Asan-Ibo 5:8 - Edo Bible (E Baibol Ẹdo) Version 1996

⁸ Ghẹ giee yan uwe unu uan adeghẹ arriọba kpokpo ovbiogue, ighe ọ ma vbe gie a bu ohiẹn ẹmwata ne iran, ra ne a rhie emwi ne ọ khẹke iran ne iran. Dọmwadẹ ọmwa iwinna, ọmwa ne irẹn rre ototọ ẹre, ọ re ọ sinmwi ne ẹẹn, ọmwa ne ukpo ẹre ghi vbe yo sẹẹ ọ re ọ sinmwi ne iran eveva.

Asan-Ibo 5:8 ပူးပေါင်းရင်းမြစ်များ

II Krọnikol 26:10

Ọ keghi vbe bọlọ owa ọkhẹ uhae amẹ ni bun rhunmwuda, rẹn wa mwẹ oghẹn ẹmila ni bun vbe ototọ oke kevbe ehe ne ọ rriẹe ni rre odẹ orrie. Rhunmwuda ne irẹn na wa ho ẹmwẹ ugbo ne a gbe, ọ keghi wẹ ne emwa ni bun gha mu ugbo azara vbe otọe ni rre uhunmwu oke kevbe ne iran gha ya avbe otọe ni maa emwiokọ ni rrọ gbe ugbo.

Job 24:23

Osanobua sẹtin giee gha rrọọ vbe a i mwẹ ẹbe, sokpan ọ wa baba ẹe vbe ẹghẹ hia.

Psalm 12:5

Sokpan, e Nọyaẹnmwa khare wẹẹ, “Eban nian, mẹ dee, rhunmwuda, a zẹ iran ne ẹi mwẹ kpokpo. Iran ne a zẹ kpokpo gha viẹ eve obalọ. I gha do ru ẹe ne ẹkun sẹ iran otọ, ne egbe rọkhọ iran zẹ vbe ne iran ho.”

Psalm 55:9

Gie iran ne eghian mwẹ zurọ ua vbe iran a gha guan, I miẹn uyimwẹ ne ọ wegbe kevbe otighi vbe ẹvbo nii.

Psalm 82:1

Osanobua miẹn agba dia vbe iko ẹrinmwi, vbe iko ne avbe ẹrinmwi do, rẹn ọ re ọ kha vbene irẹn tae yi hẹ:

Psalm 83:18

Te iran gha rẹn wẹ wẹ ọkpa ọrọre Nọyaẹnmwa, ne ọ khaemwisẹ yan emwi hia, ni rre otọ agbọn.

Psalm 95:3

Rhunmwuda, Nọyaẹnmwa. Osanobua nọkpọlọ ọre nọ, kevbe ọba ne ọ kpọlọ sẹ ẹbọ hia.

Itan 22:16

Adeghẹ u ha oko gie iran ni fe nẹ, ra te u zẹ ivbiogue kpokpo ne u ya họn ẹfe ruẹ, te uwẹ tobọ ruẹ ra do khian ovbiogue.

Itan 24:12

U sẹtin kha wẹ ọ ma kan ruẹn, sokpan Osanobua rẹnrẹn, ọ vbe ghe ekhọe ruẹ. Ọ wa rhie aro lele uẹ, ọ rẹnrẹn, ọ gha vbe ha ẹre nuẹn zẹ vbene u vbe ru.

Itan 8:17

I ho ẹmwẹ iran ni ho ẹmwẹ mwẹ, ọmwaikọmwa ne ọ gualọ mwẹ gha miẹn mwẹ.

Asan-Ibo 3:16

Deba ena hia, I keghi vbe miẹn uyimwẹ ika vbe ehe ne ọ te kei ne a ta ẹmwata kevbe emwi ne ọgbae gha ye.

