Daniẹl 4:27 - Edo Bible (E Baibol Ẹdo) Version 1996

²⁷ Rhunmwuda ọnii nian, Umogun, u ghi rhie ude ne I bu ruẹ re. Da obọ orukhọ ne a ru yi, gha ru emwi ne ọ kere, vbe gha tohan avbe ivbiogue. Ẹghẹ nii, agbọn ghi gha ma ruẹn khian.”

Daniẹl 4:27 ပူးပေါင်းရင်းမြစ်များ

Gẹnẹsis 11:4

Ẹghẹ nii, iran ghi na kha wẹẹ, “Wa gie ima do bọ owa ima, ne ogogoro ne Ọ rrọ wa yo sẹ iso, ma ghi ru ọkhae ne egbe mwa, ne a ghe ya tagha ima lele otọ agbọn hia.”

I Ọba 21:29

“U miẹn vbene Ehab mu egbe rriotọ hẹ vbe odaro mwẹ? Rhunmwuda ne ọ na ru vberriọ, I i ghi zẹ ọkhọ na rruan rẹn vbe ọ he rre agbọn, ẹghẹ ovbi ẹre I gha na zẹ ọkhọ ne ọ rruan ẹgbẹe Ehab.”

Psalm 119:46

Mẹ gha na iyẹn iyi ruẹ ma avbe ọba ekhue i ra vbe mu mwẹ.

Itan 11:2

Emwa ni tọn egbe mu gha fa egbe ua wan, aro emwi uhẹn uhẹn ọ re ẹwaẹn ye sẹ.

Itan 16:6

Gha re ne ọ gie a mu ẹtin yan kevbe ne ọ guobọmwa, e Nọyaẹnmwa gha ya orukhọ ruẹ bọọ. Gha ya ọghọ ne Nọyaẹnmwa, emwi dan rhọkpa i ra vbe sunu vbe egbe ruẹ.

Itan 28:13

U gha gbe gue orukhọ ruẹ, agbọn i maa ruẹn ẹdẹ, miẹn iran kue ne u vbe zobọ vbọ, Osanobua gha tohan ruẹn.

Aizaia 10:13

Ọgbaisi Asiria gha rhuọ, ọ wẹẹ, “Ekuabọ mwẹ ọ re I ya ru ehia, I wegbe, I waan, I vbe rẹn emwi. Mẹ ọ re ọ khiẹn uwu ne ọ rre ẹkpo uhunmwu ẹvbo hin rre, I ghi ya viọ evbare ne iran te ya gbakhua hinrre. I keghi ya igiawẹ gbele emwa ni rre evba vbene ekhuia ẹmila ru.

Aizaia 47:10

“Te u wa gha ya obọ so udu ye iba ne u zẹ u na gha ro wẹ ọmwa ne ọ bẹghe ruẹ i rrọọ. Ẹwaẹn kevbe irẹnmwi ruẹn keghi ya a bibi odẹ u keghi tama egbe ruẹ wẹẹ, ‘Mẹ ọrọre Osanobua ọmwa ne ọ yevbe mwẹ i rrọọ.’

Aizaia 47:8

“Danmwehọ ẹmwẹ na, wẹ ne ọyẹnmwẹ yẹẹ, wẹ ne ọ ro ighẹ ẹbe fo, ẹkun vbe sẹ uẹ otọ. U khare wẹ u kpọlọ vba Osanobua nẹ kevbe wẹ ọmwa ne ọ ye vbe ruẹ ighi rrọọ, u te ro ighẹ u i ra dẹgbẹ ẹdẹ ra ne ọmọ wu ẹ.

Jerimaia 29:7

Wa gha ru emwi ne ọ maa ye dọmwadẹ ẹvbo ne I kue ne a viọ uwa oghunmwu gha rrie. Wa gha na erhunmwu ghe mwẹ ne iran rhunmwuda, agbọn gha maa iran, ọ gha vbe maa uwa.

