Aizaia 66:16 - Edo Bible (E Baibol Ẹdo) Version 1996

¹⁶ Erhẹn kevbe umozo ẹre ọ ra ya rri avbe emwa nagbọn hia ne ọ miẹn abe vbe obọ ẹre oya, a gha gbele nibun uan.

Aizaia 66:16 ပူးပေါင်းရင်းမြစ်များ

Aizaia 10:4

Iran gha gbele uwa a vbe okuo ra iran ghi silo uwa viọ gha rrie zẹ vbe oghunmwu. Ọ gha rhe ye rrio, ohu e Nọyaẹnmwa i he ye fo, obọ ẹre gha ye niẹn ladian ne ọ ya rria ikhi.

Aizaia 27:1

Ọ gha sẹ ẹdẹ ne ẹdẹrriọ, ẹ Nọyaẹnmwa gha ya umozo ẹre ne ọ mwẹ ẹtin ke ne ọ gbe emwi ya rri e Leviatan oya, nene Ugbogiorinmwi ne ọ gbe a kinnọ khiẹn yo khiẹn rre nii, ọ ghi vbe gbe Ugbogiorinmwi ne ọ rre uwu ẹzẹ okun.

Aizaia 3:13

E Nọyaẹnmwa mu egbe ne ọ gha ya gui ẹzọ ọghọe, ọ mu egbe ne ọ gha ya bu ohiẹn emwa irẹn.

Aizaia 30:30

E Nọyaẹnmwa gha gie emwa hia họn urhu ẹre ne ọ la ne iran vbe rẹn vbene ohu ẹre ye hẹ. Ogidi erhẹn gha rrọọ, okuku amẹ ne ọ mu waa, okpẹhoho kevbe okpamẹ.

Aizaia 31:8

A gha fuẹn Asiria a vbe okuo, sokpan ẹ i re ẹtin ọmwa nagbọn ọ re ọ ra ru ẹe. Ivbi Asiria gha lẹkua vbe okuo, a ghi munọ avbe igbama iran oghunmwu.

Aizaia 34:2

E Nọyaẹnmwa wa mu ohu avbe uhunmwu ẹvbo hia kevbe avbe iyokuo iran. Ọ tae nẹ ighẹ te iran hia ra fuan.

Aizaia 65:12

Vbene uwa hi hẹ nọ wẹ ne uwa wulo uwu ekpain ekpain, rhunmwuda, wa ma khuẹnniẹn vbe I tie uwa, wa ma danmwehọ vbe I guan. Wa na wẹ te uwa ra he uhunmwu yọmwẹ obọ ne uwa gha ru emwi dan.

Jerimaia 25:31

Ulamwẹ ọnrẹn ghi mi igboo ya sẹ ehe ne agbọn sẹe. E Nọyaẹnmwa mwẹ ẹzọ ne ọ gu avbe uhunmwu ẹvbo gui ọ gha viọ emwa hia la erhan ẹzọ, ọ ghi gbele avbe emwa dan an. E Nọyaẹnmwa tae nẹ.’ ”

Jerimaia 25:33

Ọ gha sẹ ẹdẹ nẹdẹrriọ ikun avbe emwa ne Nọyaẹnmwa gbele ghi ye bẹẹrẹ lele otọe ke obọkpa vbe ehe ne agbọn sẹe ya sẹ obọ nọkpa. A i miẹn ne ọ gha khiẹ iran, a i ra vbe viọ iran kpao ne a ya re iran. Ehia gha rre otọ bẹẹrẹ vbe ẹtẹbọ ekẹn nekhui ne a ya ye otọe maa emwiokọ.

Jerimaia 45:5

Te uwẹ ghi ho ne a ya obọ ughaẹn kpataki mu mwẹ ra? Ghẹ danmwẹ ọẹn ghe, te I ra gie ọkhọ rruan emwa nagbọn hia, sokpan, vbene ọ rhirhi a gha ye hẹ, wẹ gha miẹn uhunmwu wẹ kevbe ikpakpa uhunmwu ruẹn okpa vbe ehe ne u rrie, Mẹ ne Nọyaẹnmwa ọre ọ taa ẹe.”

Jerimaia 46:15

Vbọzẹ ne Apis ne ẹbọ uwa nọkhua na de yi? E Nọyaẹnmwa ọ re ọ gbe ẹe fi otọ!’

Ezikiẹl 28:18

Emwi dan ọ re u wa gha ru vbe uwu ne u na dẹ kevbe ne u na khiẹn, sẹrriọ wẹ avbe ehe ne u na ru ugamwẹ keghi khian ne a murhia. Rhunmwuda ọnii, mẹ keghi mu erhẹn ye ẹvbo nii, I na gien ọnrẹn sotọ. Emwa ni ghi miẹn ọn nian gha miẹn wẹ, te a ghi ya a khian emuẹn.

Ezikiẹl 38:17

Wẹ ọrọre ọmwa ne I gha kha ẹkporriọ, ẹghẹ ne I na wẹ ne avbe akhasẹ Izrẹl ne eguọmwadia mwẹ tae ladian wẹ ẹdẹ dee ne I gha gie ọmwa ọkpa rre ne ọ do khọn Izrẹl.” E Nọyaẹnmwa ne Udazi ọ re ọ tae.

Ezikiẹl 5:15

“Ohu uwa gha kakabọ mu mwẹ, I na rri uwa oya, avbe ẹvbo ni lẹga uwa gha runran. Iran gha yan aroa gha ghe uwa, iran ghi ya uwa gha gbogiẹ.

Joẹl 3:2

I gha si avbe uhunmwu ẹvbo hia si koko, I ghi viọ iran gha die Iya Ibuohiẹn. Evba nii ọ re I ra na bu ohiẹn iran vbe ekpa emwi ne iran ru emwa mwẹ re. Iran zagha ivbi Izrẹl kua, lele ẹvbo ẹrrẹe, iran keghi ghae Izrẹl ne otọe mwẹ.

Emọs 7:4

I keghi vbe miẹn umian ọvbehe ke ehe ne Nọyaẹnmwa ne Udazi ye gha dee. Vbe uwu ẹre, I keghi bẹghe ẹre vbe ọ mu egbe ne ọ do ya erhẹn rri emwa rẹn oya. Erhẹn ni keghi giẹn okun nọkhua ne ọ rre uwu otọ, ọ keghi vbe suẹn gha giẹn otọe kẹkan.

Nahum 3:15

Emwi ne ọ rhirhi a khọn ruẹn, u ru, te a gha ye giẹn ruẹn uan vbe okuo, ne uwu. Te a ra wa gbe uẹ ogbefo zẹ vbe emwiokọ ne irhiso re. Te uwa vbe gha muan vbe irhiso.

Nahum 3:3

Iran ni hin ẹsin vin ghe odaro umozo gha filo usanna kua, asoro gha fi wainwain, a silo orinmwi yan egbe, ikun orinmwi ne a i sẹtin ka emwa gha rrua owẹ vbe egbe iran.

Zẹkaraia 14:5

We ghi lẹ la iya na ne ọ fian oke ni rra ya sẹ obọ nọkpa ladian. Wa ghi lẹ zẹ vbene avbe erha uwa odede ka lẹ vbe ẹghẹ ne igbohiotọ na gha rrọ vbe ẹghẹ Ọba Uzaia ọghe Juda. E Nọyaẹnmwa Osanobua mwẹ gha viọ avbe odibosa hia mwẹ obọ gha dee.