Daniẹl 5:20 - Edo Bible (E Baibol Ẹdo) Version 1996

²⁰ Sokpan, ugbẹn vbe ọ ghi do ze vbudu, ọ na gha hioo, ọ na do gha ru emwi dan, a keghi sii ẹe hin ẹkete ẹre rre, uyi ne ọ rre ọre egbe keghi wii.

Daniẹl 5:20 ပူးပေါင်းရင်းမြစ်များ

II Ọba 17:14

Sokpan, iran ma họn ẹmwẹ ne ọ tama iran, iran na vbe gha yin uyinmwẹ dan ne erha iran vbe yin ne iran ma na ya e Nọyaẹnmwa ne Osanobua iran yi.

II Krọnikol 32:25

Sokpan, e Hẹzekaia keghi hio sẹrriọ wẹ ọ ma sẹtin kpọnmwẹ ye ẹse ne Nọyaẹnmwa ru ne ẹẹn, e Juda kevbe Jerusalẹm keghi rrioya ye emwi na ẹsẹse.

II Krọnikol 36:13

E Zedekaia keghi sọtẹ e Nebukiadneza ne ọba ne ọ ka ya ẹe vẹn Osanobua nẹ wẹ rẹn gha ya ẹkoata gha ga ẹe. Ọ keghi wa ya izevbudu he ne ọ roiro fi ekhọe werriẹ, ne ọ bu e Nọyaẹnmwa ne Osanobua Izrẹl gha dee.

Ẹksọdọs 18:11

Banbanna nian, I miẹn wẹ, e Nọyaẹnmwa kpọlọ sẹ avbe ẹbọ hia, rhunmwuda te Osanobua ru vbenian na vbe ọ miẹn oya ne ivbi Izrẹl gha a re vbe obọ ivbi Igipt.”

Ẹksọdọs 9:17

Sevba te u ye hio ku emwa mwẹ, u ma gie iran kpao.

Ẹksọdọs 9:7

Ọba keghi nọ emwi ne ọ sunu, iran keghi tama rẹn wẹẹ emwirri ọkpa kẹkan ma wu vbe ọghe ivbi Izrẹl. Sokpan, rẹn keghi yin ehọ, ọ ma gie emwa nii gha khian.

Itan 16:18

Te uhiomwẹ khian rrie odẹ ọfuan, itengbemu ọ re ọ vbe si udemwẹ.

Itan 16:5

Te ẹmwẹ ọmwaikọmwa ne ọ tọn egbe mu sọnnọ e Nọyaẹnmwa; ẹ i vbe gie irrioya la iran ban ẹdẹdẹmwẹdẹ.

Aizaia 47:1

E Nọyaẹnmwa khare wẹẹ, “E Babilọn, tuorre vbe ẹkete ruẹ ne u do tota ye ebubẹ vbe otọ. Vbe ẹghẹ ọkpa, te u te yevbe ovbialeke, ẹvbo ne a ma khọn miẹn ẹre otọ sokpan, u i ghi re ne vbukhẹ kevbe ne sọguọsọguọ ọvbehe, ọviẹn ọ re u ghi khin na.

Jerimaia 13:18

E Nọyaẹnmwa keghi tama mwẹ wẹẹ, “Tama ọba ke ẹe kevbe iye ẹe wẹ ne iran tuorre vbe ẹkete gha die otọ rhunmwuda, ẹde iran ne mose mose dele hin iran uhunmwu rre nẹ.

Jerimaia 19:15

Wẹ e Nọyaẹnmwa ne Oghodua, ne ọ re Osanobua Izrẹl khare wẹẹ, “Oya hia ne I khare ighe I gha rri iran re, I ra mu ẹẹn sẹ vbe egbe ẹvbo na kevbe avbe ẹvbo ni sikẹ ọre, rhunmwuda, wa zevbudu gbe, wa i vbe danmwehọ ẹmwẹ ne I ta.”

