Asan-Ibo 4:1 - Edo Bible (E Baibol Ẹdo) Version 1996

¹ I keghi vbe dọlegbe do ghe avbe emwi hia ni sunu ne ẹ i la ihe vbe agbọn, iran ne a zẹ kpokpo gha viẹ egbe, sokpan a i miẹn ne ọ ru iyobọ ne iran. A i miẹn ne ọ ru iyobọ ne iran rhunmwuda obọ ọghe iran ni zẹ iran kpokpo, ọ re ẹtin khua ghe.

Asan-Ibo 4:1 ပူးပေါင်းရင်းမြစ်များ

Job 16:4

Gie a kha ighẹ mẹ ọ re uwa, wa na gha re imẹ, I gha wa sẹtin vbe ta avbe ẹmwẹ ne uwa talọ na. I gha sẹtin ya ẹwaẹn fieghe uhunmwu mwẹ, I gha ghi ye ẹmwẹ ne ọ tue ladian silo uwa kẹ egbe.

Job 35:9

“A ghe zẹ emwa kpokpo, iran ghi gha zẹ uyọn; iran ghi gha tu tie ọmwa ne ọ gha miẹn iran fan.

Job 6:29

Ehe ne uwa he khian sẹ ni, sẹe. Wa do bọ a i ta ẹmwata yi. Wa ghẹ hu abe mẹ. Mẹ ọ re ọ rria asẹ.

Job 9:24

Osanobua mu agbọn na ne emwa dan, ọ rhu iran ni bu ohiẹn hia aro, a deghẹ ẹire Osa ọre ọ ru ẹe, de ọmwa ne ọ ghi khin?

Psalm 12:5

Sokpan, e Nọyaẹnmwa khare wẹẹ, “Eban nian, mẹ dee, rhunmwuda, a zẹ iran ne ẹi mwẹ kpokpo. Iran ne a zẹ kpokpo gha viẹ eve obalọ. I gha do ru ẹe ne ẹkun sẹ iran otọ, ne egbe rọkhọ iran zẹ vbe ne iran ho.”

Psalm 142:4

I gha ghe lẹga egbe mwẹ, I ghi miẹn wẹ, ọmwa ne ọ gha yọmwẹ obọ i rrọọ, ọmwa rhọkpa i zẹ yọmwẹ re.

Psalm 142:5

Nọyaẹnmwa, I kpe tie ruẹ ne u yọmwẹ obọ, wẹ, e Nọyaẹnmwa, ọrọre ne ọ rhie mwẹ lẹre, wẹ ọrọre emwi okpa ne I ho vbe agbọn na.

Psalm 42:3

Asọn kevbe avan ọ re I ya viẹ egbe, ameve ọkpa ọrọre evbare mwẹ ẹghẹ hia, avbe eghian mwẹ ghi gha nọ mwẹ wẹẹ, “Osanobua ruẹ vbọ?”

Psalm 42:9

Mẹ tama Nọyaẹnmwa ne ọ gbinna mẹ wẹẹ, “Vbọzẹ ne u na mianmian mwẹ? Vbọzẹ ne I gha na gha rrioya vbe obọ ekhọe dan ọghe avbe eghian mwẹ?”

Psalm 69:20

Ihẹn ne iran tie ya ekhọe mwẹ rhia, emwi hia wa khan mwẹ. Te I te rhie aro ye itohan, sokpan I ma miẹn, I te rhie aro ye egberọkhọmwẹ sokpan, ọ ma sẹ mwẹ obọ.

Psalm 69:21

Ẹghẹ ne ohanmwẹ na gha gbe mwẹ iran keghi rhie eruan mẹ, ẹghẹ ne ovbamẹ na gha gbe mwẹ iran keghi mu okikan gun mwẹ.

Psalm 80:5

U rhi akhiẹ ne ima re nẹ, ukpu ne ọ kpọlọ ọghe ameve ne ima wọn.

Ẹksọdọs 1:16

“Wa gha mu ikhuo Hibru emwi ubiẹmwẹ, iran gha biẹ okpia wa ghi gbe ẹe rua, sokpan ọ gha re okhuo, wa ghi sọrae.”

Ẹksọdọs 1:22

Ẹghẹ nii ọre ọba ghi na yi iyi ne emwa irẹn hia wẹẹ, “Emọ ikpia ne emwa Hibru a rhirhi biẹ, wa gha filo iran ku ẹzẹ Nail, sokpan wa sẹ avbe emọ ikhuo ni rrọọ rae ye agbọn.”

