Asan-Ibo 5:1 - Edo Bible (E Baibol Ẹdo) Version 1996

¹ Hẹko gha ya ẹwaẹn yo Ọgua Osa. Ọ kere ne a yo ya ruẹ emwi vbe evba sẹẹ ne a ya gha zọ ese zẹvbe avbe ọzuọ ni ma rẹn emwi ne ọ kere hin e ne ọ ma kei rre.

Asan-Ibo 5:1 ပူးပေါင်းရင်းမြစ်များ

II Krọnikol 26:16

Sokpan, ugbẹn vbe Uzaia ne ọba ghi re ọmwa ne ọ wegbe nẹ, ọ keghi do gha hio, ọnii ọ re ọ si udemwẹ ọnrẹn. Ọ keghi yagha e Nọyaẹnmwa ne Osanobua ẹre vbene ọ na gha rrie Ọgua Osa ya gha giẹn eturari vbe Ogiukpo eturari.

Job 22:12

Ẹ i re ehe ne ọ yo sẹẹ vbe ẹrinmwi ọ re Osanobua ye, ọ ghi gha ghe avbe orhọnmwẹ ginna otọ, egbe ne iran rhe ya rre ehe ne ọ yo.

Psalm 89:7

Te a kpa uhe ne uẹn vbe iko iran ni huanrẹn te ohan ruẹn wa mu iran hia.

Ẹksọdọs 3:5

Osanobua keghi kha wẹẹ, “Ghẹ ghi sikẹ edinran sẹ ọnii. Viọ ibata hin owẹ rre rhunmwuda otọ ne ọ huanrẹn ọre u mudia yan na.”

Ẹksọdọs 30:18

“U ghi dunmwu uwawa oze ne ototọ ẹre vbe re oze. U ghi muẹn ye ẹkpo Owa Ukpọn kevbe aka, u ghi sa amẹ yọ.

Itan 10:19

Omwa vbene a talọ sẹ, ọ re a vbe ya ru orukhọ. A dẹghe wẹ wan, te u gha hẹko hunwan.

Itan 15:8

Emwa esi gha na erhunmwu, ẹko ghi gha rhiẹnrhiẹn e Nọyaẹnmwa, sokpan te emwi izọ ese ne emwa dan viọ gie ẹe sọnnọ ẹn.

Itan 21:27

Te ọ sọnnọ e Nọyaẹnmwa vbe emwa dan a zọ ese ghe ẹre, katekate vbe a gha miẹn wẹ emwi dan ọ re ọ rre iran ekhọe ne ọ ye iran ru ẹe.

Aizaia 66:3

Vbene ọ yẹ avbe emwa ni ọ re iran ru. A deghẹ ẹkhuia ẹmila ọ re iran ya zọ ese ra ọmwa nagbọn nọ, ọkpa ehia khin vbe aro iran. Adeghẹ oteghe ohuan ọ re iran ya zọ ese ra ekita ọ re iran bun ẹnrẹn ẹyaẹn; adeghẹ ọka ọ re iran do ya yo imuohan, adeghẹ eturari ọ re iran ya yo imuohan ra te iran gha na erhunmwu ghe amazẹ; ọkpa ehia khin vbe aro iran. Te ugamwẹ ne ọ sọnnọ ne iran ru wa yẹ iran.

Levitikọs 10:3

Ẹre Mosis na tama Errọn wẹẹ, “Emwi ne Nọyaẹnmwa gha kha ẹghẹ nii ọre ọ na khin vbe ẹghẹ ne ọ na kha wẹẹ, ‘Iran hia nii ga mwẹ, ọ kere ne iran gha da ne uhuanmwẹ mwẹ, I gha rhie uyi mwẹ ma emwa mwẹ.’ ” Sokpan Errọn ma guan ẹmwẹ rhọkpa.

Iwinna 10:33

Ọre I na gie ne a tie ruẹ rre ọwarọkpa, wẹ ne ọ maa na wa vbe gha dee. Banbanna nian, odaro Osanobua ma ghi ye na, ma mu egbe ne a ya họn ẹmwẹ ne Nọyaẹnmwa wẹ ne u ta.”

Iwinna 17:11

Emwa ni rre ẹvbo na ọre ẹdẹ gbe vbe ẹko sẹ iran ni rre Tẹsalonaika. Iran keghi wa gbe ẹkun sẹ otọ gha danmwehọ ikporhu nii, iran kegha tie Ebe ẹsẹse gualọ otọ ẹre ne iran miẹn ehe na rẹn a deghẹ ẹmwata ọre ẹmwẹ ne Pọl tae khin.

I Kọrinti 11:22

Wa i mwẹ owa obọ uwa ra, ehe ne uwa gha na gha re, ne uwa vbe gha daa? Ra te uwa zan esọsi Osanobua ne uwa vbe gha fa iran ne ẹ i mwẹ ruan? Vbe uwa we ne I gie uwa guan hẹ vbe emwi na yi? Ne I gha tian uwa ra? Hiehiere, I i zẹdẹ tian uwa.

Hibru 10:26

Rhunmwuda, ese ọvbehe ne ọ gha kpe orukhọ kua i ghi rrọọ, a deghẹ ma ye ma gha ru orukhọ khian, iyeke vbe a rhie nene ẹmwata ma ima nẹ.

Jems 1:19

Wa ghi ye ọna rre o, wa ne etẹn mwẹ ni ghan, Dọmwadẹ ọghọe, vbe uwu uwa, wa ghi gha re ne ọ rherhe danmwehọ ẹmwẹ, sokpan ne ẹ i rherhe guan, kevbe ne ẹ i rherhe mu ohu.

Jọsua 5:15

Ọ re ọkaokuo ivbiyokuo e Nọyaẹnmwa nii na tama rẹn wẹẹ, “Viọ ibata ruẹ hin owẹ rre ighẹ otọe ne ọ huanrẹn ọ re u mudia yan na.” E Jọsua keghi ru vbene a tama rẹn.