Jerimaia 38:20

Mẹ keghi kha wẹẹ, “A i ra rhie ruẹ ne iran. I rinmwian ne u danmwehọ uhunmwu ne Nọyaẹnmwa gie rre, emwi hia ghi wa gha ma ne uẹn, ai ra vbe gbe uẹ ua.

Ezikiẹl 18:7

Ẹ i rha ọmwa ẹ i do ọmwa oyi. Ọ vbe rhie emwi ne ọmwa ne ọ mọmọ ẹre emwi rhie ne ẹẹn da yi, werriegbe ne ẹẹn, ọ koko ne ohanmwẹ gbe, ọ vbe rhie ukpọn ne ne ọ rre irhunmwuirhun.

Ezikiẹl 29:3

Tama rẹn wẹ ẹmwẹ ne Nọyaẹnmwa ne Udazi tama ọba Igipt ọ re ọna khin wẹẹ: Oghian rẹn ọ re I khin, wẹ ne Ugbogiorinmwi agbaka ne ọ rre uwu ẹzẹ. U khare wẹ ọwuẹ ọ re Naẹl khin ighe wẹ ọ re ọ yii ẹe.

Ezikiẹl 29:9

Igipt gha khian, otọe ne ọ la ọrhiae rrie. Ẹghẹ nii, wa gha rẹn ighe mẹ ọrọre Nọyaẹnmwa. “Rhunmwuda ne u na kha ighe ọwuẹ ọ re e Naẹl khin ighe wẹ ọre ọ yii ẹe.

Joẹl 2:14

Ughaghe, e Nọyaẹnmwa ne Osanobua rua gha fi ekhọe werriẹ, ọ ghi ye emwiokọ nibun ru uwa ẹse. Ẹghẹ nii, wa ghi vbe ha oko ọka kevbe ayọn gie ẹe.

Emọs 6:13

Wa gha ghagha i ghẹ wa sẹtin khọn ẹvbo Lodeba. Wa gha rhuọ wẹẹ, “Te ima mwẹ ẹtin sẹ ọe ne ima na khọn e Kanaem.”

Jona 3:9

Ọ gha kẹe, Osanobua gha fi ekhọe werriẹ, ọ gha ke ẹe ohu gha fo vbe ẹko ẹre, ma i ghi ra wulo!”

Habakọk 1:11

Iyeke ọnii, iran ghi bi gha khian vbe ẹhoho, iran rrie; ighe avbe emwa na ne ẹtin iran re ẹbọ ne iran gho.”

Zẹfanaia 2:15

Emwi ne ọ ra rruan rẹn ọre ọnii khin ighe ẹvbo ni ne ọ ya ẹtin ẹnrẹn rhuọ vberriọ ne ọ na vbe ro wẹ ẹbe fo. Emwa rẹn ro wẹ ẹvbo iran ọ re ọ ghi kpọlọ sẹẹ vbe agbọn na hia. U miẹn egbe ehe ne ọ dihoi rua ne ọ ra khian, ehe ne avbe aranmwẹ oha gha na gha kẹtin. Ọmwa ne ọ rhirhi a la evba gberra gha ya iyeke werriegbe rhunmwuda vbene ọ ya mu ọmwa ohan.

Matiu 3:8

Wa gie uyinmwẹ uwa rhie ma ighe wa gele zobọ vbe orukhọ ne a ru.

Iyẹn ne ọ Maan Ọghe Luk 11:41

Wa viọ emwi ni rre uwu ọkpan kevbe ukpu ne uwa mwẹ ne ivbiogue, erriọ ọ gha na huan ne uwa.

Iwinna 24:25

Sokpan Pọl ghi suẹn gha ta ẹmwẹ uyinmwẹ esi, a mu egbe ye ọghọ kevbe Ẹdẹ Ibuohiẹn, ohan kegha mu e Fẹlis, ọ na kha wẹẹ, “U sẹtin gha khian nẹ, I gha dọlegbe tie ruẹ vbe i a miẹn obọ.”

