Daniẹl 2:47 - Edo Bible (E Baibol Ẹdo) Version 1996

⁴⁷ Ọba keghi kha wẹẹ, “Osanobua ruẹ ọrọre ne ọ kpọlọ sẹ ẹbọ hia, e Nọyaẹnmwa avbe eniyaẹnmwa kevbe ne ọ we oro ua ma emwa.”

Daniẹl 2:47 ပူးပေါင်းရင်းမြစ်များ

Gẹnẹsis 41:39

Ẹre ọba na khama Josẹf wẹẹ, “Vbene Osanobua ghi na rhie emwi na ma ruẹn nẹ, ọmwa ọvbehe ne ẹdẹgbe vbe ẹko ra ne ọ wan sẹẹ ruẹ, ẹ i ghi rrọọ.

II Ọba 5:15

Ọ keghi dọlegbe bu Elaisia gha khian ke irẹn kevbe emwa rẹn hia, ọ wẹẹ, “Banbanna nian, mẹ miẹn wẹ Osanobua i rrọ hiehie gberra Osanobua Izrẹl, rhunmwuda ọnii, u ghi miẹn mwẹ emwi ihaoko na.”

Job 12:19

Ọ ghi gbe avbe ohẹn kevbe emwa ẹtin uhunmwu ke otọ.

Psalm 136:2

Wa rhie ekpọnmwẹ ne nọkpọlọ sẹ avbe ẹbọ hia, etẹbitẹ ọ re ahoẹmwọmwa rẹn khin.

Psalm 136:3

Wa rhie ekpọnmwẹ ne ne ọ mwẹ ẹtin sẹẹ vbe uwu avbe eniyaẹnmwa, etẹbitẹ ọ re ahoẹmwọmwa rẹn khin.

Psalm 72:11

Avbe ọba hia gha vbẹrre vbe odaro ẹre; avbe agbọn ẹvbo hia gha ga ẹe.

Psalm 82:1

Osanobua miẹn agba dia vbe iko ẹrinmwi, vbe iko ne avbe ẹrinmwi do, rẹn ọ re ọ kha vbene irẹn tae yi hẹ:

Psalm 96:4

Ọmwa ne ọ kpọlọ ọ re Nọyaẹnmwa khin, ọ vbe ke ne a kakabọ rho ẹre; te a gha rhie ọghọ ne ẹẹn sẹẹ avbe ẹbọ hia.

Ezikiẹl 26:7

E Nọyaẹnmwa ne Udazi khare wẹẹ, “I ra mu ọba ne ọ ghi wegbe sẹ ehia, ighẹ e Nebukiadneza ne ọba e Babilọn rre ne ọ do khọn e Taia. Ọ gha ke odẹ okuọ rre ke irẹn kevbe ivbiyokuo nibun kevbe avbe ẹsin deba avbe iran ni hin ẹsin.

Daniẹl 11:36

Ọba e Siria ghi gha da gbe da mu, ọ ghi gha rhuọ we rẹn kpọlọ sẹẹ avbe ẹbọ, kevbe wẹ rẹn sẹ Osanobua ne ọ kpọlọ Sẹehia. Ọ gha sẹtin gha ru avbe emwi na ọ te do sẹ ẹghẹ ne Osanobua gha ya rria ẹre ikhi. Osanobua gha ru zẹ vbene ọ mwamwaẹn zẹẹ.

Daniẹl 2:19

Vbe Asọn nii zẹẹ, a keghi ta imina nii ma e Daniẹl vbe aro umian, rẹn keghi rho Osanobua ẹrinmwi:

Daniẹl 2:22

Ọ rhie emwi ni dinmwi kevbe ni re ọghe oro ma emwa ọ rẹn emwi ne a rhie lẹre ye uwu ebiebi, uwanmwẹ ọre ọ lẹga rẹn tobọ irẹn.

Daniẹl 2:28

Sokpan, Osanobua ọkpa ne ọ rhie emwi oro ma emwa rre ẹrinmwi. Rẹn tama ruẹn nẹ emwi ne ọ ra do sunu ẹdẹnakhuẹ. Umogun. Banbanna nian, I ra ta imina nii nu u miẹn vbe u vbiẹ ma ruẹn.

