Aizaia 64:4 - Edo Bible (E Baibol Ẹdo) Version 1996

⁴ A ma he miẹn egbe ọ re a ma he vbe họn ẹmwẹ Osanobua ne ọ yevbe ruẹ ne ọ winna egbe iwinna vberriọ ne iran ni ye egbe kọe.

Aizaia 64:4 ပူးပေါင်းရင်းမြစ်များ

Gẹnẹsis 49:18

I diakhẹ ẹghẹ imiẹnfan ruẹn Osanobua.

Ẹzra 9:7

Ke ẹghẹ avbe erha mwa odede gha dee do sẹ banbanna, ma ne emwa ruẹn kakabọ ru orukhọ ẹsẹse, rhunmwuda orukhọ ne ima ru, ma kevbe avbe ọba mwa kevbe avbe ohẹn mwa, keghi dele ye obọ avbe ọba ẹvbo ọvbehe, a keghi rẹnkhẹn ima, a rha ima, a keghi vbe do ima emwi viọ, a keghi vbe munọ ima oghunmwu. A keghi wa fa ima an fẹfẹẹfẹ, zẹ vbe ne ima ye ye ẹdẹnẹrẹ na.

Psalm 103:18

Vbe uwu iran ni ru vbene uhi ẹre khare, kevbe ni ye ekhọe ẹmwata ẹmwata mu uhi ẹre sẹ.

Psalm 130:5

I wa rhie aro, ye odẹ diakhẹ iyobọ e Nọyaẹnmwa, ẹmwẹ ọnrẹn ọre imẹ vbe mu ẹtin yan.

Psalm 31:19

Umiẹn vbe ehia mose hẹ ighe avbe emwi esi ne u hẹ ye otọ, khẹ iran ni ya ọghọ ne uẹn. Agbọn hia rẹnrẹn vbene u ma hẹ. A miẹn vbe u viọ iran ni mu ẹtin yan ruẹn lẹre hẹ khuankhuan an khuan.

Psalm 62:1

I hẹko ya izin egbe mudia khẹ Osanobua ne ọ do miẹn mwẹ fan. Rẹn okpa kẹkan ọre I mu ẹtin yan.

Aizaia 25:9

Ọna ghẹ ghi sunu, emwa hia ghi kha wẹẹ, “Rẹn ọrọre Osanobua mwa. Ma mu ẹtin mwa yan rẹn, ọ keghi vbe miẹn mwa fan. rẹn ọrọre Nọyaẹnmwa! Ma mu ẹtin mwa yan rẹn, banbanna nian, ma gha ghọghọ, ọyẹnmwẹ sẹ mwa, rhunmwuda ọ miẹn mwa fan.”

Aizaia 30:18

Sevba e Nọyaẹnmwa ye mudia ne ọ tohan uwa. Ọ mu egbe ne ọ ya tohan uwa, rhunmwuda emwi ne ọ gbae ọ re irẹn ru vbe ẹghẹ hia. Ọmakin iran ni mu ẹtin yan e Nọyaẹnmwa.

Aizaia 40:31

Sokpan iran ni mu ẹtin yan iyobọ Nọyaẹnmwa, a gha ya ẹtin iran khian ọghọgbọn. Iran gha ya ifuẹn iran tin kpao vbe oghohọn iran gha rhulẹ, egbe i ra wọ iran iran gha khian, ẹtin i ra vbe fo iran.

Aizaia 59:12

“E Nọyaẹnmwa, emwi dan ne ima ru ghe ruẹ wa bun. Orukhọ mwa wa gu ima gui. Ma wa rẹn wẹ ehia wa rre evba.

Aizaia 66:8

Wa he họn egbe ọre ẹdẹ ra, wa he miẹn egbe ọre ẹdẹ? Wa he miẹn uhunmwu ẹvbo ne a wa ya ẹdẹ ọkpa mu gbọọ? E Zaiọn i ra susẹ kpẹe a ke do mu uhunmwu ẹvbo ni gbọọ.

Daniẹl 9:15

“E Nọyaẹnmwa Osanobua mwa, wẹ rhie ẹtin ruẹn ma vbekpa ne u na viọ emwa ruẹn ke otọ Igipt ladian, deba ẹre te a ye ye ẹtin ruẹn rre. Ma ru orukhọ nẹ, ma ba emwi ku ru nẹ.

Daniẹl 9:5

Ma ru orukhọ, emwa dan ma wa vbe gha khin, ma ba emwi kuu ru. Ma rhie obọ gberra emwi ne uwẹ ne ima ru, ma keghi vbe fi iyeke gbe emwi ne uwẹ khare ighe ọ gbae.

