Daniẹl 6:10 - Edo Bible (E Baibol Ẹdo) Version 1996

¹⁰ E Daniẹl ghi họn ighe a rhie obọ ye ebe nii nẹ, ọ kegha rrie owa. Vbe owa egedege ne ọ ye, avbe ewindo eso ni viọ aro da e Jerusalẹm keghi rrọọ. Zẹ vbene ọ ka ru ẹe de yi, evba nii ọ re ọ na gha diguẹ vbe ewindo ne a kiere nii, ọ na gha na erhunmwu ghe Osanobua igbaeha vbe ẹdẹ.

Daniẹl 6:10 ပူးပေါင်းရင်းမြစ်များ

I Ọba 8:30

Rhie ehọ ye erhunmwu mwẹ kevbe erhunmwu emwa ruẹn vbe iran a do na erhunmwu vbe emwa na. U ghi họn urhu mwa vbe owa ruẹ vbe ẹrinmwi ne u yabọ mwa.

I Ọba 8:38

u ghi danmwehọ erhunmwu iran. A deghẹ ọmwaikọmwa vbe uwu ivbi Izrẹl ne emwa ruẹn ighẹ emwi na ba so ẹe vbe ekhọe, iran na niẹn obọ da Ọgua Osa na na erhunmwu,

I Ọba 8:44

“U gha wẹ ne emwa ruẹn ya mu okuo gie eghian iran, iran na mu aro da ẹvbo ne uwẹ zẹe na, na erhunmwu ghe ruẹ, kevbe Ọgua Osa na ne I bọe nuẹn,

I Ọba 8:54

E Solomọn ghi na erhunmwu ghe e Nọyaẹnmwa fo nẹ, ọ keghi mudia vbe odaro Ogiukpo, ehe ne ọ na diguẹ viọ obọ da odukhunmwu usin.

II Krọnikol 6:13

(E Solomọn vbe ya oze ru eteburu ne a mudia yan ọ keghi mu ẹẹn ye adesẹ ẹghodo, ukpọlọmwẹ ọnrẹn kegha re omwa ibata erẹnrẹn vbe igie enenẹ vbe ne ọ na vbe re omwa ibata isẹn vbe uyomwẹ, ọ keghi hin eteburu nii, ọ na diguẹ yọ vbe ehe ne emwa hia gha na gha bẹghe ẹre, ọ keghi viọ obọ da odukhunmwu ne ọ na erhunmwu.)

II Krọnikol 6:38

A dẹghe iran gele roiro fi uyinmwẹ werriẹ vbe ẹkoata ne ọ sẹ otọ ẹko, iran na mu aro da otọ na ne uwẹ mu ne avbe erha mwa odede, ẹvbo na ne uwẹ zẹe kevbe Ọgua Osa na ne I bọ ne uẹn, gha na erhunmwu ghe ruẹ.

Ẹzra 9:5

Ọ ghi sẹ ẹghẹ ne a ya zọ ese ota, I keghi guakpao vbe ehe ne I tota yi gha khiẹkhiẹ egbe, ẹwu ne I sọlọ ua ni keghi ye rrọ mwẹ urhu, I na diguẹ ne I na erhunmwu, I na viọ obọ da odukhunmwu ghe Nọyaẹnmwa Osanobua mwẹ.

Nehimaia 6:11

Mẹ keghi wanniẹn wẹẹ, “Mẹ i re okpia ne ọ lẹ fua ya gha lẹre. Wẹ yayi wẹ mẹ gha ya lẹre ye uwu Ọgua Osa ne I ghẹ miẹn ehe na wu? I i ruẹe.”

Psalm 34:1

I gha kpọnmwẹ Nọyaẹnmwa vbe ẹghẹ hia. Mẹ i ra dobọ urhomwẹ ọnrẹn yi ẹdẹ.

Psalm 5:7

Sokpan, rhunmwuda ahoẹmwọmwa ruẹn nọkhua, mẹ gha sẹtin gha die uwu owa ruẹ. I gha sẹtin ga, vbe uwu ọgua Osa ruẹ ne ọ huanrẹn, mẹ ghi vbe ya ọghọ ghughẹrre nuẹn.

Psalm 55:17

Owiẹ, avan kevbe asọn ọ re ovian kevbe utumwẹ obalọ mwẹ ya bu ẹre yo, ọ gha họn urhu mwẹ.