Itan 19:7

Uhin ighe etẹn ovbiogue i vbe ka ẹe ye ọmwa, ghe emwi ne ọ si ẹe ne ẹ i na mwẹ ọse. Vbene ọ khọn rẹn wẹ ne ọ ziga sẹ hẹ, ẹ i miẹn.

Itan 28:3

Ọmwa ne ọ rre asẹ, ne ọ zẹ ivbiogue kpokpo, te ọ yevbe amẹ ne ẹhoho lele, ne ọ gbele emwiokọ.

Itan 29:2

Ma mwẹ ọmwa ẹmwata ne ọ rre asẹ, I gha vbe ma ruẹn emwa ne ẹko sẹ ọ re ọyẹnmwẹ. Ma mwẹ ọmwa dan ne ọ rre asẹ, I gha vbe ma ruẹn emwa ne agbọn khan rẹn.

Asan-Ibo 3:16

Deba ena hia, I keghi vbe miẹn uyimwẹ ika vbe ehe ne ọ te kei ne a ta ẹmwata kevbe emwi ne ọgbae gha ye.

Asan-Ibo 5:8

Ghẹ giee yan uwe unu uan adeghẹ arriọba kpokpo ovbiogue, ighe ọ ma vbe gie a bu ohiẹn ẹmwata ne iran, ra ne a rhie emwi ne ọ khẹke iran ne iran. Dọmwadẹ ọmwa iwinna, ọmwa ne irẹn rre ototọ ẹre, ọ re ọ sinmwi ne ẹẹn, ọmwa ne ukpo ẹre ghi vbe yo sẹẹ ọ re ọ sinmwi ne iran eveva.

Asan-Ibo 7:7

Ọmwa ne ọ wan gha mu ọmwa ru, uyinmwẹ ọzuọ ọ re ọ yinrin nii. U gha miẹn igho odieke, u mu eni ruẹn rhia nẹ.

Asan-Ibo 8:9

Ẹghẹ ne I na gha roro ẹmwẹ emwi ne a ru vbe agbọn na, ọ re I na miẹn emwi na hia; agbọn na ne emwa eso na wa mwẹ ẹtin, emwa ọvbehe ghi gha sẹ usẹ lele iran.

Aizaia 5:7

Izrẹl ọrọre ogba azara ọghe Nọyan ne Oghodua; emwa e Juda ọrọre azara ne ọ kọ yọ. Rẹn te rhie aro yọ ne iran gha ru emwi ne ọ maa, sokpan, iran kegha do izigha. Rẹn te rhie aro yọ ne iran gha ru emwi ne ọ gbae, sokpan, emwa ne obọ iran vbare kegha tu wẹ ne a bu ohiẹn ẹmwata.

Aizaia 51:23

Mẹ gha rhie ẹre ne iran ni wọ uwa uhunmwu iran ne ọ wẹ ne uwa lovbiẹ vbe adesẹ ore iran na gha ya owẹ rilo uwa zẹ vbe iku.”

Aizaia 59:7

Uma dan ọ re uwa si vbe ẹghẹ hia, ọ ghi vbe gha bọbọ uwa egbe ne a ru. Wa ghi gha gbe ne ọ ma rukhọ, ẹ i sọn uwa urumwẹ. Ọ rhia ẹe kevbe ọrẹnkhuan ọ re a ya rẹn ehe ne uwa lae,

Jerimaia 16:7

A i miẹn ne ọ gha gu ọmwa rri evbare ra ne ọ guee da ne ọ ya fu ẹre ẹko rre vbe ọmwa a wu ẹe. Ne ọ ra mwẹ itohan i rrọọ, ọ gha re te erha wu ọmwa ra iye ọ re ọ wu ẹe.

Eve Orriara 1:16

“Ọna ọ sii ẹe ne aro mwẹ na rhọ ameve. A i miẹn ọmwa ne ọ gha sẹtin bọ mwẹ; ọmwa ne ọ gha sẹtin rhie ẹtin yọmwẹ iwu i rrọọ. Obọ avbe eghian gba mwẹ nẹ, emwa mwẹ i ghi mwẹ emwirhọkpa.

Eve Orriara 1:17

“I niẹn obọ ladian, sokpan, a ma miẹn ne ọ yọmwẹ obọ. E Nọyaẹnmwa tie oguo avbe eghian yọmwẹ egbe vbe igienenẹ; iran keghi ru mwẹ emwi oya vbe ekẹkhẹrhẹ.

