Asan-Ibo 8:14 - Edo Bible (E Baibol Ẹdo) Version 1996

¹⁴ Ẹmwẹ oya ọ re ọna wa khin. Wẹ ghe emwi ne ọ sunu vbe agbọn na, ugbẹnso, emwa esi ghi ya uhunmwu hẹ oya ne ọ khẹke ọmwa dan, emwa dan, ghi ya rri ere ne ọ khẹke ọmwa esi, I wẹ ọna i maa.

Asan-Ibo 8:14 ပူးပေါင်းရင်းမြစ်များ

Job 1:22

Vbene emwi na hia ye sunu sẹ, e Job ma rukhọ vbe ekpa ne ọ gha na zan Osanobua.

Job 21:7

“Vbọzẹ ne Osanobua na giẹ emwa dan gha rre agbọn yi, iran ghi tọ, agbọn ghi vbe maa iran?

Job 27:12

Ẹn o, a rhe ta ẹẹ na, wa tobọ uwa ya aro uwa miẹn ọẹn nẹ; vbe uwa a ghi na guan ẹmwẹ oya vberriọ hẹ yi?

Psalm 73:3

Rhunmwuda, I kegha gbe ọ ma kan uwa ne iran ni tọn egbe mu, vbe I miẹn wẹ emwi wa dinna odẹ ne emwa dan.

Asan-Ibo 10:5

Uyinmwẹ ne ọ ma dia ne I vbe miẹn vbe agbọn na ọ re ọna khin, emwi ne ọ ma gba ne iran ni khaemwisẹ si.

Asan-Ibo 2:14

Avbe umẹwaẹn sẹtin dẹghe ehe ne iran rrie, sokpan avbe akpa i sẹtin.” Sokpan, I vbe rẹn wẹ emwi okpa ọ re ọ ra rruan ima hia.

Asan-Ibo 4:4

I vbe rẹn emwi ne ọ si ẹe nẹ, ne emwa na miẹn ẹsọn sẹrriọ vbe agbọn na, ne ọ miẹn ehe na dunna ne iran: emwi ne ọ siẹe ọrọre wẹ emwi ne ogieva iran mwẹ viẹn ye iran aro, sokpan, ọna i vbe mwẹ esa, te ọ yevbe ne a khu ẹhoho khian.

Asan-Ibo 4:8

Wa ghe ọmwa na ne irẹn okpa vbe ẹhi ẹre rre owa. Ẹ i mwẹ ọmọ, ẹ i mwẹ etẹn, sokpan, ẹsọn ọ re ọ miẹn vbe ẹghẹ hia, ẹfe ne ọ mwẹ i ye vuọn ẹre aro. De ọmwa ne ọ ghi miẹn ẹsọn na na yi ne ẹ i na hẹwẹ gbe amẹ sa wọn? Ọna i zẹdẹ ma hiehie, agbọn usẹ ọ re nọ.

Asan-Ibo 7:15

Te ẹdẹ agbọn mwẹ kulo, sokpan aro mwẹ miẹn emwi hia nẹ vbọ. Ọmwa esi sẹtin wa wu vbene ọmwa ọvbehe na ye tọ khian, egbe ne ọ ya re ọmwa dan.

Jerimaia 12:1

Nọyaẹnmwa, I gha wẹ ne ima gba gui ẹzọ mwẹ, wẹ ọ re ọ khian rri ase. Sokpan, I gha ye nọ ruẹn ọta ne ọ dekan ohiẹn ẹmwata. Vbọzẹ ne agbọn na maa emwa dan sẹrriọ yi?

Malakai 3:15

Vbene ima ghi ghe ẹre na, iran ni tọn egbe mu ọ re ọ ghi rre uwu oghọghọ. Ẹire wẹ te agbọn wa ma emwa dan ọkpa, sokpan iran ghi ye uyinmwẹ dan iran danmwẹ Osanobua ghe ne egbe wọ ẹre, a i vbe ru iran emwirhọkpa.’ ”