Asan-Ibo 9:10 - Edo Bible (E Baibol Ẹdo) Version 1996

¹⁰ Mu aro ye iwinna ne u a rhirhi a gha winna rhunmwuda, a gha rrie a i wua nẹ, a i ghi ru emwi rhọkpa, iro i ghi rrọ, irẹnmwi i ghi rrọ, ẹwaẹn i ghi rrọ, ehe ne uwẹ rrie ọ re onii khin.

Asan-Ibo 9:10 ပူးပေါင်းရင်းမြစ်များ

Gẹnẹsis 37:35

Ivbi ẹre nikpia kevbe nikhuo hia keghi rre do gha fu ẹre ẹko rre, sokpan ọ he ne a fu irẹn ẹko rre, ọ wẹẹ, “Te I ra khiẹ ovbi mwẹ I te ya wu.” Rhunmwuda ọnii, ọ na gha khiẹ ovbi ẹre ighẹ Josẹf.

I Krọnikol 22:19

Banbanna nian, wa ya ẹtin uwa kevbe orhiọn uwa hia ga e Nọyaẹnmwa. Wa suẹn gha bọ Ọgua Osa ne uwa miẹn ehe na mu Ẹkpẹti Ile ọghe Nọyaẹnmwa ye uwu ẹre deba avbe emwi nihuanrẹn ni dekẹe hia ne a ya ga ẹe.”

I Krọnikol 28:20

E Devid ne ọba keghi tama e Solomọn ne ovbi ẹre wẹẹ, “Gie ekhọe ruẹ sẹ otọ ne u vbe mu aro yọ, suẹn iwinna nii, ghẹ vbe gie emwikemwi da a obọ yi. E Nọyaẹnmwa ne Osanobua ne imẹ ga, gha yaba ruẹ. Ẹ i ra fi iyeke gbe uẹ, ọ gha mudia kuẹ u te do winna iwinna ne a gha winna na vbe Ọgua Osa.

Nehimaia 2:12

I ma tama ọmwa rhọkpa, emwi ne Osanobua rhie yọ mwẹ ekhọe ne I do ru ne Jerusalẹm. Ẹre ọ ghi na sẹ ogiasọn, I keghi guakpao, I na viọ ihua mwẹ eso ba egbe ladian. Ẹsin ne imẹ hinrin ọkpa ọ re ọ gha re aranmwẹ ne ima mu gha khian.

Nehimaia 4:2

Ọ kegha tae vbe odaro ihua ẹre kevbe ivbiyokuo e Sameria wẹẹ, “De emwi ne avbe Ju ne ẹwobi emwa wẹ iran ru na yi. Te iran ya dọlegbe bọ ẹvbo nii ra? Te iran ro ighẹ iran gha sẹtin la ekpa ese ne a zọ winna iwinna nii fo ẹdẹ ọkpa ra? Iran gha sẹtin ya iku ne ọ giẹn uan ru okuta ne a ya bọ owa ra?”

Nehimaia 4:6

Rhunmwuda ọnii, ma kegha gbe ekẹn nii khian, wanwanna, ọ keghi sẹ ukhiọnmwẹ uyomwẹ ọnrẹn rhunmwuda ọ ke wa rre emwa nii ekhọe ne iran winna.

Job 10:21

I gha kpao wan vbe ne I i ghi na vbe dọlegbe dee. I rrie ẹvbo ne ọ vuọn ne ebiebi ke ikhiẹkhiẹ egbe.

Job 10:22

Otọe ebiebi, aghọnghọn kevbe otighi. Ehe ne uwanmwẹ tobọ re na re ebiebi.”

Job 21:13

Iran ghi lo ẹdẹ agbọn iran vbe ọfumwegbe, iran ghi wu hẹkpẹe vbe nẹi na rrioya.

Psalm 6:5

A i ye ruẹ rre vbe ẹvbo iran ni wulo nẹ, ọmwa rhọkpa i sẹtin rho ruẹ vbe evba.

Itan 3:28

Adeghẹ u gha sẹtin ru iyobọ ne ogieva ruẹ wanwanna, ghẹ tama rẹn wẹ ne ọ ziengbe khẹ akhuẹ.

Asan-Ibo 11:3

Ehe ne erhan a rhirhi de ghe, ehe ne ọ de yi nii ọ re ọ ra gha ye. Amẹ gha bi, ọ ghi rhọ.

Asan-Ibo 11:6

Kọ emwi ruẹn vbe owiẹ, ota gha rre, vbe kọ, u ma rẹn dẹghe ehia ọ re ọ ra maa ra dẹghe ọna ọ ra maa vbọ sẹẹ nọkpa.