Daniẹl 2:29

“Ugbẹn vbe u ghi vbiẹ, Umogun, u keghi mina vbekpa ẹdẹnakhuẹ, Osanobua ne ọ rhie emwi oro ma emwa, keghi rhie ma ruẹn emwi ne ọ ra do sunu.

Daniẹl 2:30

“Wanwanna nian, a rhie emwi oro na ma mwẹ, ẹ i re wẹ rhunmwuda ighe I wan sẹ emwa nekpa, sokpan rhunmwuda ne u miẹn ehe na rẹn emwi ne a ya imina ruẹn kha, Umogun, kevbe ne u rẹn emwi ne a ya iro ne a mu guẹ kha.

Daniẹl 2:37

U gha tọ u kpẹre, Umogun, wẹ ọrọre ne ọ ghi kpọlọsẹ vbe uwu avbe ọha hia. Osanobua ne ọ rre ẹrinmwi ọ re ọ ma uwẹ ọgbaisi, ọ keghi rhie ẹtin kevbe iwegbe kevbe uyi nuẹn.

Daniẹl 3:15

Banbanna nian, wa gha ghi wa họn urhu avbe okpe, ẹgogo, ighẹnghan, akpata, kevbe avbe emwi ne a kpee ọvbehe, wa ghughẹrre ne u wa ya uhunmwu rhanmwẹ otọ ne amazẹ nii. Adeghẹ wa ma ru vberriọ, a gha wa viọ uwa ku uwu erhẹn ọwarọkpa nii, wa yayi we ẹbọ ọkpa rrọ ne ọ gha sẹtin miẹn uwa fan ra?”

Daniẹl 3:28

Ọba keghi kha wẹẹ, “Wa rho Osanobua e Siedrak, Mesiak kevbe Abẹdnigo! Ọ gie odibo ẹre gha dee ne ọ do miẹn iran ni gae kevbe ni muẹtinyan rẹn na fan. Iran fieghe uhunmwu ye iyi ne imẹ yi, iran keghi mu egbe ne iran gha ya wu, sẹẹ ne iran ghughẹrre ya uhunmwu rhanmwẹ otọ ne ẹbọ ọvbehe gberra Osanobua iran.

Daniẹl 3:29

“Banbanna nian, I tae wẹ adeghẹ a miẹn ovbi uhunmwu ẹvbo ọkpa ra emwa, ra ẹvbo ne a zẹ ne ọ ya ukpẹ sakan Osanobua e Siedrak, Mesiak, kevbe Abẹdnigo, te a ra yanghan ẹre obọ vbe owẹ hin egbe ẹre rre, a ghi ya owa ẹre khian otiku. Osanobua ọvbehe i rrọ ne ọ sẹtin miẹn ọmwa fan vbenian.”

Daniẹl 4:17

Vbene ọ khare ọnii khin ighe odibosa ne aro ẹre gba emwi hia nii. Rhunmwuda ọnii, wa gie emwa hia rẹn vbe ehe hia wẹ Osanobua ne ọ Sẹehia mwẹ ẹtin vbe uhunmwu avbe arriọba emwa nagbọn, kevbe wẹ ọ sẹtin munọ iran ne ọmwa ne ọ rhirhi khọn rẹn, uhin ya sẹ egbe ọmwa ne ẹ i mwẹ asa ne ọ gu agbọn ye.’ ”

Daniẹl 4:25

A gha khu uwẹ fua hin uwu ẹbu emwa nagbọn rre, u gha ya deba avbe aranmwẹ oha gha rrọọ. U gha rri irunmwu zẹ vbe ẹmila la ukpo ihinrọn, u ghi gha vbiẹ adesẹ ore ehe ne evbu gha na gha tuo yan ruẹn. Ẹghẹ nii, u ghi do miẹnkue wẹ Osanobua ne ọ Sẹehia ọ re ọ khaemwisẹ yan arriọba agbọn na hia kevbe wẹ ọ sẹtin munọ iran ne ọmwa ne ọ rhirhi khọn rẹn.

