Daniẹl 11:45 - Edo Bible (E Baibol Ẹdo) Version 1996

⁴⁵ Ọ gha ya mu avbe owa ukpọn ọba ọghọe ne tẹgbẹẹ, ye ẹkpo okun kevbe oke nọkhua, ne a bọ Ọgua Osa yi sokpan, Ọ gha wu vbene ọmwa rhọkpa i ra na gha rre evba ne ọ gha yọre obọ.”

Daniẹl 11:45 ပူးပေါင်းရင်းမြစ်များ

Psalm 48:2

E Zaiọn ne oke Osanobua oke ne ọ yo kevbe ne ọ mose nọ ẹvbo ọba nọkhua, ne ọ sẹ otọ agbọn hia ọyẹnmwẹ.

Aizaia 10:12

Sokpan, I gha ru emwi ne I ru vbe Oke Zaiọn kevbe Jerusalẹm nẹ, I gha rri ọgbaisi Asiria oya ye orhuọ hia ne ọ rhuọ kevbe uhiomwẹ ne ọ hio.

Aizaia 11:9

A i ra miẹn emwi dan okpa ra emwi ne ọ kuan ọmwa egbe vbe Zaiọn, ne oke nọhuanrẹn ọghe Osanobua. A rẹn e Nọyaẹnmwa gha vuọn otọe nii zẹ vbene amẹ vuọn okun.

Aizaia 14:13

Te u te wa tae wẹ u ra hin gha rrie ẹrinmwi, ne u ya mu ẹkete ruẹ ye odukhunmwu avbe orhọnmwẹ ne ọ yo sẹẹ. U te gha ro wẹ te u ra tota yan uhunmwu oke zẹ vbe ọba, oke ne ọ rre odẹ okuọ nii, ehe ne avbe ẹbọ na do sikoko.

Aizaia 2:2

Vbe ẹdẹ ne ọ dee, uhunmwu oke ne a gha bọ Ọgua Osa yi, ghi gha re uhunmwu oke ne ọ yo sẹẹ ehia ọ ghi gha ghe avbe oke hia uhunmwu. Agbọn ẹvbo nibun gha rre, iran ghi gha bi la rọ.

Aizaia 27:13

Ọ gha sẹ ẹdẹ ne ẹdẹrriọ, a gha kpe okpe ne a ya tie ivbi Izrẹl hia ni rre iwe vbe Asiria kevbe Igipt gha die owa. Iran gha rre do ga e Nọyaẹnmwa vbe Jerusalẹm, vbe oke ẹre nọhuanrẹn.

Aizaia 65:25

Avbe akpakomiza kevbe ivbi ohuan gha gba gha rri evbare kugbe, avbe oduma ghi gha rri irunmwu zẹvbe ẹmila, avbe ẹyẹn i ra gha re emwi ikuaengbe ọvbehe. Emwi ọkpa ne ọre ọghe ọkhọ ra emwi dan, a i ghi ra miẹn ọẹn Vbe Zaiọn ne oke nọhuanrẹn mwẹ.”

Aizaia 66:20

Iran gha viọ avbe ivbi ẹvbo uwa ke avbe uhunmwu ẹvbo na hia werriegbe rre zẹ vbe emwi ne a ya ha oko gunmwẹ. Iran gha viọ iran gha die oke mwẹ nọhuanrẹn vbe Jerusalẹm, iran gha ya ẹsin viọ iran gha dee kevbe ekẹtẹkẹtẹ kevbe e kamẹl deba ikẹkẹ okuo kevbe okotọ, vbene ivbi Izrẹl ya avbe ọkpan ne ẹ i mwẹ awua viọ ọka do ya gha muohan vbe Ọgua Osa.

Ezikiẹl 39:2

I gha mu ẹre aro da odẹ ọgbọn, I ghi rhie ẹre ke odẹ okuọ ne gbaan gha dee, rhinrin ọ te do sẹ avbe oke Izrẹl.

Daniẹl 11:16

Ivbi e Siria ni mu okuo rre gha ru iran zẹ vbene ọ khọn iran, vbe ne a i na wẹ ẹre vbe ọ ya de. Ọ gha mudia vbe Otọe Eyan nii ehia ghi wa gha rre ọre atataobọ.

Daniẹl 11:41

Ọ gha vbe mu okuo la Otọe Eyan nii ne arẹngbe. Ọ gha gbele arriaisẹn vbe ihe igbe nibun, sokpan avbe ẹvbo zẹ vbe Idọm, e Moab, kevbe ehe ne ọ ghi kẹe vbe Amọn, gha lẹ fe vbe obọ ẹre.

Daniẹl 11:44

Ẹghẹ ni, iyẹn ne ọ ke odẹ ahọ kevbe ekẹn rre, gha ye afianma fian ẹẹn, ọ ghi wa ye ọkpankpan gha gbinna, ọ ghi gbele emwa nibun.

Daniẹl 2:35

Vbe ọwarọkpa nii, ematọn ne ọ rrọọ, kevbe obuẹ, kevbe oze kevbe esiliva kevbe igoru na wa rẹnkhẹẹn uan, ọ yevbe ebubẹ vbe ehe ne a na dunmwu ọka vbe ẹghẹ okhuakhua, ẹhoho keghi kpolo ehia gha rrie, a na wa ho ehia bẹkun. Sokpan, okuta ne ọ rrọọ keghi do digba khian oke nọkhua, ne ọ wa gba otọe agbọn hia.