Aizaia 38:10

I te gha ro wẹ vbe ẹghẹ ne agbọn na wa ma mwẹ na te I ghi rrie agbọn iran ni wulo nẹ ne I ghẹ lo ẹdẹ mwẹ hia ne a rhie mẹ.

Jerimaia 29:13

Wa gha gualọ mwẹ, wa ghi vbe miẹn mwẹ. Wa gha miẹn mwẹ rhunmwuda, wa gha ye ekhọe hia gualọ mwẹ.

Nọmbas 13:30

E Kelẹb keghi gbe eta ye avbe emwa nii gui ma e Mosis unu, ọ wẹẹ, “Te ima ra dekun ẹvbo nii ne a mu ẹẹn nian, ma wegbe sẹ ne ọ gha khọn rẹn miẹn otọ.”

Matiu 20:7

Iran wanniẹn tama rẹn wẹẹ, ‘Ma ma miẹn ọmwa ne ọ viọ ima ye iwinna.’ Ọ khama iran wẹẹ, ‘Wa vbe gha rrie ugbo mwẹ khekherriọ.’

Matiu 6:33

Emwi ne uwa gha ru ọrọre ne uwa ka mu aro ye ẹmwẹ Arriọba Osanobua kẹe kevbe emwi ni lelẹe khian nẹ, rẹn gha ye emwi ni ghi dekẹe hia sẹ uwa ọkẹn.

Iyẹn ne ọ Maan Ọghe Jọn 4:34

Jesu tama iran wẹẹ, “Evbare mwẹ ọrọre ne I họn ẹmwẹ ọmwa ne ọ gie mwẹ uhunmwu, ne I vbe winna okhuo ne ọ fian mẹ fo.

Iyẹn ne ọ Maan Ọghe Jọn 5:4

Rhunmwuda ẹghẹ hia ọre odibo e Nọyaẹnmwa ya tuorre la uwu odighi nii ya gha tughu amẹ ọnrẹn, ọkhọnmwọ ne ọ ghi rhirhi ka la uwu amẹ nii vbe a ghi tughu ẹe nẹ, ọ ghi fe vbe obọ emianmwẹ ne ọ rhirhi a gha khuọnmwi.]

Iyẹn ne ọ Maan Ọghe Jọn 9:4

Te imẹ gha winna iwinna ọmwa ne ọ gie mwẹ vbe ẹdẹ ma he mu, ebiebi gha he so vbe nẹ ọmwaikọmwa i ghi ra na sẹtin winna.

Ebe ne Pọl gbẹẹn gie emwa Rom 12:11

Wa kakabọ gha winna, wa ghẹ so oroho, wa gha ya ekhọe ne ọ vuọn ne oyọnyọn ga Nọyaẹnmwa.

I Kọrinti 15:10

Sokpan vbe ekpa ẹsọhẹ Osanobua ọre I na re emwi ne I khin na, ẹsọhẹ ne ọ rhie mẹ, a ma vbe muẹn rhia. Vbe ẹmwata, mẹ kakabọ winna sẹ avbe ukọ nekpa hia, a gha rhe miẹn wẹ ẹ i re ẹtin obọ mwẹ vbe ẹ i re ẹsọhẹ Osanobua ne ọ yaba mwẹ winna.

I Kọrinti 16:10

Deghẹ Timoti do van odọghe uwa, vbene ọ rhirhi gha ye hẹ, wa ghẹ mwẹ wa ma mu ẹre aro ze vbe ehe ne uwa ye, rhunmwuda vbene imẹ winna ne Nọyaẹnmwa ọre irẹn vbe winna.

I Kọrinti 9:24

Wa rẹnrẹn wẹ vbe ulẹ ne a na suan, emwa ni rre ulẹ nii hia ọre ọ rhie ulẹ, sokpan, arhin ọkpa kẹkan ọre ọ miẹn igho ọmẹguae ne ọ rrọọ. Rhunmwuda ọnii, wa rhulẹ vbene igho ọmẹguae gha na sẹ uwa obọ.

I Kọrinti 9:26

Ọnii ọ si ẹe ne I na wa rhulẹ ghe ehe ne a wẹ ọ khin taara, ọnii ọ si ẹe ne I na ye vbe ọgbekpa ne ẹ i fi ọ hohuoa.

Ẹfisọs 5:16

U gha miẹn ẹkpo otọ ya ru emwi, u ghi lo ẹre ẹsẹse rhunmwuda, ẹghẹ ne a ye na i maa.

Kọlose 3:23

Emwikemwi ne uwa rhirhi gha ru, wa ye ẹtin uwa hia gha ruẹe, vbene a miẹn wẹ Nọyaẹnmwa ọre uwa winna na ighẹ ẹ i re ọmwa kẹkan.

I Samuẹl 10:7

Emwi na ghẹ ghi sunu, u ghi ru vbe ne Osanobua rhie ye uẹ ekhọe.