Daniẹl 9:8

Avbe ọba mwa, iran ni khaemwisẹ yan ima, kevbe avbe erha mwa odede ru emwiekhue, iran keghi vbe rukhọ ghe uwẹ ne Nọyaẹnmwa.

Hozia 7:7

Vbe uwu ohu ne ọ mu iran, iran ghi gbele iran ni khaemwisẹ yan iran an. Iran gbele avbe ọba iran na ọsegbe ọsegbe, sokpan, a ma miẹn ọmwa ne ọ na erhunmwu ghe mwẹ wẹ ne I yi rẹn obọ.”

Zẹkaraia 10:9

A gha rhe miẹn wẹ te I zagha iran gba uhunmwu ẹvbo hia, sevba iran gha ye mwẹ rre vbe otọe urria nii, ke iran kevbe ivbi iran gha miẹn uhunmwu iran ghi gba gha die owa.

Matiu 25:34

Ọba ghi tama iran ni rre obọ erha ọmwa wẹẹ, ‘Wa larre, wa ne erha mwẹ fiangbe, wa do mu arriọba ne a kpehe ẹre ye otọ khẹ uwa ke ne a ya yi agbọn gha dee.

Iyẹn ne ọ Maan Ọghe Luk 2:25

Vbe ẹghẹ na, okpia ọkpa ne a tie ẹre Simiọn keghi rre Jerusalẹm. Rẹn keghi re ọmwa esiesi ne ọ mu ohan Osanobua kevbe ne ọ vbe rhie aro ye odẹ gha khẹ ẹghẹ ne a gha ya miẹn Izrẹl fan, orhiọn Ne ọ huanrẹn keghi rrọọ yaba ẹre.

Iyẹn ne ọ Maan Ọghe Jọn 14:3

Mẹ gha ghi ya te ẹre ye otọ khẹ uwa nẹ, I gha dọlegbe gha dee do viọ uwa ba egbe, ne uwa miẹn ehe na gha rre ehe ne imẹ ye.

Ebe ne Pọl gbẹẹn gie emwa Rom 8:19

Te emwi ne a yi hia heko ziengbe gha khẹ wẹ ne Osanobua viọ ivbi ẹre ladian ne a miẹn.

I Kọrinti 1:7

Wẹ wa ma he vbabọ emwi afiangbe ọkpa ẹdẹ, vbe uwu ẹghẹ ne uwa ya diakhẹ Nọyaẹnmwa Jesu Kristi ne ọ rhie egbe maa.

I Tẹsalonaika 1:10

Kevbe ne uwa do gha diakhẹ Ovbi ẹre ne ọ ke ẹrinmwi tuorre gha dee, Jesu ne Ovbi ẹre, ọmwa ne irẹn huẹn kpaegbe vbe orinmwi, ọmwa ne ọ miẹn ima fan vbe obọ ohu Osanobua ne ọ dee.

I Timoti 3:16

Ọmwa ne ọ gha sẹtin muan rẹn ẹ i rrọọ ighẹ ẹmwẹ oro nọkhua ọghe iyayi mwa: Rẹn rhie egbe ma zẹ vbe ọmwa kẹkan, a miẹn ọẹn vbe ọghe Orhiọn wẹ ọmwata nọ, avbe odibo Osa vbe miẹn ọẹn. A kpe orhu ẹre vbe avbe uhunmwu ẹvbo, a ya ẹe yi vbe otọ agbọn hia, a keghi tọn ẹn mu gha rrie ẹrinmwi.

Hibru 11:16

Sokpan, ẹvbo ne ọ maa sẹ ọnii ọre iran rhie aro yi, ẹvbo ẹrinmwi. Rhunmwuda ọnii, ekhue ẹre i mu Osanobua vbe ọ wẹ ne iran gha tie irẹn Osanobua iran, rhunmwuda, ọ rhie ẹvbo ye otọ khẹ iran nẹ.

Jems 5:7

Rhunmwuda ọnii, wa ne etẹn mwẹ, wa ziengbe khẹ ẹghẹ ne Nọyaẹnmwa gha ya rre. Wa ma miẹn vbe ne ọwẹe ziengbe hẹ vbe ọ gha khẹ ne otọ ẹre mọ ọmọ esi ladian. Ọ ghi hẹko, ziengbe khẹ amẹ ne okaro kevbe ne okiekie ne ọ rhọ.

I Jọn 4:10

Emwi ne aho ẹmwẹ ọmwa khin ọre ọ na khin, ẹ i re wẹ, ma ka hoẹmwẹ Osanobua nẹ, sokpan wẹ, rẹn ọre ọ hoẹmwẹ mwa, ọ keghi gie Ovbi ẹre ne ọ do gha re emwi ne a gha la ekpa ẹre ya orukhọ mwa bọ mwa.