Asan-Ibo 4:1

I keghi vbe dọlegbe do ghe avbe emwi hia ni sunu ne ẹ i la ihe vbe agbọn, iran ne a zẹ kpokpo gha viẹ egbe, sokpan a i miẹn ne ọ ru iyobọ ne iran. A i miẹn ne ọ ru iyobọ ne iran rhunmwuda obọ ọghe iran ni zẹ iran kpokpo, ọ re ẹtin khua ghe.

Asan-Ibo 5:9

Ọba tobọ ẹre emwiorhọ ọ re ọ hẹnhẹn egbe yan.

Asan-Ibo 7:7

Ọmwa ne ọ wan gha mu ọmwa ru, uyinmwẹ ọzuọ ọ re ọ yinrin nii. U gha miẹn igho odieke, u mu eni ruẹn rhia nẹ.

Asan-Ibo 8:9

Ẹghẹ ne I na gha roro ẹmwẹ emwi ne a ru vbe agbọn na, ọ re I na miẹn emwi na hia; agbọn na ne emwa eso na wa mwẹ ẹtin, emwa ọvbehe ghi gha sẹ usẹ lele iran.

Aizaia 10:12

Sokpan, I gha ru emwi ne I ru vbe Oke Zaiọn kevbe Jerusalẹm nẹ, I gha rri ọgbaisi Asiria oya ye orhuọ hia ne ọ rhuọ kevbe uhiomwẹ ne ọ hio.

Aizaia 3:15

Wa i mwẹ asẹ ne uwa gha ya gha piẹn emwa mwẹ ginnotọ, ne uwa vbe gha mu avbe ivbiogue vbuẹvbuẹ. Mẹ ne Udazi e Nọyaẹnmwa ne Oghodua ọ re ọ tae.”

Aizaia 37:36

Odibosa e Nọyaẹnmwa keghi la agọ ivbi Asiria, ọ keghi gbele ivbiyokuo arriaisẹn isẹn yan iyi ihinrin (185,000). Ẹdẹ ghi gbe vbe owiẹ ne ọ lelẹe, ehia keghi wulo lele otọe bẹẹrẹ!

Aizaia 5:7

Izrẹl ọrọre ogba azara ọghe Nọyan ne Oghodua; emwa e Juda ọrọre azara ne ọ kọ yọ. Rẹn te rhie aro yọ ne iran gha ru emwi ne ọ maa, sokpan, iran kegha do izigha. Rẹn te rhie aro yọ ne iran gha ru emwi ne ọ gbae, sokpan, emwa ne obọ iran vbare kegha tu wẹ ne a bu ohiẹn ẹmwata.

Aizaia 57:15

“Mẹ ọrọre Osanobua ne ọ yo kevbe ne ọ kpọlọ ne ọ rrọ ẹdẹdẹmwẹdẹ. Ehe ne ọ yo kevbe ne ọ huanrẹn ọ re imẹ dia, sokpan mẹ vbe di ọghe iran ni mu egbe rriotọ, kevbe ni roiro fi uyinmwẹ werriẹ ya, ne imẹ miẹn ehe na rhie idaehọ kevbe imuẹntiyan ọghe iran werriegbe ye ihe.

Ezikiẹl 18:18

Vbe odẹ ne ogieva, erha ẹe do oyi, ọ vbe rha, ọ vbe ru emwa hia emwi dan vbe ẹghẹ hia. Rhunmwuda ọnii, orukhọ ne ọ tobọ ẹre ru ọ re ọ wu yi.

Emọs 5:12

I rẹn vbene orukhọ uwa khọrhiọn sẹ hẹ, kevbe vbene a i ghẹru ne uwa ru vbe bun hẹ. Wa ọ re ọ zẹ emwa ẹmwata owẹ, wa ọ re ọ rhie igho odieke, wa i gia bu ohiẹn ẹmwata ne ivbiogue vbe iko.