Jerimaia 48:18

Wa ni rre Dibọn, wa ke ukpo uyi uwa tuorre, ne uwa tota ye ebubẹ vbe otọ. Ọmwa ne ọ fuẹn Moab ua rre emwa na, ọ keghi ye avbe owa ọkhẹ ẹre khian itowa.

Ezikiẹl 30:6

E Nọyaẹnmwa khare wẹẹ, “A gha gbele iran ni gbinna ne Igipt vbe okuo ke Mẹgido vbe odẹ okuọ kpao ya sẹ Asuan vbe odẹ ekẹn. A gha fuẹn ọnrẹn uan ighe ivbiyokuo Igipt ni ghagha. Mẹ ne Nọyaẹnmwa ne Udazi ọ re ọ ta ẹe.

Ezikiẹl 31:10

“Rhunmwuda ọnii nian, Mẹ ne Nọyaẹnmwa ne Udazi gha tama uwa emwi ne ọ ra rruan erhan nii ne ọ gha tan khian ọ te ya sẹ ikpakpa iso. Vbene ọ ya tan khian nii, ọ re ọ vbe ya gha hio.

Daniẹl 11:36

Ọba e Siria ghi gha da gbe da mu, ọ ghi gha rhuọ we rẹn kpọlọ sẹẹ avbe ẹbọ, kevbe wẹ rẹn sẹ Osanobua ne ọ kpọlọ Sẹehia. Ọ gha sẹtin gha ru avbe emwi na ọ te do sẹ ẹghẹ ne Osanobua gha ya rria ẹre ikhi. Osanobua gha ru zẹ vbene ọ mwamwaẹn zẹẹ.

Daniẹl 4:26

“Odibosa nii wẹ ne a sẹ ut ukhunmwu ẹnrẹn rae yotọ, ọnii rhie ma wẹ u gha ye do gha rre ọba vbe u gha ghi miẹnkue nẹ wẹ Osanobua ọ re ọ kha yan agbọn na hia.

Daniẹl 4:28

Avbe emwi na hia keghi gele sunu vbe egbe Nebukiadneza ne ọba.

Daniẹl 4:37

“Banbanna nian, mẹ ne Nebukiadneza rho ẹre, I ya ọghọ ne ẹẹn, I keghi vbe rhie uyi ne ẹẹn ighe Ọba Ẹrinmwi. Emwi hia ne ọ gbae kevbe ne ọ hẹnhẹn, ọghọe ọ re nọ. Ọ vbe sẹtin vbokho ọmwaikọmwa ne ọ tengbemu uhunmwu rriotọ.”

Daniẹl 8:8

Ẹwe nii keghi vbe do kakabọ gha hio yọ, sokpan ọ ghi wa sẹ ẹghẹ ne ẹtin ẹnrẹn na kpọlọ sẹẹ, a keghi kpan ẹre igho fua. I gho enẹ ọvbehe keghi zọ ladian ye ihe ẹre, ọkpọkpa keghi nien ukpẹ da ehe ọvbehe.

Iyẹn ne ọ Maan Ọghe Luk 18:14

Jesu keghi khama iran wẹẹ, “Ne I tama uwa, okpia na ọre ọ miẹn orhue rhie gha rrie vbe obọ Osanobua ighẹ ẹ i re nọkpa. Rhunmwuda, ọmwaikọmwa ne ọ tọn egbe ẹre mu, a gha mu ẹn rriotọ, ọmwa ne ọ mu egbe ẹre rriotọ, a gha tọn ẹn mu.”

Hibru 3:13

Sokpan na ghẹ miẹn wẹ orukhọ rẹrẹ eso vbe uwu uwa do ya ẹe gha ze vbe udu, wa ghi gha ru iyobọ ne egbe ẹdẹgbegbe, ugbẹn vbe a miẹn wẹ “Ẹdẹnẹrẹ” ne ebe khare ye dekan ima.

I Samuẹl 6:6

Vbọzẹ ne uwa gha na ze vbe ẹkoko udu zẹ vbe ne ọba Igipt, kevbe emwa Igipt ye? Yerre vbene Osanobua zuọzuọ iran hẹ, iran te do gie ivbi Izrẹl kpa vbe Igipt rre.