Psalm 86:3

Wẹ ọrọre Osanobua mwẹ, rhunmwuda ọnii, tohan mwẹ, ẹdẹ biiri ọ re I ya na erhunmwu ghe ruẹ.

Psalm 95:6

Wa larre, wa gie ima ghughẹ rre, ne a ya uhunmwu rhanmwẹ otọ ne ẹẹn, wa gie ima diguẹ ne Nọyaẹnmwa ne ayi Nọyimwa.

Daniẹl 6:13

Iran keghi wanniẹn tama ọba wẹẹ. “E Daniẹl ne ọkpa vbe avbe ivbi e Juda ni rre iwe, i zẹdẹ da ne uwẹ, Umogun ra ne ọ vbe gha ya iyi ne uwẹ yi ru emwi. Ẹ i gbe erhunmwu ne a na igba eha vbe ẹdẹ re.”

Daniẹl 9:4

I na erhunmwu ghe e Nọyaẹnmwa Osanobua mwẹ, I keghi miẹn orukhọ emwa mwẹ kue I keghi kha wẹẹ, “E Nọyaẹnmwa Osanobua mwẹ, wẹ kpọlọ ẹsẹse, ma vbe ya ọghọ nuẹn. Te uwẹ rhie obọ lele ile ne u tae, u keghi mwẹ aho ẹmwẹ ọmwa ne ẹ i fafaa ghe iran ni ho ẹmwẹ ruẹn, iran na vbe gha ya uhi ruẹ ru emwi.

Jona 2:4

I te gha ro wẹ a kanmwẹ fua hin odaro ruẹ rre nẹ, kevbe wẹ, mẹ I ghi dọlegbe ye aro kan ọgua Osa ruẹ nọhuanrẹn ọvbehe.

Iyẹn ne ọ Maan Ọghe Mak 3:3

Jesu keghi khama ọmwa ne obọ ẹre luẹluẹ nii wẹẹ, “Gberra ghe odaro,”

Iyẹn ne ọ Maan Ọghe Luk 14:26

“Ọmwa ne ọ bu mwẹ rre, ẹ i sẹtin ru ọrhuanegbe mwẹ, deghẹ i re te ọ khuiwu erha ẹe, iye ẹe, amwẹ ọnrẹn, ivbi ẹre, etiọnrẹn ne ikpia kevbe etiọnrẹn ne ikhuo.

Iyẹn ne ọ Maan Ọghe Luk 22:41

Ọ keghi sẹ iran rae, ọ na la omwa umọdia kherhe sikẹ odaro, ọ keghi diguẹ ọ na na erhunmwu.

Iwinna 10:9

Vbe ikpẹdẹ ne ọ lele ẹe vbe iran ghi khian sẹ Jopa, Pita keghi hin odukhunmwu ihie owa ne ọ ya na erhunmwu vbe ẹghẹ ogiavan.

Iwinna 2:15

Ẹ i re ayọn ọre ọ gbe iran na, zẹ vbene uwa te ro, ẹgogo ihinrin vbe owiẹ ọre a ye na.

Iwinna 20:24

Sokpan mẹ wa ka uhunmwu mwẹ ye ne ẹ i mwẹ esa, ne I miẹn ehe na khain okhian ne ọ wa mẹ sẹ otọ, ne I vbe winnaẹn fo ighẹ iwinna ne Nọyaẹnmwa Jesu wa mẹ ne I ru, ọnii nọ wẹ ne I ya wewe Iyẹn Ne ọ maa ọghe Ẹsọhẹ Osanobua.

Iwinna 20:36

Pọl ghi guan fo nẹ, ọ keghi deba iran diguẹ, ọ na na erhunmwu.

Iwinna 21:5

Sokpan ẹghẹ ne ima gu iran gbe ghi gba nẹ, ma keghi kpao, a na la odẹ. Iran hia, emọ kevbe amwẹ keghi su ima ya sẹ ehe ne ẹvbo ni sẹe. Ma hia keghi diguẹ vbe ọkpẹn ẹzẹ, ma na na erhunmwu.

Iwinna 3:1

Ẹdẹ Ọkpa, Pita kevbe Jọn keghi gba gha rrie Ọgua Osa vbe ihe ẹgogo eha vbe avan, ne iran ya na erhunmwu.

Iwinna 4:29

Wanwan na nian Nọyaẹnmwa, ghe vbene iran yan hẹẹ, rhie ẹtin ne ima ne eguọmwadia ruẹ, ne ima sẹtin gha kpe orhu ẹmwẹ ruẹn vbe ne a i na fian afianma.

