Asan-Ibo 8:16 - Edo Bible (E Baibol Ẹdo) Version 1996

¹⁶ Ẹghẹikẹghẹ ne I ya ho ne I gha wan, kevbe ne I vbe rẹn emwi ne ọ khian vbe agbọn na, I ghi miẹn wẹ ọmwa sẹtin rhan aro ua ye ukpo kevbe asọn kevbe avan.

Asan-Ibo 8:16 ပူးပေါင်းရင်းမြစ်များ

Gẹnẹsis 31:40

Ẹghẹ nibun, ovẹn gha gbe mwẹ nẹ vbe avan, oni ghi gbe mwẹ vbe asọn. I i miẹn ovbe.

Psalm 127:2

Ẹi mwẹ asa ne ọ ye ne a gha miẹn ẹsọn vberriọ ba ẹmwẹ evbare unu, ne a gha kpao vbe owiẹ vbirrivbirri, vbe ne a i na vbe rherhe lovbiẹ. Rhunmwuda, e Nọyaẹnmwa ọ re ọ kpemehe ne iran ne ọ ho ẹmwẹ ọnrẹn, vbe iran he ye vbiẹ.

Asan-Ibo 1:13

I keghi wa yan tae, I keghi vbe mu aro yọ wẹ, I gha gualotọ emwi hia ne a ru vbe agbọn na. Agbọn usẹ ọ re Osanobua mwamwa ne ima.

Asan-Ibo 1:14

Aro mwẹ sẹ emwi hia ne a ru vbe agbọn na nẹ, ne I wa tama ruẹn nian wẹ erhọkpa i mwẹ esa. Te ọ yevbe ne a khu ẹhoho khin.

Asan-Ibo 1:17

I keghi vbe kha wẹ, I gha ruẹ alughaẹn ne egbe ne ọ rre irẹnmwi kevbe ukọnmwẹ, aro ne ọ hianrẹn kevbe emwẹmwẹ. Sokpan, I keghi miẹn wẹ te ọ yevbe ne ọmwa khu ẹhoho khian.

Asan-Ibo 2:23

Vbe ẹghẹ ne ọmwa ya rre agbọn na, ẹsọn ne ọmwa miẹn, ohawa kevbe ọkpeudu ọ re ọ miẹn vbọ. Asọn gha vbe rre, ekhọe ẹre i vbe sotọ. Ọna i zẹdẹ maa.

Asan-Ibo 4:8

Wa ghe ọmwa na ne irẹn okpa vbe ẹhi ẹre rre owa. Ẹ i mwẹ ọmọ, ẹ i mwẹ etẹn, sokpan, ẹsọn ọ re ọ miẹn vbe ẹghẹ hia, ẹfe ne ọ mwẹ i ye vuọn ẹre aro. De ọmwa ne ọ ghi miẹn ẹsọn na na yi ne ẹ i na hẹwẹ gbe amẹ sa wọn? Ọna i zẹdẹ ma hiehie, agbọn usẹ ọ re nọ.

Asan-Ibo 5:12

Ọmwa ne ọ winna sẹtin miẹn evbare gha re, ugbẹnso, ẹ i vbe miẹn re. Vbene ọ rhirhi a gha ye hẹ, asọn gha rre ọ ghi miẹn ovbe vbiẹ khuẹrhẹ. Sokpan, emwi ne ọmwa ne ọ fe mwẹ bun sẹrriọ wẹ afianma ighi gie ẹe miẹn ovbe vbiẹ.

Asan-Ibo 7:25

Sokpan, mẹ keghi wa mu aro ye ẹmwẹ irẹnmwi kevbe emwi ne a ruẹ, I keghi wẹ te I gha gualọ ẹwaẹn miẹn, ne I vbe rhie ewanniẹn ye avbe ọta ne I nọ hia; kevbe ne I rẹn vbene ezurọ re emwi ukọnmwẹ kevbe emwi dan hẹ.

Asan-Ibo 8:7

Ọkpa vbe uwu ima ne ọ rẹn emwi ne ọ gha sunu i rrọ, a i vbe miẹn ne ọ gha ta ẹe ma ima.

Asan-Ibo 8:9

Ẹghẹ ne I na gha roro ẹmwẹ emwi ne a ru vbe agbọn na, ọ re I na miẹn emwi na hia; agbọn na ne emwa eso na wa mwẹ ẹtin, emwa ọvbehe ghi gha sẹ usẹ lele iran.