Daniẹl 4:32

A gha khu uẹ hin ẹbu emwa nagbọn rre, ya gha deba avbe aranmwẹ oha khian, gha rri irunmwu zẹ vbe ẹmila vbe ukpo ihinrọn. Ẹghẹ nii u gha miẹn kue ighe Osanobua ne ọ Sẹehia mwẹ ẹtin vbe uhunmwu avbe arriọba otọ agbọn, kevbe wẹ ọ sẹtin munọ iran ne ọmwaikọmwa ne ọ khọn rẹn.”

Daniẹl 5:11

Arhiọnkpa rre otọe arriọba ruẹ na ne orhiọn avbe ẹrinmwi nihuanrẹn rre uwu ẹre. Ẹghẹ ne erha a na gha rre agbọn, okpia na wa rhie ma ighe rẹn mwẹ ẹwaẹn, irẹnmwi kevbe ẹdẹ ne ọ gbe vbe ẹko, zẹ vbene avbe ẹbọ ye. Erha a ighe Nebukiadneza ne ọba keghi maa ẹre ọkaolotu avbe ọbiro, ebo edunna, avbe azẹn keghi avbe iweuki.

Emọs 3:7

E Nọyaẹnmwa ne Udazi i da ru emwi vbe ne ọ ma na ka ta ẹe ma avbe akhasẹ ne eguọmwadia ẹre nẹ.

I Kọrinti 14:25

Iro ẹkhokho ne ọ zẹ vbe ekhọe ghi khian ne a rhie ladian azagba, ọ ghi vbẹ rre ye uhunmwu rhanmwẹ otọ ne Osanobua, ọ ghi miẹnkue wẹ, “Vbe ẹmwata, Osanobua gu uwa rre emwa na.”

Diuteronomi 10:17

E Nọyaẹnmwa Osanobua uwa kpọlọ sẹ ẹbọ hia kevbe ẹtin hia. Ọmwa ne ọ kpọlọ ne ọ mwẹ ẹtin rẹn khin, ọmwa ne ọ kere ne a gha mu ohan ẹnrẹn ẹsẹse. Ẹ i gbe ghe obọ okpa, ẹ i miẹn igho iyeke.

I Timoti 6:15

Osanobua gha ruẹe ne ọ ye egbe ladian, vbe ẹghẹ ne ọ kei yi, rẹn ne ọ re Nọkhaemwisẹ ọkpa kẹkan, ne a fiangbe. Ọba iran ne ọba kevbe Nọyan iran ne ni yan ẹvbo.

Jọsua 22:22

“Ọmwa ne ọ yan Ẹtin nii ọrọre Osanobua! Rẹn ọrọre e Nọyaẹnmwa! Rẹn rẹn emwi ne ọ ya ima ru emwi na, ọ vbe kei ne uwa vbe rẹn. A deghẹ te ima sọtẹ ighẹ ma ma ghi rhie ekhọe ye ẹmwẹ Nọyaẹnmwa, wa ghẹ sẹ ima rae ye agbọn ọvbehe!

Arhie Maan 1:5

Kevbe ke ehe ne Jesu Kristi ne ọre osẹe ẹmwata ye ghe dee, ọmọdiọn ne a biẹe kevbe ne a vbe huẹn kpao vbe idin, ọmwa ne ọre ne ọ khaemwisẹ yan avbe ọba ni rre otọ agbọn hia. Rẹn ho ẹmwẹ mwa, ọ keghi ya ekpa uwu ne ọ wu fannọ ima kua hin obọ orukhọ mwa rre.

Arhie Maan 17:14

Iran gha gu Oteghe Ohuan nii gbinna, sokpan Oteghe Ohuan nii ke ẹe kevbe emwa rẹn ne a tie re, kevbe ne a hannọ zẹ, iran ni ya ẹko ata lele ẹe khian, gha khọn iran muotọ, rhunmwuda rẹn ọrọre Nọyan eniyaẹnmwa kevbe Ọba iran ne ọba.”

Arhie Maan 19:16

A keghi gbẹnnẹ avbe ẹmwẹ na ye ẹwu ne ọ yọe kevbe owẹ ọre wẹẹ, “Ọba avbe iran ne ọba kevbe Nọyan iran ni yaẹn emwa.”