Daniẹl 7:26

Vbe iyekọnii, iko ne ọ bu ohiẹn vbe ẹrinmwi ghi do iko, iran ghi miẹn ẹre ẹtin, iran ghi wa fuẹn ọnrẹn uan fẹẹrẹ.

Daniẹl 8:25

Rhunmwuda ighe ọmwa ero nọ, emwi ero ne ọ ru hia ghi wa gha dunna ne ẹẹn. Rẹn gha wa gha ye emwi ne irẹn khin hio, ọ ghi vbe fuẹn emwa nibun uan vbe a ma ro a ma kọ, uhin ighe te ọ ra yagha Ọba ne ọ kpọlọ Sẹehia fẹẹrẹ sokpan, a gha fuẹn ọnrẹn uan vbe ne a i na lo ẹtin ọmwa nagbọn hiehiere.

Daniẹl 9:16

“Wẹ gbinna ne ima vbe ẹghẹ nọ gberra, rhunmwuda ọnii, ghẹ ghi mu ohu e Jerusalẹm ọvbehe, ẹvbo ruẹ ọre nọ, oke ruẹ nọhuanrẹn nọ. Te emwa hia ni rre avbe ẹvbo ni diake mwa ghi ya ro gbe Jerusalẹm re, kẹe kevbe avbe emwa ruẹn, rhunmwuda orukhọ mwa kevbe emwi dan ne avbe erha mwa odede ru.

Daniẹl 9:20

I keghi ye gha na erhunmwu nii khian, I keghi miẹn orukhọ mwẹ kẹe kevbe orukhọ ọghe Izrẹl ne emwa mwẹ, I na gha rinmwian e Nọyaẹnmwa Osanobua mwẹ ne ọ dọlọ rhie Ọgua Osa ẹre nọhuanrẹn ye ihe.

Joẹl 2:20

I gha khulo avbe oghẹn irhiso kua, iran ni te ke odẹ okuọ rre, I gha khulo eso vbọ la uwu ato. I gha khulo iran ni ke odaro, la uwu Okun Nọwu, iran ni ke iyeke, gha la uwu e Meditẹrrenian. Ikun iran ghi gha wia. I gha fuẹn iran an, rhunmwuda emwi hia ne iran ru uwa ẹre.

Maika 4:2

Avbe emwa iran ghi gha kha wẹẹ, “Wa gie ima hin oke Nọyaẹnmwa gha rrie Ọgua Osa, Osanobua Izrẹl. Rhunmwuda, ọ gha ma ima emwi ne ọ ho ne ima ru, ma gha lele urodẹ ne irẹn zẹe, rhunmwuda, e Jerusalẹm ọ re iruẹmwi e Nọyaẹnmwa ke rre; e Zaiọn ọ re ọ ke guan gie emwa irẹn.”

Zẹkaraia 14:8

Ọ gha sẹ ẹdẹ ne ẹdẹrriọ, amẹ ne ọ hianrẹn gha lẹ ke Jerusalẹm rre, obọ ọkpa vbọ gha lẹ ghe Okun nọwu, obọ ọkpa ghe Meditẹrrenian. te ọ ra wa lẹ ne ukpo gbe, vbe ẹghẹ orhọ kevbe uyunmwu.

Nọmbas 34:5

Ọ ghi ke evba rhie uhunmwu da odẹ ẹzẹ vbe Igipt, ọ ghi ya fo vbe Meditẹrrenian.

II Tẹsalonaika 2:4

Rẹn gha ghe odan ye emwi hia ne emwa ghi gho nẹ, kevbe emwi hia ne emwa ghi tie ẹre ne ọ huanrẹn. Rẹn ghi tọn egbe ẹre mu sẹ ehia fẹẹrẹ, uhin ọ ghi ya tota ye Ọgua Osa ọghe Osanobua, ọ ghi wẹ rẹn ọre ọ ghi re Osanobua!

II Tẹsalonaika 2:8

Ẹghẹ nii Ọmwa Dan ni ghi ya egbe ladian, e Nọyaẹnmwa Jesu Kristi ghi ya ẹhoho unu ẹnrẹn gbe ẹe ua, ọ ghi vbe ya urremwẹ ọnrẹn ne ọ mwẹ uyi fuẹn ọnrẹn uan, vbe ẹghẹ ne irẹn gha na rre.

Arhie Maan 13:10

Ọmwa ne a kha nẹ ighẹ te a ra mu ẹre izẹghede, te a ra gele mu ẹre izẹghede, ne a wẹ a gha ya umozo gbe ua, te a ra gele ya umozo gbe ẹe ua. I ziengbe kevbe iyayi ọre ọ na nọ rẹn vbe obọ emwa Osanobua.”

Arhie Maan 20:2

Ọ keghi gua Ugbogiorinmwi nii rhie, nene ẹyẹn nẹkporriọ ne a tie ẹre Esu ra Setan, ọ keghi mu ẹn gba la ukpo arriaisẹn.

Arhie Maan 20:9

Iran gha egbe gba otọ agbọn hia, iran ke ghae ga agọ emwa Osanobua kevbe ẹvbo ni ne irẹn ho ẹmwẹ ọnrẹn, sokpan, erhẹn ke ẹrinmwi rre, ọ na fuẹn iran uan.