Eve Orriara 1:2

Te ọ wa viẹ ne ẹdẹ gbe ameve ghi gha rhọ kua vbe aro ẹre. A ma miẹn ne ọ ghi kẹe ne ọ do fu ẹre ẹko rre vbe uwu avbe ọse ne ọ te ka mwẹ. hia. Iran ni te ga gie ẹe hia hiẹ ọre te ehia ghi mu aro da irẹn na.

Eve Orriara 1:9

Te a wa rherhe rẹn wẹ ọ ma huan sokpan, rẹn ma zẹ ye emwi ne ọ sunu vbe egbe irẹn. Udemwẹ ọnrẹn kegha re ne ọ mu ohan; ọmwa ne ọ gha sẹtin fu ẹre ẹko rre i rrọọ. Obọ avbe eghian gba ẹre nẹ, Te ọ ghi tu nọ itohan vbe obọ e Nọyaẹnmwa.

Emọs 3:10

E Nọyaẹnmwa khare wẹẹ, “Emwi ne emwa na ya okuo igbe kevbe imu viọ, ọ re iran viọ vuọn owa iran ne mose mose. Iran ma kue rẹn vbene a ru emwi uhẹn hẹ.

Emọs 3:9

Wa tama iran ni rre ẹguae vbe Igipt kevbe Asdọd wẹẹ: “Wa ya si egbe koko ye oke ni rre ọkpẹn e Sameria ne uwa ya ghe otighi kevbe emwi dan ne iran ru vbe evba.”

Malakai 2:13

Wa ghe emwi ọvbehe ne uwa vbe ru. Wa ye ameve uwa ro gue Ogiukpo Osanobua mu otọ, wa gha viẹ, wa gha kpe orhu eve rhunmwuda ighẹ e Nọyaẹnmwa i ghi rhan obọ miẹn emwi ne uwa ya ha oko gie ẹe.

Malakai 3:18

Ẹghẹ nii, emwa ni gha dọlegbe miẹn alughaẹn ne ọ rre emwi ne ọ sunu vbe egbe ọmwata kevbe ọmwa dan. Vbe egbe ọmwa ne ọ ga mwẹ kevbe ọmwa ne ẹ i ga mwẹ.”

Malakai 3:5

E Nọyaẹnmwa ne Oghodua khare wẹẹ, “I gha ladian vbe uwu ẹbu uwa ne I do bu ohiẹn. I gha wa sẹ osẹe gbe iran ni ru e emaziki awan, iran ni ghẹ, iran ni sẹ osẹe ohoghe, iran ni gbe igho emwa ne iran ya winna rhu, iran ni mu avbe ẹgbẹe ru kevbe emọ ne ẹ i mwẹ erha, kevbe avbe erhunmwuyẹn, kevbe iran hia ne ẹ i da mẹ.”

Matiu 26:56

Sokpan ena hia sunu ne Ebemiẹn ehe na sẹ.” Ẹkpo ni ọre avbe erhuanegbe hia ghi na sẹ ọe rae, iran keghi lẹ kua.

Diuteronomi 28:33

Ẹvbo ẹrrẹe ghi viọ emwiokọ uwa ne uwa miẹn ẹsọn nọkhua yi ya kọ, vbene emwirhọkpa ina sẹ uwa obọ gberra ukpokpo ekugbakẹghẹrẹ kevbe obọ ne ọ tọn ne a ya mu uwa.

Diuteronomi 28:48

Rhunmwuda ọnii nian, eghian ne Nọyaẹnmwa, ra viọ ẹre aro da uwa ọ re uwa ra gha ga. Ovbamẹ gha gbe uwa, ohanmwẹ amẹ ghi gbe uwa, wa gha rre ivbabọ, ukpọn kevbe emwi ọvbehe hia. Eghian uwa ghi gha ye ọkhọ ye obọ yẹn uwa uhunmwu rhinrin wa te do fuan.

Jems 5:4

Wa ma he ha osa ne iran ne uwa ya gbe ugbo. Wa gha họn vbe ne iran gui hẹ! Eve ne iran ni rhọ emwiokọ uwa ne uwa viẹ, sẹ ehọ Osanobua nẹ, Nọyaẹnmwa ne Oghodua.

Giọgis 4:3

E Jabin kegha mwẹ ikẹkẹ okuo ema tọn iyisẹn yan uri enẹ (900) Ọ keghi ye ekhọe dan gha khaemwisẹ yan ivbi izrẹl, vbe uyinmwẹ ne ọ wegbe kevbe ọkhọ, la ukpo ugie. Ẹre ivbi Izrẹl na datie Nọyaẹnmwa ne ọ do yi iran obọ.