Maan Ọghe Luk 20:26

Iran ma miẹn ẹmwẹ ọkpa kẹkan de obọ mu vbe ẹmwẹ ọnrẹn sirra emwa ni ne evba, iran ghi na rhie unu re, ewanniẹn ne ọ rhie ne iran keghi kpan iran odin.

Iyẹn ne ọ Maan Ọghe Luk 22:2

Avbe igie ohẹn, iran ni ma emwa Uhi, keghi gualọ odẹ vbene iran gha ya gbe Jesu rhunmwuda ohan avbe emwa kẹkan mu iran.

Iyẹn ne ọ Maan Ọghe Jọn 19:4

Pailet dọlegbe bu emwa ni gbe ẹbu ye ore, ọ tama iran wẹẹ, “Wa danmwehọ, I ra do rhie ẹre gie uwa, ne uwa miẹn ehe na rẹn wẹẹ, ‘I ma miẹn emwi ọkpa ne I gha ya bu abe gbe ẹe.’ ”

II Kọrinti 11:12

I gha wa gha ru ẹe khian vbene I ru ẹe na, ne I miẹn ehe ne dobọ ẹre yi, ighẹ emwi nii ne avbe “Ukọ” nekpa nii, gha te miẹn ya gha rhuọ wẹ, vbe ne ima ya winna ẹre iran vbe ya winna.

Filipai 2:15

Ne uwa sẹtin gha re ne ẹ i mwẹ abe kevbe ne ọ huanrẹn, zẹ vbe ivbi Osanobua ne ọ gba na fo vbe agbọn ọ kẹkẹe kevbe ẹwobi emwa na. Wa gha fi wainwain vbe uwu ẹbu iran zẹ vbe orhọnmwẹ ne ọ rhie uwanmwẹ ne iso, zẹ vbene uwa na ta ẹmwẹ arrọọ ma iran.

I Timoti 5:14

Rhunmwuda ọnii, emwi ne I ho ọrọre wẹ ne avbe ẹgbẹ ni re ibiẹka gha rọnmwẹ ọdọ, ne iran biẹlẹ, ne iran gbe aro ghe owa iran, ne a ghẹ rhie otọ ne iran ne eghian mwa ya gha zan mwa.

Taitọs 2:8

Gha lo ẹmwẹ ne ọ gbae ne ẹ i gia gbe odan ye ọmwa ẹre, ne ekhue miẹn ehe na mu avbe eghian ighẹ iran ma ghi miẹn emwi rhọkpa ya zan ima.

I Pita 2:12

Wa gie uyinmwẹ ne uwa yin maa sẹ rriọ vbe uwu ẹbu avbe eni ma yayi wẹ, iran gha ba uwa ifi ẹzọ wẹ emwi dan ọre uwa ru, iran ghi vbe tobọ iran kha wẹ, wa vbe ru emwi esi, rhunmwuda ọnii, iran ghi rho Osanobua vbe Ẹdẹ ne ọ ra rre.

I Pita 3:16

Sokpan u ghi ru ẹre ọghe ọghọ vbe ute. Ghẹ gie ekhọe ruẹ bu ohiẹn gbe uẹ hiehiere, a i rẹn deghẹ te a ghi ya ukpẹ sakan uwa, ọmwaikọmwa ne ọ ya unu rhia uwa, vbe ekpa uyinmwẹ ne uwa yin, zẹ vbe ne ọ lele Kristi, ekhue ghi mu iran ba ẹmwẹ ne iran ta.

Giọgis 14:4

Erha ẹe vbe iye ẹe ma rẹn wẹ e Nọyaẹnmwa ọ re ọ ya e Samsin ru emwi na rhunmwuda e Nọyaẹnmwa gualọ odẹ ne ọ gha na gu emwa Filistia khọn. Vbe ẹghẹ ne a kha na, emwa Filistia ọ re ọ gha kha yan ivbie Izrẹl.

I Samuẹl 12:4

Emwa nii keghi wanniẹn wẹẹ, “U ma mu ima ru, ra ne u ya obọ yẹn ima ẹho, u ma gbe ima miẹn ima emwikemwi.”

I Samuẹl 18:14

ọ na gha ru rho obọ vbe emwi ne ọ ru hia rhunmwuda, e Nọyaẹnmwa rrọọ yaba ẹre.

I Samuẹl 22:14

Ahimẹlẹk keghi wanniẹn wẹẹ, “E Devid ọ re ne ọ guobọ ruẹ sẹ vbe avbe emwa ruẹn hia! Orruan an nọ, rẹn ọ vbe re ọkaolotu emwa ne u ya khẹ egbe, emwa ni rre ẹguae ruẹ hia wa vbe ya ọghọ ne ẹẹn ẹsẹse.