Daniẹl 6:28 - Edo Bible (E Baibol Ẹdo) Version 1996

²⁸ Agbọn keghi wa maa e Daniẹl vbe ẹghẹ ọba Dariọs kevbe ẹghẹ ọba e Sairọs ne ovbi e Pẹsia.

Daniẹl 6:28 ပူးပေါင်းရင်းမြစ်များ

II Krọnikol 36:22

Vbe ukpo ne okaro ne Sairọs khian ọgbaisi e Pẹsia, e Nọyaẹnmwa keghi ruẹe ne ẹmwẹ ne ọ la unu e Jerimaia ne akhasẹ ta, do sẹ. Ọ keghi rhie ye Sairọs ekhọe ne ọ ta ẹmwẹ na ladian, ne ọ gbẹnnẹ ọẹn ye ebe ne a vbe tie ẹre ladian vbe ehe ne otọ arriọba ẹre sẹe ehe ne ọ rhanmwẹ wẹẹ:

II Krọnikol 36:23

“Vbenian ọre Sairọs ne Nọgbaisi e Pẹsia khare. E Nọyaẹnmwa ne Osanobua ọghe Ẹrinmwi, ọ re ọ ya mwẹ ma ọba yan otọe agbọn hia, ọ na vbe ya ẹe fian okhuo mẹ wẹ ne I bọ Ọgua Osa ne irẹn vbe Jerusalẹm vbe otọe e Juda. Rhunmwuda ọnii nian, wa hia ni re emwa Osanobua, wa gha rrie odọ nii, te Nọyaẹnmwa ne Osanobua uwa gha deba uwa.”

Psalm 77:15

Ẹtin ruẹn ọ re u ya miẹn emwa ruẹn fan ivbi uniẹn Jekọb kevbe Josẹf.

Aizaia 44:28

I tama Sairọs wẹẹ, ‘Wẹ ọrọre ọmwa ne ọ gha ya gha khaemwisẹ mẹ; u gha ru vbene I ho ne u ru: U gha tae wẹ ne a dọlọ bọ Jerusalẹm kevbe wẹ ne a gbe ẹyotọ ọgua Osa.’ ”

Jerimaia 32:20

Vbe ẹghẹ ne ọ kpee fua, u keghi winna iwinnaan ama kevbe ọyunnuan vbe Igipt, do sẹ ẹdẹ ne ẹre na, te u ye winna ẹn vbe ehe ne avbe ivbi Izrẹl, kevbe avbe ẹvbo ọvbehe hia ye, sẹrriọ wẹ te a ghi rẹn ruẹn nian vbe ehe hia.

Daniẹl 1:21

E Daniẹl keghi wa gha rre uwu ẹguae ọba ọ te do sẹ ẹghẹ ne Sairọs ne ọba e Pẹsia na khọn e Babilọn.

Daniẹl 10:1

Vbe ukpo ne ogieha ne Sairọs kegha re ọba Pẹsia, a keghi ya emwi eso gie uhunmwu wẹ ne a rhie ẹre ma e Daniẹl ne a vbe tie ẹre Bẹtẹsiaza. Uhunmwu ne a gie na, ẹmwata wa nọ, sokpan, ọ keghi lọghọ ẹsẹse ne a rẹn otọ ẹre, umian ọ re a na rhan otọ ẹre ma rẹn.

Daniẹl 3:29

“Banbanna nian, I tae wẹ adeghẹ a miẹn ovbi uhunmwu ẹvbo ọkpa ra emwa, ra ẹvbo ne a zẹ ne ọ ya ukpẹ sakan Osanobua e Siedrak, Mesiak, kevbe Abẹdnigo, te a ra yanghan ẹre obọ vbe owẹ hin egbe ẹre rre, a ghi ya owa ẹre khian otiku. Osanobua ọvbehe i rrọ ne ọ sẹtin miẹn ọmwa fan vbenian.”

Daniẹl 5:28

A ghaa ẹre, a ghaa otọe arriọba ruẹ, a na viọ ne avbe Medis kevbe Pẹsia.”