Asan-Ibo 2:10 - Edo Bible (E Baibol Ẹdo) Version 1996

¹⁰ Emwikemwi ne I rhirhi a gha ho, kegha sẹ mwẹ obọ, I ma vbe ye emwi ne ọ ghi re ne ọ ye ẹko ọmwa sẹ ọyẹnmwẹ rhọkpa hin egbe mwẹ unu. Ẹko emwi hia ni winna yi ke wa vuọn mwẹ, ena hia kegha re ere ne I miẹn vbo.

Asan-Ibo 2:10 ပူးပေါင်းရင်းမြစ်များ

Gẹnẹsis 3:6

Okhuo nii keghi miẹn vbene erhan nii ma egbe hẹ, kevbe ne ọmọ rẹn vbe rhie aro re hẹ, kevbe wẹ emwi esi gha nọ adeghẹ ọmwa waan. Ẹre ọ na rhie vbe ọmọ erhan nii, ọ na rri ọe. Ọ keghi rhie ne ọdọ ẹre vbọ, rẹn keghi vbe rri ọe.

Gẹnẹsis 6:2

Eso vbe avbe iran ni rre ẹrinmwi, keghi miẹn wẹ avbe ikhuo na wa mose ẹsẹse, ẹre iran na viọ ni yẹ iran vbọ rọnmwẹ.

Job 31:1

“Te I wa mobọ yan rẹn, ne I ghẹ ghe ọmọ okhuo ne a ro mwẹ viẹn yọ.

Psalm 119:37

Rhie mwẹ aro hin emwi oya rre, gha ru mwẹ ẹse vbene u yan rẹn.

Psalm 128:2

Iwinna ruẹn gha rhie emwi ne u gha re nuẹn, ẹko gha rhiẹnrhiẹn ọn, agbọn gha vbe ma ruẹn.

Itan 23:5

Igho ruẹ sẹtin wa ru gbee, vbene a miẹn wẹ te ọ zẹ ifuẹn, ọ na tin gha rrie zẹvbe oghohọn.

Asan-Ibo 11:9

Wa ne igbama, wa gha zọmọ igbama uwa. Gie ẹko gha sẹ uwa ọyẹnmwẹ vbene uwa he ye rre igbama na. Ru emwi ne u ho ne u ru, vbe rhie obọ lele emwi ne ọ rre orhiọn ruẹn. Sokpan ye rre wẹ Osanobua gha bu ohiẹn ruẹn vbekpa emwikemwi ne u rhirhi a ru.

Asan-Ibo 2:1

I keghi kha wẹ, I gha kuobọyuwa ne I rẹn emwi ne a ya ẹko rhiẹnrhiẹnmwẹ kha, I kevbe miẹn wẹ, ọna i vbe mwẹ esa.

Asan-Ibo 2:22

Ọmwa ghi ya ẹdagbọn hia domian, ọ ghi hawa, ẹ i vbe miẹn ọyẹnmwẹ okpa vbọ?

Asan-Ibo 2:24

Emwi ne ọ maa sẹẹ ne ọmwa gha sẹtin ru ọrọre ne ọ gha re, ne ọ gha da kevbe ne ọ ya okhuan ne ọ khuaẹn gha zọmọ. Levba se vba, I kevbe miẹn wẹ obọ Osanobua ọ re ọna ke rre.

Asan-Ibo 3:22

Rhunmwuda ọnii, I keghi do miẹn wẹ emwi ne ọ maa sẹẹ ne ima gha sẹtin ru ọrọre ne a lo emwi ne ima miẹn ẹsọn yi ya gha zọmọ. Emwi ọvbehe ne ima gha sẹtin ru ighi rrọọ. Odẹ okpa i rrọọ ne ima gha la rẹn emwi ne ọ ra sunu vbe ima a wu nẹ.

Asan-Ibo 5:10

Aro ruẹ gha wu ye igho, ẹghẹ okpa ne ọ ra ya sẹ uẹ ọkẹn i rrọọ. U gha rhie aro ye ẹfe, ẹghẹ ne u ra ya miẹn emwi ne u gualọ hia gba i rrọ. Ọna i vbe maa.

Asan-Ibo 5:17

Emwi ne a ghi miẹn vbọ ọrọre ne a gha lo ẹdẹ agbọn mwa vbe uwu ebiebi kevbe irhiaẹko, ekhọe ma sotọ, ohu kevbe emianmwẹ.

Asan-Ibo 5:18

Emwi ne I gualọ otọ ẹre miẹn ọ re ọna khin wẹ, emwi ne ọ kei ne ọmwa sẹ ọrọre ne ọ gha re, ne ọ gha da, ne ọ ye emwi ne ọ miẹn ẹsọn yi gha zọmọ vbe ẹdagbọn kherhe ne Osanobua rhie ne ẹẹn na: uhunmwu ne ọmwa mu rre ọ re onii khin.

Asan-Ibo 6:2

Osanobua ghi ya ẹfe ne ọmwa, deba ọghọ kevbe emwi ne a mwẹ, ne a wa kha wẹ emwi hia ne ọ ho, sokpan, ẹ i ghi gie ẹe ya ẹe ru, sokpan ẹrrẹe ghi do ya ẹe ru. ọna i zẹdẹ maa, ọ ma gba hiehiere.

Asan-Ibo 6:9

Ọna i vbe maa, te ọ yevbe ne a khu ẹhoho khian. Ọ kere ne emwi ne ọmwa mwẹ sẹ ọre ọkẹn, sẹ ne ọ gha rhie aro ye ọvbehe vbe ẹghẹ hia.

Asan-Ibo 8:15

Rhunmwuda ọnii, ekhọe mwẹ ta ẹe ma mwẹ wẹ te ọ kere ne ọmwa gha lo agbọn rẹn, rhunmwuda, ọyẹnmwẹ okpa ne ọ mwẹ vbe agbọn na ọrọre ne ọ gha re, ne ọ gha da, ne ọ vbe gha zọmọ. Ọ kere ne ọ sẹtin ru ọna vbe ẹghẹ ne ọ na winna vbe ẹdẹ ne Osanobua rhie ne ẹẹn vbe agbọn na.

Asan-Ibo 9:6

Ahoẹmwọmwa iran, ẹko khọmwẹ iran, kevbe emwi ne ọ fifi iran egbe ehia wulo lele iran. Iran i ghi sẹtin mwẹ obọ vbe emwikemwi ne a ru vbe agbọn na.

Asan-Ibo 9:9

Gu okhuo ne u ho ẹmwẹ ọnrẹn lo agbọn ruẹn vbe ẹghẹ ne u gha ya vbe agbọn ọrhiae ne Osanobua ya ru uẹ ẹse na. Lo nene avbe ẹdẹ ne ọ ma maa na hia, rhunmwuda, ọna okpa ọrọre ere ne u ra re vbe uwu ẹsọn ne u miẹn hia.

I Jọn 2:16

Emwi hia ni re ọghe agbọn na, emwi ne ọ yẹ egbe orukhọ na, emwi ne emwa ne agbọn bẹghe ne ọ vbe ya ghan, ọkpa ne ọ ke ehe ne Evbavba ye rre, ẹ i rrọọ, agbọn na ọre ehia ke rre.

Giọgis 14:2

Rẹn keghi dọlegbe gha rrie owa, ọ na tama erha ẹe kevbe iye ẹe wẹẹ, “I ye aro ba ọmọ okhuo e Filistia ọkpa vbe Timna, wa rhie ẹre mẹ, I ho ne I rhie ẹre rọnmwẹ.”