Iwinna 26:20

I keghi suẹn gha kpe orhu, okaro vbe Damaskọs, vbe iyeke ọnii vbe Jerusalẹm kevbe la otọ Judia hia kevbe ma iran ne ẹ i re Ju wẹ ne iran fi uyinmwẹ werriẹ vbe ọghe orukhọ ne iran ru, ne iran bu Osanobua gha dee ne iran vbe gha ru emwi ne ọ gha rhie ma ighẹ iran gele fiwerriẹ.

Iwinna 8:22

Rhunmwuda ọnii, ro iro fi uyinmwẹ werriẹ vbe emwi dan ne u mwamwaẹn na, ne u vbe na erhunmwu ghe Nọyaẹnmwa, ne ọ miẹn ehe na ya ẹe bọ ọ ighẹ ne u na gha zẹ egbe iro vbe nian vbe ekhọe ruẹ.

II Kọrinti 5:11

Ma rẹn emwi ne a yae kha wẹ, ne a gha mu ohan Nọyaẹnmwa, ma keghi rhunmwuda ọnii ho ne a gha bọ emwa yọ. Osanobua rẹn ima fo fẹẹrẹ, mẹ vbe yayi wẹ, vbe uwu ekhọe uwa, wa vbe rẹn mwẹ.

Galatia 5:13

Zẹ vbe ọghe uwa, etẹn mwẹ, te a tie uwa la hin uwu ọviẹn rre, sokpan wa ghẹ gie ẹmwẹ egbe mwẹ I gue na, gha re ne uwa gha mu zẹ asa ne emwi ne egbe uwa guẹe, gha na maghan uwa. Sokpan wa gie aho ẹmwẹ ọmwa gha ya uwa ga egbe.

Galatia 5:22

Sokpan Orhiọn Ne Ọ Huanrẹn ọre ọ biẹ avbe aho ẹmwẹ ọmwa, oghogho, ọfumwegbe, iziengbe, itohan, ekhọe esi, amuẹntinyan,

Galatia 5:6

Rhunmwuda, ma gha kugbe ba Kristi Jesu nẹ, a rhuẹ, ra ma rhuẹ, i ghi mwẹ esa ne ọ ye, emwi ne a kha ọrọre iyayi ne ọ winna vbe ekpa aho ẹmwẹ ọmwa.

Ẹfisọs 4:28

Ọmwa ne ọ te ka rha yi, wẹ ne ọ dobọ oyi ne a rha yi, ne ọ suẹn gha winna, ne ọ miẹn ehe na gha khuan okhuan ne ai gbe ikhan yi ọghe obọ ẹre, kevbe ne ọ sẹtin vbe gha ye ne ẹ i mwẹ obọ.

Diuteronomi 24:13

U ghi rhie ẹre werriegbe gie ẹe vbe owẹn a defua nẹ, ne ọ miẹn ya hin egbe vbiẹ. Ẹghẹ nii rẹn gha kakabọ kpọnmwẹ ọn, ẹko e Nọyaẹnmwa Osanobua ruẹ gha vbe rhiẹnrhiẹn ghe ruẹ.

Diuteronomi 32:27

Sokpan, mẹ i ra rhie otọ ne eghian iran ya gha rhuọ, wẹ iran khọn emwa mwẹ miotọ, vbe imẹ tobọ mwẹ dunmwu iran an nẹ.’

Diuteronomi 8:17

Rhunmwuda ọnii, wa ghẹ ro ighẹ ẹtin kevbe iwegbe obọ uwa ọ re uwa ya họn ẹfe ne egbe rua.

I Pita 4:8

Ke odaro emwi hia, wa gha ya ẹko ata ho ẹmwẹ egbe, rhunmwuda, aho ẹmwẹ ọmwa gbe ebe gue orukhọ ni bun.