Daniẹl 12:11 - Edo Bible (E Baibol Ẹdo) Version 1996

¹¹ “Ke ẹghẹ ne a ya dobọ ese ẹdẹgbegbe yi, ọnii nọ wẹ ke ẹghẹ Ọkhọ Nọgborrirri gha dee, ikpẹdẹ ekigbesiyisẹn yan arria ehan (1,290) gha gberra.

Daniẹl 12:11 ပူးပေါင်းရင်းမြစ်များ

Ẹksọdọs 29:38

“Emwi ne u gha ya gha zọ ese vbe aka ẹdẹgbegbe rhinrin ẹdẹ ọre ọna khin: u ghi gbele ivbe ohuan eva ni he rre ukpo ọkpọkpa.

Ezikiẹl 4:6

U ghẹ ghi gbe onii fo nẹ, u ghi fi egbe werriẹ ghe obọ erha ọmwa ne u vbe rrioya ye orukhọ e Juda la ikpẹdẹ iyeva, ikpẹdẹ ọkpọkpa ye ihe ukpo ọkpọkpa vbe ẹghẹ ne iran ra rrioya la vbotọ.

Daniẹl 1:12

Ọ tama rẹn wẹẹ, “Danmwẹ ima ghe la ikpẹdẹ igbe. Gha le ebe uwọnmwẹ ne ima re ne u vbe gha sa amẹ ne ima wọn.

Daniẹl 11:31

Eso vbe ivbiyokuo ẹre gha ru awua vbe uwu Ọgua Osa, iran gha dobọ izọese ẹdẹgbegbe yi, iran ghi mu ‘Emwikhọ Ugborrirri’ gbọọ.

Daniẹl 7:25

Ọ gha ye ukpẹ sakan Osanobua ne ọ Sẹehia, ọ ghi gha khulo emwa Osanobua khian. Ọ gha ho ne ọ fi uhi ugamwẹ kevbe emwiukpo ne iran ru werriẹ. Emwa Osanobua ghi vbe gha rre ototọ ẹtin ẹnrẹn vbe ukpo eha vbe ukhiọnmwẹ.

Daniẹl 8:26

Avbe umian ne ọ dekan ẹmwẹ ese ota vbe owiẹ, ne a vbe rhaan otọ ẹre ma ruẹn nẹ, ọ gha sunu. Sokpan he gie ẹe gha rre ẹko ruẹ ọkpa rhunmwuda ọ gha kpee ẹsẹse ọ ke do sunu.”

Daniẹl 9:27

Ọmwa ne ọ rre asẹ nii gha gu emwa nibun ke ọta ne ọ deziẹn la ukpo ihinrọn, a ghẹ ghi wa ẹghẹ ne a kha na ye ihe eva nẹ, ọ gha wẹ ne a dobọ ese ne a zọ kevbe izọhẹ yi. A gha ya mu Emwikhọ Ugborrirri. Ye ehe ne ọ mwẹ uyi sẹẹ vbe Ọgua Osa, ọ ghi vbe gha rre evba ọ te do sẹ ẹghẹ ne ọ gha ya rri ọghọe fo zẹ vbene Osanobua mwamwa khẹ ọre.”

Hozia 3:4

Erriọ wa nọ zẹe, ivbi Izrẹl gha vbe gha rrọọ vbe ẹghẹ ne ọ taẹn vbene iran i ra na gha mwẹ ọba ra ọkaolotu vbene ese ne a zọ i ra na vbe gha rrọọ, ra orre okuta itaemwi, vbene amazẹ ra ukhurhẹ ne a ya fi iha i na rrọọ.

Matiu 24:15

“Wa ghẹ ghi miẹn ighe Omurhia Ne ọ gbe orrirri ne Daniẹl ne akhasẹ ta ẹmwẹ ọnrẹn miẹn dia ye ehe ne ọ huanrẹn.” (Wẹ ne ọ tie ebe na, hia ne u rẹn evba yae kha.)

Iyẹn ne ọ Maan Ọghe Mak 13:14

“Wa ghi do miẹn ‘Omurhia Ne Ugborrirri’ vbe ọ gha miẹndia ye ehe ne ọ ma khẹ ke.” (Wẹ ne ọ tiebe na, hia ne u rẹn odun ẹmwẹ na.) “Ẹghẹ nii wa ni rre Judia, wa lẹ gha rrie uhunmwu oke.

Arhie Maan 11:2

Sokpan ghẹ ka iran ni rre iba ore yọ. Ghẹ mwa iran, rhunmwuda, a zẹ iran obọ ne iran ni ma yayi nẹ, iran ni gha do gbe ọgọlọbọ vbe uwu Ẹvbo Ne Ọ Huanrẹn la uki eva yan iyeva.

Arhie Maan 12:6

Okhuo nii keghi lẹ la uwu ato, Osanobua rhie ihe ọkpa ye otọ khẹ ọre nẹ vbe odọ ehe ne a gha na gbe aro ghe ẹre la ikpẹdẹ iyeha yan uri yan arriaisẹn (1,260.)

Arhie Maan 13:5

A keghi fan obọ ẹre ne aranmwẹ oha nii, ne ọ gha ya unu talọ ẹmwẹ dan hia, a keghi vbe rhie ẹghẹ nẹẹn ne ọ gha mwẹ asẹ la, uki eva yan iyeva.