Emọs 6:12

Ẹsin vbe gbe ọkuẹkuẹ vbe uhunmwu okuta ra? Avbe ya ẹmila vulo otọ vbe amẹ okun ra? Sevba, wa ye ohiẹn ẹmwata khian eruan, wa keghi vbe ya ne ọgbae khian ne ọ magba.

Maika 2:9

“Wa khulo avbe ikhuo ne emwa mwẹ mwẹ kua vbe owa ne ọ yẹ iran. Wa ma ghi gie afiangbe mwẹ sẹ ivbi iran obọ ẹdẹdẹmwẹdẹ.

Zẹkaraia 8:6

“Ọna sẹtin yevbe emwi ne ẹ i gia ru vbe aro emwa ni rre ẹvbo ni gha dekẹe na, sokpan, ẹ i re emwi ne ẹ i gia ru vbe obọ mwẹ.

Malakai 3:5

E Nọyaẹnmwa ne Oghodua khare wẹẹ, “I gha ladian vbe uwu ẹbu uwa ne I do bu ohiẹn. I gha wa sẹ osẹe gbe iran ni ru e emaziki awan, iran ni ghẹ, iran ni sẹ osẹe ohoghe, iran ni gbe igho emwa ne iran ya winna rhu, iran ni mu avbe ẹgbẹe ru kevbe emọ ne ẹ i mwẹ erha, kevbe avbe erhunmwuyẹn, kevbe iran hia ne ẹ i da mẹ.”

Iyẹn ne ọ Maan Ọghe Luk 1:32

Rẹn gha khian okpọmwa, a ghi vbe gha tie ẹre Ovbi Osanobua Ne Ọ Yọ Sẹ, Nọyaẹnmwa Osanobua gha ma ẹn re ọba zẹ vbe ne Devid ne erhae odede vbe gha ye.

Iyẹn ne ọ Maan Ọghe Luk 1:35

Odibosa ni keghi wanniẹn wẹẹ, “Orhiọn Ne Ọ Huanrẹn gha rhuẹ yan ruẹn. Ẹtin Osanobua gha hin yan ruẹn. Rhunmwuda ọnọna, a gha tie ọmọ ne ọ huanrẹn ni Ovbi Osanobua.

Iyẹn ne ọ Maan Ọghe Luk 1:76

Wẹ ne ovbi mwẹ, akhasẹ Osanobua Ne Ọ Yo Sẹ, ọre a gha tie ruẹ. Wẹ gha ke aro ne Nọyaẹnmwa. Ne u ya zẹ odẹ ye otọ khẹ ọre.

Iwinna 12:23

Vbe ọwarọkpa nii, odibo Nọyaẹnmwa keghi wa gbe Hẹrọd fi otọ rhunmwuda ọ ma rhie uyi ne Osanobua, ọkhọe keghi rriọ rua, ọ na wu.

Ebe ne Pọl gbẹẹn gie emwa Rom 11:33

U miẹn vbe ẹfe Osanobua bun hẹẹ! U miẹn vbene ẹwaẹn kevbe irẹnmwi ọnrẹn dinmwi hẹẹ! De ọmwa nọ gha sẹtin rhan otọ vbene ọ ta ẹmwẹ yi hẹẹ? Gha ọ rẹn vbene ọ ru emwi hẹẹ.

Jems 2:13

Rhunmwuda, ọmwa ne ọ ma mwẹ itohan, Osanobua i ra tohan rẹn vbe ọ a gha bu ohiẹn, sokpan itohan ọre ọ khọnmiotọ ibuohiẹn.

I Pita 4:12

Ọse mwẹ ni ghan, wa ghẹ gie edanmwẹ nọwegbe ne uwa miẹn ẹghẹ na, yan uwa unu uan, zẹ vbe emwi ne a ma he miẹn ẹdẹ.

I Jọn 3:13

Rhunmwuda ọnii, etẹn mwẹ, wa ghẹ giẹe yan uwa unu uan, a deghẹ agbọn na khu iwu uwa.