Iwinna 5:20

“Wa gha rrie uwu Ọgua Osa ne uwa ya gu emwa hia guan vbe kpa arrọọ ọghe ọgbọn na.”

Iwinna 5:29

Pita kevbe avbe ukọ nekpa wanniẹn wẹẹ, “Ne Osa khare ọre ima ra ya ru emwi ighẹ ẹ i re ne emwi ne agbọn khare.

Iwinna 7:60

Rẹn keghi de fie iguẹ, ọ na datu wẹ, “Nọyaẹnmwa ghẹ ka orukhọ na ye iran owẹ.” Ọ ghi tae nẹ, ọ keghi wu.

Iwinna 9:40

Pita keghi viọ iran hia ladian vbe ughugha nii, ọ keghi diguẹ, ọ na na erhunmwu, ọ mu aro da ikun ẹnrẹn nii, ọ wẹẹ, “Tabita, kpaegbe!” Rẹn keghi rhan aro ua, ọ ghi bẹghe Pita, ọ keghi kpaegbe tota.

Ẹfisọs 3:14

Rhunmwuda ọnii, ọna ọre ọ si ẹe ne I na defi igue vbe odaro Evbavba.

Filipai 1:14

Ne I na rre eghan na, keghi vbe rhie udinmwẹ ne etẹn ne ikpia ni bun vbe uwu Kristi, sẹrriọ wẹ edẹgbedẹgbe ọre iran ghi ya din yọ vbe ne iran na kpe orhu ẹmwẹ ni vbe ne a i na fian afianma.

Filipai 1:20

Rhunmwuda, emwi ne I mobọ ho kevbe ne I danmwehọ ẹre, ọrọre ne a ghẹ miẹn ighẹ I ma ghi sẹtin winna iwinna mwẹ, sokpan ne a miẹn wẹ vbe ẹghẹ hia, kpataki vbe iwinna na, ne ẹtin gha rre iwu, vbe ne a gha na miẹn wẹ, egbe mwẹ hia ọre I ghi ya rhie uyi gie Kristi, te I rre agbọn ra te I wu.

Filipai 4:6

Ghẹ si osi ye emwi rhọkpa, sokpan gha ya erhunmwu ne a na, nọ emwi ne u ho hia vbe obọ Osanobua, u ghi gha ye ekhọe ọkpọnmwẹ ẹse nọ rẹn vbe ẹghẹ hia.

Kọlose 3:17

Emwi ne uwa a rhirhi ta ra emwi ne uwa a rhirhi gha ru, wa gha ru ẹe vbe eni Nọyaẹnmwa Jesu, vbe ne uwa na la ekpa ẹre rhie uyi ne Osanobua ne Evbavba.

Hibru 13:15

Rhunmwuda ọnii, wa gie ima gha rhie urhomwẹ ne Osanobua vbe ẹghẹ hia, zẹ vbe ese ne a zọ la obọ Jesu, ọnii nọ wẹ, wa gie ima gha ya urhu mwa rhie ekpọnmwẹ ne eni ẹnrẹn.

Hibru 4:16

Rhunmwuda ọnii, wa gie ima din khekherriọ, ne a gha die odaro ẹkete Osanobua, ehe ne ẹsọhẹ ye. Evba nii i ọre ima gha na miẹn itohan rhie kevbe ẹsọhẹ ne ọ gha yi ima obọ vbe ẹghẹ ne a na gualọe zẹẹ.

Arhie Maan 2:10

Ghẹ gie afianma oya ne u ra do re vbe ọ ma he kpẹe na fian. Danmwehọ! Esu ra do danmwẹ uwa ghe vbe ekpa ne ọ gha na viọ eso vbe uwu uwa ku eghan. Ikpẹdẹ igbe ọre ọlọghọmwa uwa ni ra ya vbe otọ. Mu uhunmwu ke ọe ya sẹ uwu, mẹ gha rhie ẹde ẹfe ne uẹn.

Arhie Maan 2:13

I rẹn ehe ne u ye, evba nii nọ ighẹ ehe ne ẹkete Setan ye. Te u wa rhie egbe lele mwẹ, u ma mu iyayi ruẹ fi otọ, uhin ya sẹ ne iran na gbẹe rua vbe ehe ne Setan ye ighẹ Antipas ne ọguọmwadia ẹmwata mwẹ.